Ua fa’aopoopo nei le aofa’i o pine ua maua e le Team American Samoa i Ta’aloga lona XV a le Pasefika o lo o fa’agasolo i le taimi nei i Papuia Niu Kini, ina ua manumalo le tama’ita’i o Ursula Filimaleafa Te’o Martin i le pine auro, i le tauvaga Fa’aali Tino sa faia i le aso Gafua na te’a nei (aso Sa taimi Samoa).

O le pine auro a Martin ua atoa i ai pine e 9 ua mafai ona manumalo ai Amerika Samoa i Taaloga a le Pasefika o lo o fa’agasolo i Papua i le taimi nei, e aofia ai pine a e 8 na maua e le Vaega Siisii Uamea Mamafa.

O le manumalo ai o Martin i le pine auro, ua tula’i mai ai le avea o ia ma ulua’i tama’ita’i Amerika Samoa ua manumalo i se pine auro i le ta’aloga Fa’aali Tino, o le ulua’i taimi fo’i lea ua tausinio ai Amerika Samoa i lenei ta’aloga i Ta’aloga a le Pasefika.