O lo ua atoa tino o le Tama, ua o gatasi fo’i le futia ma le umele i le loto o le tagata ma lana faigamalo ma le finagalo le seua o le Atua, ua fa’ataunu’uina ma le manuia le fa’amoemoe ua loa o epa i le foe, ina ia mafai ona umusaina le Maota o Amerika Samoa e fa’atautaia ai ana fonotaga masani e fia fa’atino fa’asamoa, i ni ana taligamalo ma le aga’i i luma o lona malo fa’ateritori o Amerika.

Ua tu le matila ma ua mata’ina le tuligasi’a aua e tetele Pesega ae ua matua i le lelei, e pei o lafoga sa fa’afofogaina i lea aso iloga i le tatou Malo. Ioe, ua taunu’u le fa’amoemoe, o le la’au o le ola lava lea!

Ua matua atoa le atuvasa i ona teuga e tatau ai i tu ma aga fa’asamoa, ina ua i ai le Fale Tele ae tainane ona fale e tua i ai i tapenaga ma mea e ao ina olioli mai e fa’atino ai le fa’amoemoe o fonotaga, ma mea uma e usuia i le Fale Tele lena.

E ui ina ua maliliu toa o le atunu’u sa latou mua i malae i afuaga o lenei galuega lelei, ae ua iloga fo’i o latou loto i le atunu’u ma lona lumana’i i le galuega ua mae’a fa’atino ma ua tutula’i i le malae o le atuvasa.

Ua tino fo’i lea igoa ua fa’ailo ai le Faletele ma ona atufalega, aua na i ai uma le vasega o ta’ita’i o Malo o le Alamoana o le pasefika, i le aofia sa pa’au mai e maimoaina lea fo’i mata’aga muamua i o tatou laufanua, ua mae’a lelei le Fale Talimalo mo le Malo o Amerika Samoa i le Malae o le Su’igaula a le Atuvasa.

E le gata i lea, ae sa aofia ai le pa’ia maualuga i fa’auluuluga o Malo o Samoa na lua, ma le fa’aafio fo’i o le afioga le Perenise o le Malo o Tonga, e taualoa ai lo latou auai mai i lenei tausaga i le sisigafu’a a Tutuila ma Manu’a.

O se taimi lelei na fa’ataoto e le ta’ita’i o le faigamalo o Amerika Samoa, aua ua fa’atino le fa’amoemoe, ae ua fa’amauina fo’i lona malae i lea taeao. E pei ona saunoa le afioga le Kovana Sili, “O le Faletele lenei mo tupulaga o le lumana’i o Amerika Samoa,” ia fai ma va’aiga ia i latou ituaiga maota sa fa’atautaia ai mataupu o saofa’iga o afio’aga ma aiga Samoa i aso ua tuana’i. Sa mau ai le tofa manino ma le fa’autaga loloto i ona faletele ae a le aga’i mai i o tatou vaitaimi o le tatou faigamalo.

Sa i ai se fa’anoanoaga i lana afioga, ina ua tau lana saunoaga ia i latou na amata afuafuaina lenei galuega. “Ua momoe mai i ti’asa i latou sa fuafuaina lenei fa’amoemoe, ua le va’ai i latou i le aso lenei, peita’i, o lo latou agaga atoa ia tula’i lenei faletele, ona fa’afetaia lea o le Atua.”

Na ia saunoa fo’i ma fa’afetaia le auai fa’apitoa o le faletua Tofiga Tufele Li’amatua, ua fai lava o ia ma sui va’aia o le afioga le Alofioamoa. O le ulua’i tau amataina o lenei poloketi, na afuafua mai lea i le vaitaimi a’o avea le afioga le Ma’oputasi Mauga Tasuaeafe Asuega ma Failautusi o le Malo Fa’alotoifale o le tatou atunu’u i lona Ofisa o Mataupu Tau Samoa, ma latou feutaga’ia ae le’i fa’atinoina se’ia o’o mai i le vaitau ua tula’i mai ai le afioga le Alofioamoa Tufele Li’amatua ma Failautusi o lea lava ofisa.

Na fa’afetaia e le afioga le Kovana Sili, le ali’i Failautusi o le Matagaluega a le Initeria o le Malo tele, Susuga Anthony M Babauta, aua o i latou na fa’atupeina mai le isi vaega tupe na fa’atupe ma mae’a ai le faletele i lona tula’i mai ai nei.

O le aofa’iga o le vaega tupe mai le DOI e $250,000. ae toina mai e le ASG le $50,000. ma ua mae’a ai loa le maota atoa lenei i ona mea e fausia ai, fa’atasi ma le totogi o tagata fa’akonekarate e fausiaina le Faletele.

O le isi fesoasoani sa mafai ona fa’amae’a ai isi tapenaga o le laufanua o le maota lea sa pasia mai lea e le  Fono Faitulafono o le tatou malo, i ona maota e lua, ma sa fa’apea fo’i ona fa’afetaia e le Kovana Sili le fesaosoani mai a le afioga le Peresetene o le Senate ma le Fofoga Fetalai o le Maota o Sui.

O nisi o malo fa’aaloalogia sa mafai ona aofia i le Faletele i le taeao ananafi sa aofia ai le afioga le Perenise Fa’apaleina o le Malo o Tonga, Tupouto’a Ulukalala, le afioga le Palemia o Samoa Tuto’atasi Tuilaepa Sa’ilele Malielegaoi, Ulu o Tokelau Aliki Kerisiano Kalolo, Kovana o Tuvalu Iakoba Tae’ia Ialeli, US Coast Guard a le Malo tele Capt. Joanne Nuan ma isi fa’auluuluga o vaega o le Malo o Amerika Samoa, le afioga le Fa’amasino Sili le afioga Lealaialoa M. Kruse, Le Peresetene o le Senate, Leafioga le Tama’ita’i o le Ao Gaoteote Palaie, le afioga le Fofoga fetalai o le maota Savali Talavou Ale, le afifio i Fa’auluuluga o Matagaluega Esese o le Malo, le afifio i afioga i Senatoa o le Maota Maualuga ma Ali’i Faipule o le Maota o Sui o le Fono Faitulafono, ae tainane lava le afifio i susuga i le Aufaigaluega Pa’ia a le Atua, o Failauga o le Upu o soo se Fata Faitaulaga i le atunu’u ma le pa’ia lasilasi o le atunu’u sa auai i le malae o le Su’iga’ula a le Atuvasa i Utulei.

I le polokalama fa’ataoto o le taeao na fa’atulaga ai le susuga le Fa’afeagaiga FT Pesaleli Poufa mai Atu’u EFKAS na te ta’ita’ia le sauniga mamalu i le tatalo, ae o pese ma vi’iga o le sauniga mamalu sa fofogaina lea e le EFKAS i Vatia. O le sauniga fo’i sa i ai se avanoa e saunoa ai le afioga le Palemia o Samoa ma sa ia ‘ave le fa’afetai i le Atua o sosia e tele ua fa’amanuiaina ai Amerika Samoa, ua mafai ai ona tino se galuega tele fa’apenei, e matau i ai le atunu’u i ana tu ma agaifanua.

I le ava fo’i o le taeao fesilasilafa’i, sa mua’i tapa ipu le afioga le Palemia o Samoa Lupesoliai Aiono Tuila’epa Malielegaoi, soso’o le ‘ava a le afioga le Aofa’alupega FT Poufa ae fa’ato’a tapa ipu ai lana afioga le Kovana Sili Togiola Tulafono, soso’o le ava mo le Taitai o le US Coast Guard a le Malo tele, ma fa’asolo ai. O le tofa Afuola Kalasa, sui failautusi o le Ofisa o Mataupu Tau Samoa na saunoa ina ua mae’a le sivaloa ma le fa’atau pa’ia mo le aso iloga o le matagaluega ma le malo.

Ina ua mae’a le ava, sa fa’atautaia loa le ‘aiga matagofie, ae o lo’o fa’afiafia i le autalavou mai le EFKAS i Lauli’i, le afio’aga o lo’o alaalata’i ai le afioga le Alofioamoa ma le Faletua. Na muamua mai i lea ausiva le sao na fa’afiafia ai le Fa’aili Pu a Leoleo mai le Malo o Samoa.

 I fa’aaloaloga na faliu i ai le pa’ia o le Ofisa o le Faigamalo Fa’alotoifale a le tatou malo na muamua ai fa’aaloaloga i malo pa’au mai e afua i le afioga le Palemia o Samoa, le susuga le Ta’ita’i o le Sauniga lotu e fa’apa’ia ai le maota, Fa’auluuluga o Malo uma o le pasefika o lo’o aofia i le fa’amoemoe i le taeao ananafi, ae maise ai o sui o le faletolu o faigamalo a Amerika Samoa, le Fa’amasinoga, le Fono faitulafono ma le afioga le Kovana sili.

Na ese fo’i fa’aaloaloga sa saunia lelei mo le afioga le Matuaofaiva ma le falefa o le Aiga Salemalama ona fa’ato’a fa’amae’a ai lea o le aso iloga o le umusaga o le Faletele o le tatou malo ananafi. O le afioga le Agaiotupu ma le Meana’itaua, o le Fesoasoani Pope lea i le afio’aga o Fagaitua Faleagafulu Filipo Taua’i, ma o lo’o galulue pea lava i la’ua i le ekalesia ma le la’ua tofi i Fagaitua, ae o le taleni lea o lo’o fa’ao’aina ai lana susuga le Auauna e lona Atua Soifua.