Ads by Google Ads by Google

Umia Ofisa o Lafoga pepa lafoga sa faila fafo ua teena

Ua tauaaoina nei e le Ofisa o Lafoga a Amerika Samoa nisi o pepa talosaga mo le failaina o lafoga a tagata e faigaluega i le teritori nei, mai le Ofisa o Lafoga a le malo tele, le IRS ina ua le taliaina a latou talosaga sa faila atu i tausaga ua mavae.

Na faamanino mai e le Pule o le Ofisa o Lafoga a le malo o Amerika ia Melvin Joseph e faapea, o ia pepa talosaga, o lafoga a nisi o tagata e galulue i Amerika Samoa sa taumafai e faila a latou lafoga i le malo tele peita’i sa te’ena mai e le IRS, ma ua toe faafoi mai i lona ofisa mo suesuega o lo o faa’auau i le taimi nei.

Na fa’amaonia mai e Melvin i se feiloaiga ma le Samoa News e fa’apea, e le o tagata uma o lo o faila a latou lafoga i fafo ua maua e le IRS, ae o lo o faaauau ai pea suesuega i lenei mataupu, lea ua tusa nei ma le 3 tausaga talu ona fa’agasolo.

A’o i ai le atunuu i le vaitau o le failaina o lafoga, ua toe lapata’i mai e le Ofisa o Lafoga, le atunuu atoa, ina ia manatua, o se solitulafono le faila o le lafoga i le malo tele, aemaise lava pe afai o le tagata faigaluega lea ua faila lana lafoga i fafo, e galue i totonu o Amerika Samoa, ma o lana lafoga foi o lo o tipi i Amerika Samoa.

Saunoa Melvin, e mafua ona faila e tagata a latou lafoga i fafo, ona o le manatu i le tetele o faamanuiaga tau tupe e maua mai ai, peitai e mafua ona tetele tupe e maua i lafoga e faila i fafo, ona o le faamanuiaga tau lafoga lea e agavaa ai na o tagata e galulue i totonu o Amerika e taua o le “income tax credit”.

“E le o se mea sa’o ma amiotonu le faila o lau lafoga i fafo ae o oe e te faigaluega i Amerika Samoa, e maua ai lou totogi toe tipi ai lau lafoga,” o le saunoaga manino lea a le susuga Melvin.

Na taua e Melvin, e leai se tulafono i totonu o le Tulafono Toe Teuteu a Amerika Samoa e faasa ai ona faila se lafoga a se tagata faigaluega  i Amerika, peitai i totonu o le tulafono tau lafoga (Internal Revenue Code), o lo o faamanino mai ai le tulaga lea fai mai, “afai o lau lafoga o loo tipi i Amerika Samoa, e tatau foi la ona faila lau lafoga i Amerika Samoa.”

E lei mafai e Melvin ona saunoa faalaua’itele i suesuega sa ia taua o lo o faatautaia e le vaega a le IRS faasaga i tagata o loo faila a latou lafoga i fafo, peitai sa ia taua, “E le o toe umi se taimi ae maea loa suesuega o loo faia, o lau fautuaga, aua nei faaosoosoina oe i lou vaai atu i le tele o le tupe o loo maua e lou tuaoi mai lana lafoga sa faila i fafo, e le o se mea sa’o o loo faia e lou tuaoi, e le o toe umi se taimi ae maua loa ma faasala lena tagata e le IRS”.

E le na o Amerika Samoa o loo tupu ai le faafitauli lenei, ae o loo aafia ai foi isi teritori o le malo tele e pei o Guam, e pei ona faamaonia e Melvin.

Na taua e le alii pule o le Ofisa o Lafoga e faapea, i le lua tausaga talu ai, sa molia i le faamasinoga nisi i totonu o Guam ina ua faamaonia e le IRS sa faila a latou lafoga i fafo, ma e le gata sa latou toe totogi tupe na o latou maua, ae faatasi ai foi ma faasalaga a le faamasinoga.

Talu ona faagasolo suesuega a le IRS mo lafoga o loo faila i Amerika Samoa nei, o loo faia foi i le taimi lava lea e tasi se suesuega a le Ofisa o Lafoga a le tatou malo, mo le faamaumauina lea o igoa uma o tagata o loo maua a latou lafoga e pei o le ‘W2’ ma le ‘1099’ ae le o failaina atu a latou lafoga i totonu o le Ofisa o Lafoga a le malo.

Saunoa Melvin, o le auala lea o loo mafai ai ona o latou mauaina i latou e le o failaina a latou lafoga i taitasi i totonu o le malo o Amerika Samoa.

Na faamaonia e Melvin le faaitiitia o lafoga ua faila atu i le Ofisa o Lafoga a le malo i le tausaga lenei, faatusatusa i nisi o tausaga ua mavae, ma o nisi o mafuaaga ua ala ai ona faaitiitia lafoga faila a tagata, ona ua tapunia le Samoa Packing, atoa ai ma le mumusu o tagata e faila lafoga ona ua latou iloa e aitalafu i latou i le lafoga e mafua mai ona o le lafoga e 2% lea na toe faaopoopo e le malo i le tausaga na tea nei.

O le vaiaso na tea nei na faasoa atu ai e le Ofisa o Tupe a le malo siaki e 380 mo i latou uma lava sa faila a latou lafoga toe faafoi talu mai le amataga o Ianuari seia oo mai i se vaega o le aso 20 o Ianuari, tusa lea e silia ma le $650,000 na faaaluina ai.

Saunoa Melvin, o le toatele o tagata ua telefoni atu i lona ofisa ma talosaga atu pe mafai ona faanatinati atu a latou siaki ona o faalavelave a latou aiga.

“O le fautuaga le atunuu, e le mafai ona matou faia lena mea o le faila i le vaiaso lenei o lau lafoga ae maua lau siaki i le vaiaso fou, e alu lava i le faasologa, ia onosai mai foi mo se 4 i le 5 vaiaso talu ona maea le aso na faila ai lau lafoga ona maua atu lea o lau siaki,” o le fautuaga lea a Melvin.