E 471 sikaleti mariuana ua ta’utino le ali’i o Fatu Vagana i luma o le faamasinoga maualuga i le vaiaso nei, sa ia umia faasolitulafono i le aso 21 Novema 2013, ina ua maua e leoleo ni afifi mariuana se tolu i totonu o lana ta’avale.

O ia mariuana na sau ma le saila o le Lady Naomi o Liki Kirisimasi mai Samoa, lea fo’i ua mae’a ona ia tali ioe i le moliaga o le umia faasolitulafono o vaega o le laau faasaina o le mariuana, ma ua faatulaga le aso 21 o Mati 2014 e fofoga faatasi ai le la faasalaga i luma o le fa’amasinoga maualuga.

O Vagana, 42 tausaga le matua mai Aoloau na ulua’i tuuaia e le malo i moliaga mamafa e lua - o le umia faasolitulafono o mariuana ma le umia faasolitulafono o mariuana ma le faamoemoe e tulei pe tufatufa atu i isi tagata.

Ae i lalo o le maliliega na sainia e Vagana ma ua talia fo’i e le fa’amasinoga, ua ia tali ioe ai i le moliaga o lona umia faasolitulafono o mariuana ma le faamoemoe e tulei pe tufatufa atu i isi tagata, ae solofua e le fa’amasinoga le isi moliaga.

I le tali ioe ai o Vagana i le moliaga e pei ona ta’usala ai o ia, sa ia tautino ai e faapea, i se taimi o le aso 21 Novema 2013 i Amerika Samoa, sa ia telefoni ai i le alii o Kirisimasi na malaga mai i le Lady Naomi, mo le faatulagaina o se nofoaga la te fetaui ai mo le pikiina o le afifi mariuana.

Ina ua fetaui Kirisimasi ma Vagana, sa tuuina atu loa e Kirisimasi ia te ia se afifi o lo o i ai taga pepa iila e tolu, o lo o i totonu sikaleti mariuana e 471 ua uma ona taai.

O le mataupu faasaga ia Vagana ma Kirisimasi, o le osofaiga lata mai lea a le vaega o Leoleo o lo o galulue i le Suesueina o Fualaau Faasaina (Vice and Narcotics) ua maua ai se vaega tele o mariuana na taumafai le alii o Kirisimasi e aumai faasolitulafono i le teritori.

O se molimau faatuatuaina sa ia faailoa i leoleo gaioiga a Vagana o lo o faia i le kamupani i’a o lo o faigaluega ai, i lona faatauina atu lea o sikaleti mariuana i ni isi o tagata, na mafua ai loa ona tulimata’i e leoleo le taavale a Vagana i le aso e pei ona taua, ina ua masalomia o malaga a le Lady Naomi mai Samoa o lo o aumai faanana ai ni isi o nei fualaau faasaina.

Ina ua fesiligia e leoleo ia Kirisimasi e uiga i lenei mataupu, sa ia tautino ai e faapea, o ia na sau ma le afifi mai se tagata i Samoa ma le faatonuga, e ave i le tagata o le a vili atu ia te ia pe a taunuu le va’a i le uafu.  E le i umi ona taunuu le vaa ae vili atu loa Vagana ia te ia.

Na taua e Kirisimasi e faapea, sa masalosalo lona loto pei lava o ni vaega o le pauta faasaina o le aisa lea sa au ma ia, ma ua oso ai lava lona popole.

O lo o taofia pea Kirisimasi ma Vagana i le toese i Tafuna e faatali ai le aso lea ua faatulaga e lau ai a laua faasalaga.