Ads by Google Ads by Google

UMA LE FARM FAIR AE TOMUMUMU ISI FAI FA’ATOAGA

E le o faifaatoaga uma na fo’i fiafia i o latou aiga ina ua mae’a le Fa’aaliga a le Aufai Faatoaga i le aso Lua ma le aso Lulu na te’a nei, ina ua fa’aseå nisi o fai faatoaga i le faaletonu o faaiuga a nisi o fa’amasino sa latou faamasinoina fua o faaeleeleaga na la’u atu mo le tauvaga.

 

O le faaletonu na alia’e mai ina ua mae’a ona faalauiloa e se sui o le Ofisa o Faatoaga tagata fai faatoaga uma ua faamanuiaina i le faaaliga o lenei tausaga, e aofia ai fua o faaeleeleaga, fualaau ‘aina atoa ai ma fualaau taumafa mata, ma mautinoa ai loa e nisi o le aufai faatoaga, o le toatele o i latou e le o maua ni tulaga i le tauvaga sa faia.

 

Ina ua aga’i atu nisi o le aufai faatoaga e lei maua ni tulaga e toe faaputu a latou meamata ma le faamoemoe e toe la’u i le fale, ae tuu atu loa i ai ma se faatonuga mai sui o le Ofisa o Faatoaga, e leai se fai faatoaga e toe alu ma se meamata i lona aiga, ae o mea uma na avatu mo le tauvaga ua i lalo o le vaavaaiga a le Ofisa o Faatoaga, ma le faamoemoe o le a tufatufa atu i le mamalu o le atunuu na mafai ona lolofi atu e molimauina lenei faamoeoe.

 

Na faalogoina e nisi o le atunuu le tomumu o nisi o le aufai faatoaga, i le le talafeagai o le faaiuga ua faia i a latou meamata, a’o lea e le o tou faailoga uma le aufai faatoaga.

 

O le susuga a Taumaloto Lafaele o Pava’ia’i, sa la’u atu ana taro, le ituaiga o le taro Savaia e tauva ai i le faaaliga a le aufai faatoaga, o taro Savaia pito i lapopo’a fo’i ia sa vaaia ma molimauina e le atunuu i le tauvaga, peitai ina ua faalauiloa le faaiuga a fa’amasino, e leai se tulaga o taro a Taumaloto.

 

“E faafefea oga fai mai e leai se kulaga o a’u kalo, o kalo Savaia piko i lapopo’a lava gei sa i ai i le kauvaga,” o le saunoaga lea a le susuga a Taumaloto i le sui o le Samoa News, ae lagolagoina e le susuga a Vineula Lelevaga, o se tasi fo’i o ali’i faifaatoaga sa auai i le tauvaga.

 

Ina ua fesiligia e le Samoa News le susuga Taumaloto i sona finagalo e faatatau i le faaiuga a faamasino sa latou faamasinoina le tauvaga taro, na ia taua ai e faapea, “e faaikuau le faaiuga a le faamasigo sa faamasigoiga kauvaga kalo, o le mea mogi lava sa kakau oga maua se kulaga o a’u kala, se’i vaai i le mamao ma le kigaiga ga aumai ai a’o lea e leai se kulaga.”

 

E talitonu le susuga Taumaloto e pei ona ia taua i le Samoa News, e le gata ua faaituau faaiuga a faamasino sa latou faamasinoina le tauvaga taro, ae ua ave foi le faamuamua i tagata e aiga ma masani i ai.

 

“E le o se galuega faigofie le fai faatoaga, e laina ma timuia, e i ai fo’i taimi e le malolo ai, o a’u taro Savaia ia e tausaga atoa na toto ai, na toto mai ia Tesema 2012 a’o lea ua fafai i le masina lenei o Novema, 2013, e tele se galuega na ou faia i ai, a’o lea ua faapenei ona fai faaiuga a faamasino, o se tulaga e le lelei mo isi foi tagata fai faatoaga,” o le isi lea saunoaga a le susuga Taumaloto.

 

E le’i manuia taumafaiga a le Samoa News e saili ai suafa o i latou e toatolu na mauaina faailoga o le tauvaga taro Savaia, ona e na o numera sa faaaoga i le taimi na faalauiloa ai faaiuga a alii ma tamaitai faamasino.

 

Mo le taro Savaia lava ia, o le #26 na mauaina le tulaga muamua; #112 i le tulaga lua; ma le #107 i le tulaga tolu, o isi uma tagata fai faatoaga sa tauva i le taro Savaia e le’i faamanuiaina i faailoga aloaia e tolu, e maua uma a latou faailoga, e pei ona faamaonia mai e le Faatonusili o le Ofisa o Faatoaga i le Samoa News, le afioga Lealao M. Purcell.

 

E le na o Taumaloto na faasea i faaiuga a faamasino, ae na oo lava foi i le susuga a Vineula ma le tina ia Orepa Manu sa faaalia fo’i lo la le fiafia i le tulaga sa i ai le faaiuga a faamasino i le faamasinoina o le tauvaga.

 

O Vineula na tauva i le taro Mumu, ae o Orepa na tauva i le taro Uliuli atoa ai ma ana fualaau’aina, ma e leai ma se isi o i laua na faamanuiaina i se faailoga faapitoa, e ui sa la taua le lapopo’a ma le tetele o la talo na ave i le tauvaga.

 

“Ou te faaaloalo tele o le faigamalo ma le faamoemoe mo le aufai faatoaga, pau lo’u faanoanoaga, o tagata sa latou faamasinoina lenei faamoemoe, pe malamalama i mea tau faatoaga, afai ua le maua e a’u taro le tulaga muamua, ae se’i tulaga lua fo’i pe tolu, a’o lenei e misi atoa se tulaga, ae fai o le lapopo’a o a’u talo ae toe mamafa fo’i,” o le faasea lea a le susuga a Vineula.

 

Na taua e Orepa e faapea, “e ui e maualuga lo’u ava i alii ma tamaitai sa fai ma faamasino o lenei tauvaga, ae o le mea moni lava, o nisi o i latou e leai so latou agavaa i tulaga tau faatoaga, lea la ua amata ou faasea nisi o le aufai faatoaga e pei o a’u nei, i faaiuga ma auala na faavae ai faaiuga, ma ua fesiligia ai le faamasino o le Ofisa o Faatoaga i le faatautaiga o lenei faamoemoe taua.”

 

Sa fautuaina e nisi o le aufaigaluega a le Ofisa o Faatoaga nisi o le aufai faatoaga sa faasea, ina ia aga’i sa’o loa i le alii Faatonusili latou te feutaga’i, ina ua paso sui o le Ofisa e tau faamalamalama le mataupu i nisi o le aufai faatoaga.

 

Ina ua fesiligia le afioga Lealao e tusa ai o faasea a le aufai faatoaga, sa ia faamalulu ai i fai faatoaga uma na aafia o latou finagalo i faaiuga o le tauvaga, ae o le a vaavaai i faaiuga a faamasino ona toe maua lea o se latou feiloaiga ma nisi o le aufai faatoaga o lo o aafia.

 

“O lea ua maea ona matou feutaga’i ma nisi o le aufai faatoaga o lo o faasea, pau la’u fautuaga ua avatu i ai, ia oo atu uma i le Ofisa i Tafuna i le aso Tofi ma le aso Faraile o le vaiaso fou matou te talanoa ai, ae se’i muamua ona ou siakiina pepa ma faamaumauga a faamasino, i auala na faavae ai i luga a latou faaiuga, ou te le manatu fo’i e faaleaoga se galuega a se tasi, ou te alofa fo’i i le tautiga a le aufai faatoaga, ae ou te talitonuina fo’i le galuega sa alo atu i ai faamasino,” o le saunoaga lea a Lealao.

 

E leai ma se sui o le Ofisa o Faatoaga na avea ma faamasino i lenei faamoemoe, ae o sui mai ofisa eseese o le malo e aofia ai ma nisi o Faatonusili, na filifilia e avea ma faamasino i vaega taitasi.

 

E ui i le faasea ai o nisi o le aufai faatoaga, peitai e le’i faapena lagona o le susuga ia Iosefa Sakopo o Leone, ina ua faamanuiaina o ia i le tauvaga o taro Mumu, ina ua ia maua le tulaga lua.

 

“O se fiafiaga ia te a’u le faamanuiaina o a’u taro na aumai i lenei tauvaga, o se auala fo’i lea e unaia ai lo’u nei tagata ina ia toaga pea e toto le faatoaga e tausi ai le aiga ma tautua ai le atunuu i auala faapenei,” o le saunoaga fiafia lea a Iosefa.

 

O fai faatoaga uma lava sa lesitala mo lenei faamoemoe, o le a maua uma a latou faailoga faapitoa mai le Ofisa o Faatoaga, e pei ona faalauiloa e se sui o le Ofisa o Faatoaga i le taimi na tapunia aloaia ai lenei faamoemoe, sei vagana ai i latou ua lautogia i faailoga faapitoa e amata mai i le tulaga muamua, lua ma le tolu o vaega taitasi, o i latou ia o le a maua faailoga faapitoa o le tauvaga.

 

O le aso Tofi ma le aso Faraile o le vaiaso fou lea ua faatulaga e tufatufaina ai faailoga mo le aufai faatoaga a le atunuu, i le nofoaga autu o le Ofisa o Faatoaga i Tafuna.