O le fa’aiuga a le fa’amasinoga maualuga e pei ona tu’uina atu i le taeao ananafi, e fa’asala ai le ali’i o Joe Togitogi i le toese i Tafuna mo le umi e 5 tausaga, na momoli fa’atasi atu ai ma se feau i lenei ali’i talavou, ua uma avanoa sa tu’uina atu e le fa’amasinoga maualuga ia te ia, ona e foliga mai sa tu’u avanoa le fa’amasinoga ia te ia ae o lo o fa’aauau pea ona ia soli le tulafono.

O le ta’usala ai o Togitogi i le solitulafono mamafa o le fa’aoolima i le tulaga lua, i le mae’a ai lea o sana fa’amasinoga iloilo sa fa’atautaia e le Laulau o ali’i fa’amasino, na tula’i mai ai loa i fa’amaumauga a le fa’amasinoga, o le fa’alua ai lea ona ta’usala o ia i luma o le fa’amasinoga maualuga i le moliaga o le faaoolima, e ese mai ai i solitulafono o le faatupu vevesi i nofoaga faitele lea fo’i ua fa’alua ona ta’usala ai o ia e le fa’amasinoga fa’aitumalo.

O le mataupu fou lea ua faasala ai Togitogi e le fa’amasinoga ananafi, na afua mai i le fa’alavelave lea na ia fa’ao’o ai manu’a tuga i le ali’i o Andy Fruean o Nu’uuli i ni nai tausaga ua mavae ai.

E le i mafai ona auai le ali’i o Fruean i le taimi na lau ai le fa’asalaga a Togitogi i le taeao ananafi, ona o lo o i ai nei o ia i le fa’atinoina o lana tautoga i totonu o vaega ‘au a le malo tele, peita’i na taua e lona tina i sana molimau i luma o le fa’amasinoga ananafi e fa’apea, e ui i le matuia o le gaioiga sa faia e le ua molia, ae ua loto tasi uma lo latou aiga e fa’amagalo ia Togitogi, fa’atasi ai ma le latou faanaunauga ina ia manuia lona lumana’i.

Ina ua maua le avanoa e faia ai sana faamatalaga mulimuli ao le’i tu’uina atu lana fa’asalaga, na fa’aaoga ai e Togitogi le avanoa e fa’atoese ai ia Fruean ma lona aiga e tusa ai o lana solitulafono sa faia.

Sa ia fa’atoese fo’i i le fa’amasinoga i lona le usitaia o poloaiga sa tu’uina atu ia te ia, fa’atasi ai ma lana fa’atamalaga, sa ia taumafai lava e tausisi i poloaiga ma avea o ia o se tama talavou lelei, peita’i ua malosi fa’aosoosoga a le tiapolo ma i’u ina to’ilalo ai.

Na fa’ai’u le fa’amatalaga a Togitogi i lona talosagaina lea o le fa’amasinoga mo se isi avanoa mo ia.

E lei manatu le loia a Togitogi ia Michael White e finau i le fa’amasinoga mo se isi avanoa mo lenei ali’i talavou, ae na taua e le loia a le malo ia Tyler Ganzel e fa’apea, talu ai  le matuia o le gaioiga sa faia e le ua molia, ma mafua ai ona oo manu’a tuga ia Fruean e aofia ai lona auvae sa gau, aemaise ai o le fa’atele ona ta’usala o ia i solitulafono eseese, na talosagaina ai loa e le itu a le malo le fa’amasinoga ina ia fa’asala Togitogi i le fa’asalaga pito mamafa o lo o fa’atulaga mai e le tulafono mo le solitulafono o le faaoolima i le tulaga lua, tusa lea e 5 tausaga.

E lei umi ona malolo le fa’amasinoga mo le iloiloina o se fa’asalaga mo Togitogi, ae toe taliu mai loa ali’i fa’maasino ma fa’alauiloa loa la latou fa’asalaga mo le ua molia, ina ia fa’asala o ia i le toese mo le umi e 5 tausaga.

O le fa’asalaga fa’a falepuipui a Togitogi e 5 tausaga, o le a fa’atoa tuli pe a mae’a ona tuli isi ana fa’asalaga o lo o tuli i le taimi nei.