O le toe meli la’upases na asia Amerika Samoa i lenei tausaga ma o lea fo'i fa'atoa afea le teritori, o le "Mariner", lea sa taunu’u i fanua i le taeao o le aso Lulu.

O se afea o le teritori o se tulaga fuafua lea i le ali'i kapeteni ia Felice Patruno ma lana auva'a e 435 o lo'o galulue ai. E tusa i le 700 le pasese a le meli.

"O lea fa'ato'a ou afea lenei o lou malo, ae le o se mea e toe motu, e matagofie ma lauusiusi ou laufanua, e fa'ailoa ai le lauolaola o ou tagatanu'u i le manuia ma e ola fiafia fo'i lau aganu'u,” o se tala lea a le ali'i kapeteni ina ua tau’u le meli, ae o sisiva ma pepese le autalavou a Lepua Metotisi i luga o le uafu i Fagatogo.

Na feiloa'i fiafia Patruno ma le afioga i le Lutena Kovana ia Lemanu Peleti Mauga ma le faletua fa'atasi ai ma le Taitaifono o le Komiti Fa'afoe o le vaega o Turisi ia Roy J.D. Hall, le Tausala o Amerika Samoa ia Annellise Sword, ma nisi o sui o le malo sa auai i se sauniga i luga o le meli, e alo’aia le taimi muamua lenei ua afea ai e le meli le teritori.

"O le a i ai le avanoa o lenei ata ua taua'aoina e le tou Malo mo le Mariner, aua e le toe motusia le matou toe afea o le tou malo matagofie ma le tausa'afia i tausaga ta'itasi,” o se tala lea a le ali’i kapiteni.

“O le mea fo'i e fa'amaonia ai la'u lea tala, e ui lava ina fa'ailo mai o lenei le vaitausaga o afa ma matagi malolosi iinei, ae le tu'u ai le matou o mai pea e fia o'o mai i Pago Pago, o se taulaga matagofie ma le saogalemu lenei,” o a Patruno lea.

O le mea alofa a Amerika Samoa mo le ali’i kapiteni o le tanoa ‘ava, lea a tau aaoina atu e Lemanu. Sa tuuina atu e Patruno se mea alofa ia Lemanu mo Amerika Samoa.

E le'i gata ai iina ae sa taua'aoina fo'i e Hall le fa'ailo mai le Vaega o Turisi mo le va'a, ia manatua ai, ia toe afea fo'i Pago Pago i nisi a latou malaga i le lumana'i.

O meaalofa mai le Vaega o Turisi e aofia ai pepa faailo o malaga asiasi  ma nofoaga e matagofie i sau maimoaga i Amerika Samoa ae maise o a tatou measina i o tatou laufanua, ma nisi fo'i o fa'ailo au lauiloa ai Amerika Samoa, sa taua'aoina atu e Sword i le ali'i kapeteni.

Na vala'aulia le auaiasi uma a Amerika Samoa i le malu taeao i le fale'aiga matagofie ole va'a i lona fogafale lona 11 ma na talia ma le fiafia lea fo'i vala'aulia ma sa maua fo'i se taimi e maimoa ai i nisi o mata'aga i luga o le "Marina."

O lona fogafale 12, o lo'o i ai uma tapenaga mo so'o se ta'aloga e fia ta'alo ai se tasi ae maise i masini eseese mo ta'aloga fa'aeletronisi. O le fogafale fo'i lea o lo'o i ai ma le vai taele ma le sauna e aoga tele mo tagata e fa'amalosia atili ai le tino.

O le Ofisa o le Foma'i ma isi fale'aiga i le potu lona ono, ae o le fogafale 5 e mafai ai ona ulufafo mai ma siakia fo'i ou pepa fa'amaonia ma tuua ai le va'a, pe ulufale atu ai fo'i.

I se tala mai a Vaito'a Hans Langkilde, le sui faatonu o le vaega o Turisi, e tusa ai o le taumafaiga a le Turisi i lenei vaitau, “ona o lo'o malaga i fafo le faatonu ia  David Vaiafe, o lea ua ou tu ai i lenei taeao e fa'afoe le vaega a le Turisi. E fa'afetaia ai le galulue felagolagoa'i ma le Faatou o Uafu ma Taulaga Taimalelagi Claire Poumele, fa'apea ma Uta Tagoilelagi o le Arts Council mo le latou fa'asologa mai o aufa'afiafia mo le faamoemoe i so'o se meli e fa'ato'ai mai i fanua."

"Ona o le toe meli lenei o le tausaga, fa'afetai ua fa'afiafiaina le atunu'u ona o le masa'a mai fo'i o se oa mai nei pasese e fa'atau mo i latou e ala i fa'atauga. Tau ina ia tumau pea lo tatou fiafia e faia le auaunaga, e tauleleia ai fo'i le tatou atunu'u,” o se tala faaopoopo lea a Vaito’a.

Ina ua fesiligia se tasi o tina sa fa'atuina lana pisinisi lavalava i le maketi i luga o le uafu, pe a mai sana fa'atauga ae fa'ailoa mai, "Manaia lava le pasese a si va'a, o loo fa'atau lava latou, ai ona o le kerisimasi foi au tatau ona faia ni a latou meaalofa. O ofu elei lava lea e alumia.”

I le itula e 4:00 i le afiafi sa tuua ai e le Marina le teritori ma folau atu i Fiti.