O le po o le aso Gafua o le vaiaso fou lea ua faamoemoe e tuua ai e le afioga i le tama'ita'i faipule fa'aolioli mo le laumua i Uosigitone, le tofa ia Aumua Amata ma lana ta'ita'i komiti, le afioga i le Matua ia Pulu Ae Ae Jr le atunu'u, mo le vaega muamua o le la galuega i le konekeresi.

Na taua e le matua ia Pulu i le Samoa News e fa'apea, o le la malaga ma Aumua i le vaiaso fou, e mafua mai i se fonotaga faanatinati a le vaega fa'aupufai o le "Republican Party" lea ua to'atele ona sui ua manumalo mai i setete o le malo tele o Amerika.

Saunoa le matua ia Pulu e fa'apea, o le la malaga ma Aumua, e le gata o lo o fa'atupe uma mai e le konekeresi, ae o se avanoa lelei fo'i lea e feiloa'i atu ai i isi sui o le konekeresi e aofia ai ma le peresetene o le Iunaite Setete ia Barack Obama.

Na ia faafetaia le atunuu e tusa ai o le lagolagoina o Aumua, faatasi ai ma lana talosaga ina ia tutu fa'atasi le atunu'u e lagolago Aumua mo le nofoa i Uosigitone.

"O mai tatou tutu fa'atasi e lagolago Aumua, o le tatou malo e fau fa'atasi, e le mafai fo'i ona manuia le galuega a Aumua pe afai e le lagolago le atunu'u atoa", o se vaega lea o le saunoaga a Pulu.

Sa ia fautuaina fo'i le Fono Faitulafono ina ia galulue fa'atasi ma Aumua i so o se vaega e manuia ai Tutuila ma Manu'a, ae aua le faasea pe afai e faaleo finagalo o le atunu'u.

"E le leaga le muimui o tagata, afai fo'i e faasea le atunu'u, ta'ita'i o le fono, aua tou te fa'asea, ae tatau ona outou silafia o le aia tatau lena a tagata ta'ito'atasi e fa'aleo ai o latou finagalo i mea e tutupu i le atunu'u", o le isi lea saunaoga a Pulu.

Na faailoa foi e Pulu i sui uma o le komiti faapea ai i latou na lagolagoina le fa'amoemoe a Aumua, o lo o taumafai pea e saili se nofoaga e fa'atu ai le Ofisa autu a Aumua i le atunu'u, ona ua i ai le manatu e le toe faaaogaina le nofoaga tuai o lo o i ai le ofisa o Faleomavaega i le taimi nei e avea ma ofisa a Aumua.

"O lea ua amata la tatou galuega, e manaomia fo'i lo tatou tutu fa'atasi e tautua le atunu'u, aemaise ai o le tatou fesoasoani ia Aumua, ina ia manuia lana galuega i le isi lua tausaga o lo o lumana'i nei", o le saunoaga fa'ai'u lea a Pulu.