Ads by Google Ads by Google

Ulua’i pepe o le Kerisimasi

O le ulua’i pepe o le Aso Kerisimasi na te’a nei, i le falema’i a le LBJ, e na o le alii o McMarcel Torres, lea na fanau mai i ona matua o Ralph ma Buenafe Torres o le afioaga o Tafuna.

O le itula e 9:35 i le taeao ananafi, aso Lua, 25 Tesema na faamaonia mai e le LBJ na taunuu mai ai le alii o Mc, o le tama lona lua lea a Ralph ma Buenafe o ni tagatanuu o Filipaina.

O le alii foma’i ia Dr. Frangel Rene ma lana aufaigaluega e toalua o Maria Sikat (RN) ma Peggy Uikirifi (CRN) na tiute i le taimi tonu na fanau ai le alii o Mc, ma o se pepe malosi ma aulelei ma e 6 pauna ma le 13 aunese le mamafa.

Na taua e Dr. Frangel e faapea, e leai se ma’i na auina atu i le potu fanau i le po atoa o le kerisimasi, sei vagana ai lava le tina o Buenafe lea na faatoa auina atu i le taeao ananafi.

Na vaaia le matuai fiafia o le alii o Ralph ina ua fanau lona atalii i le aso tonu o le Kerisimasi.

Sa ia taua lona te’i tele atoa ai ma lona fiafia e leai se mea e gata mai ai, ina ua faatiga lona toalua i le taeao tonu lava o le Kerisimasi, ma la faatopetope atu ai loa i le falemai.

O Ralph ma Buenafe e toalua le la fanau, o tama uma, o le isi ua 7 tausaga le matua atoa ai ma Mc lea faatoa soifua mai i lenei lalolagi.

O Ralph, o se alii e galue i le fai pepa malaga o le Mabuhay Travel i Nuuuli, ae o lona toalua o se tina tausi aiga.

O se Kerisimasi ese lenei ina ua toatasi le pepe na fanau mai ai. O le Kerisimasi o le 2011 sa fananau ai pepe e toatolu, e toalua tama ae tasi le teine.