Inked: a fa’asamoa, o le lama i La’ei Samoa: a’o le vaitusi mo lae’i papalagi fa’aneionapo. Peita’i, o le uiga tonu o le fa’aaliga, “Ia fa’aalia lou La’ei Samoa moni!”

Mai faiva fa’atufuga ta tatau a Samoa o suli o le Auaiga Sa Suluape i Samoa, ua mafai ai ona tu’ufa’atasia nisi o la’ei samoa moni mo le fa’aaliga tele sa faia i Honolulu le a’ai o le Setete o Hawaii, lea na fa’ataunu’uina ia Tesema 2011. O lea fo’i fa’aaliga, ua i ai le naunauta’iga o le Faletuiga e toe fa’atautaia fo’i i Kalefonia i se nofoaga o le a fa’alauiloa mulimuli mai i le vaitau Taumafanafana i le tu’uaga fo’i o a’oga.

O tufuga na taina ma mamanu la’ei samoa nei, e to’atolu:Su’a Suluape Alaiva’a Petelo, Su’a Peter Suluape ma Su’a Suluape Tau Ah Keni. O a latou galuega foi ua fa’aalia i le ulua’i fa’aaliga o Mamanu La’ei Samoa [Inked] i le Waterfront Aloha Tower i Honolulu.

O le afuaga tonu o le fa’aaliga lea, ina ia mafai ona fa’aalia galuega fa’atufuga Ta Tatau po’o La’ei Samoa a nei tufuga iloga o Samoa i lea fo’i a’ai ta’uta’ua o le lalolagi. I le lotoifale o Hawaii lava ia, e i ai fo’i a latou mananu taua e fa’ailo ai le latou aganu’u ma a latou agaifanua, e pei lava o le Malofie a Samoa.

I le malo o Hawaii ua fa’ailoa mai e ala i fa’amaumauga i tusi tusia, e tusa ma le 78% o le faitau aofa’i o tagata e toto Hawaii ua mae’a taina latou tatau, ma e matua mausali ai o latou talitonuga ma lagomau ai o latou lagona fa’a-Hawaii i le latou aganu’u. E i ai afuaga o latou mamanu ma e tautoto fo’i nisi ituaiga o mamalu i auaiga tautupu ma tamali’i o lea malo.

Ua le gata la i mamanu a lea malo le fa’aaliga, ae ua silisili ona fa’aeaina mamanu a Samoa, ina ia laeia e ana tama fanau i lotoifale o isi atunu’u e ‘ese atu nai lo Samoa. Ua fa’aalia fo’i la manau mai Tonga, Hawaii, Tahiti ma isi malo e pei o Aotearoa Niu Sila.

I le aofia sa auai, na fa’atumulia i so’o se tagatanu’u, ma ona o le nofoaga sa faia ai lea fa’aaliga e tali tutusa lava ma le Fa’atagata o le Sa’olotoga i Niu Ioka, [Statue of Liberty], e fa’afeiloa’ia so’o se tasi i lea Waterfront i Honolulu mai so’o se atunu’u, ma ua avea ai lea fa’aaliga o se mea sili ona mata’ina i le taimi na fa’atautaia ai e le Faletuiga.

O malofie na fa’aalia e aofia ai le “Tatau” a Soga’imiti, “Malu” a tama’ita’i, ma sa taualugaina lea fa’aaliga tele i le Taualuga na sausaunoa ai le Taupou mai le Faletuiga ma mauluulu ma isi siva samoa sa fa’atinoina e le au fa’afiafia a le Faletuiga “Mitamitaga o Samoa,” lea e ta’ita’ia le tama’ita’i o Lorita Achica mai Utulei Amerika Samoa ma Vaimoso, Samoa.

E tele nisi o pisinisi e fa’atautaia e nisi o alo ma tama fanau a Samoa i Hawaii sa sapaia lea fa’amoemoe, sa latou fa’aalia fo’i a latou mamanu samoa e ala i le fa’aaliga lea. O La’ei Samoa e ala i lavalava ua mae’a lolomia ai mamanu Samoa moni, o i si ia oloa sa fa’aalia.

O le kamupani a Lotonu’u Samoa ma LaLaLove It Designs; Wadalife! ma Kokomoni Shirt Kamupani,

FSF Designs (Fa’aseila Vaela’a Fruean), Missing Polynesia a le tama’ita’i o Meilin Vitale Vae ma le Masina Imports e fa’afoea e Adriana Fuamatu-Ma’afala, ma le Faleoloa Ofu a tagata Samoa i Hawaii, na aofia fa’atasi i le to’a 11 o i latou sa fa’aalia a latou oloa i lea fa’aaliga tele.

O misiatu o mamanu eseese o le Tatau,  Selah, Tapu Clothing & Tattoo, The Mighty Eighty: Eight, Limited Addiction and Hawaii’s Finest o i  latou fo’i ia ma latou oloa samoa sa fa’aaoga i le fa’aaliga. Peita’i, e i ai nisi pisinisi lauiloa lava a alo o Samoa sa le gafatia ona fa’aalia latou oloa ona o fa’alavelave  le ma’alofia.

O tama’ita’i Faletuiga na fa’aalia latou malu i le fa’aaliga lea, e aofia ai Moana Achica Manuo, INKED Sui Fa’atonu Sina Thomsen ma Valana Manuma. O Soga’imiti na fa’aalia latou tatau i le laina o fa’aaliga o Mamanu La’ei Samoa sa aofia ai Vili Pa’ama, Armand Abero, Ira Uiagalelei, Mikaele Oloa, Pogi Tevaga ma Ron Tominiko. O sui na fa’afiafia i le Mitamitaga O Samoa na latou sisiva ai i le siva “O le Tatau” ae o le Susuga Manuo, o se alo o Samoa na soifua ane i Hawaii, na ia fa’aumaina lea fa’aaliga i lona toe peseina lea o le pese a Mikaele, Felise: E lo’u Loto!”

Ua tula’i mai fo’i le Tatau Brand ma Selah International e va’ava’alua ma le Faletuiga e toe fa’atulaga le isi latou fa’aaliga i le tausaga 2012 i Honolulu lava.

O se fa’aaliga mai a le Faletuiga, e tusa ma le lua masina o taumafai i latou e fa’atulaga ma fuafua tatau lelei le latou ulua’i fa’aaliga lenei ua mae’a nei. E ui ina tele na’ua fa’afitauli, ae fa’afetai ua pule alofa le Atua e fa’ataunu’u le fa’amoemoe sa fau ao fau po.”

O nei fa’aaliga uma, ua mafai ona fa’atautaia e tomua mai i le fa’aaliga tele o le 5th International Samoan Tatau Festival i le masina o Me 30, se’ia o’o ia Iuni 4, 2012 i Apia Samoa.

saunia: Leua Aiono Frost