AVE LE FA’AALOALO I LE TAUSALA O AMERIKA SAMOA

E le o nofo lelei i le mafaufau o si Fafige Faikakala le mataupu lea ua amata fo’i ona toe alia’e mai i luga, i le tu’u fesili lea o le to’atele po o ai tonu lava e tatau ona palua le ‘ava i soo se taimi e feiloa’i ai le faigamalo a Tutuila ma Manu’a ma malo asiasi mai fafo, aemaise lava ta’ita’i o malo e pei o Samoa atoa ai ma sui o le Iunaite Setete. O le itu e sili ona ata ee ai le Fafige Faikakala, ua fai se umi o fai finauga o le mataupu lenei i le va o le Asosi a le MASI lea o lo o faatautaia tauvaga e saili ai se tausala o le atunu’u, ma le Ofisa o Mataupu Tau Samoa o lo o fai ma fa’alavelave i le mataupu lenei.

Te’i si Fafige Faikakala ina ua text atu le isi ana uo loomatua ma fai mai, “eke iloa oe sis, fa’afekai i le alii kovana ma laga saugoaga lea na faasalalau i le Samoa News i le vaiaso legei, lea ua ia faamagigo mai ai, o le Kausala lava a le akuguu e kakau ga ia palua le ‘ava i soo se kaimi e feiloa’i ai le malo ma ta’ita’i malaga asiasi mai fafo, ae le kakau lava ga koe kago i ai se isi kaupou”. Fesili atu loa le Fafige Faikakala i lana uo, “ae faafefea la le taimi e feavea’i ai le Tausala a le atunu’u, e tatau fo’i ona fa’afeao fa’alelei”, te’i le Fafige Faikakala i le toe oso mai o lana uo, “e ke le’i faalogo lea fo’i ua fai mai le ali’i kovana, e kakau fo’i oga i ai se ka’avale faapikoa e fa’afeao ai le Kausala i soo se saugiga a le malo, pei fo’i oga fa’afeao o le kovana ma le lukena kovana, ma’imau e pe ana oo mai gei fa’aeaea o oka koe laikiki, semagu ou ke koso oso sa’o lava i le isi kauvaga Miss lea o le a sosoo mai gei”.

Tau le mafai ona taofi le ata ee a le Fafige Faikakala ma toe tali atu i lana uo loomatua lea e fa’apea, “a fai aku le ma’agumigumi o ou lima e ke le koe aoga i se kauvaga ae …..” malo le eva.

ATUNU’U FA’AMALIE GATA

Fa’alologo ma le toto’a taliga lautetele o le Fafige Faikakala i le isi taeao ao nofonofo i le falema’i, i le muimuiga a isi foma’i e to’alua e fa’atatau i le faigata lea ona fa’amalie o lagona o le ni isi o le atunu’u, aemaise lava i le taimi e silia ai ma le itula o tau fa’atali se foma’i e vaaia latou.

Fai mai le isi teine foma’i i lana tomumu, “maimau pe aga iloa e kagaka le faigaka o le kakou galuega, a ea? e kiga oga vaivai ae galulue lava iga ia mafai oga kogafiki uma lakou, ae o le mea lea e i ai, si kama’i kuai lava fai kio, paga le faigaka o ga faamalie o kagaka” Momoo lava le loto o le Fafige Faikakala i talanoaga a nai teine foma’i ia e to’alua, ona ua ia iloa lelei, o ia le isi tagata e mafi tele i le muimui ma le fa’asea pe a tuai ona vaai le foma’i.

E le i toe fa’atali le Fafige Faikakala ae ua sosoo atu loa ma fai atu i tamaitai foma’i ia e to’alua, “vaai oulua, pau lava le mea e fai o le ogosa’i, ia lua ogosa’i fo’i pei o le ogosa’i a Iopu”. Te’i le Fafige Faikakala i le tomumu a le isi teine tausi ma’i ma fai mai, “E lelei Iopu e lei faia e gisi oga kala”

TO’ATELE LE AU FIA MATUTUA UA I AI NEI

Vaai ma le ofo si Fafige Faikakala i le to’atele o tagata e lei taitai agava’a i le polokalame a tagata matutua o le TAOA, ao lea na matua tumutumu i o i le Fale Laumei i le aso Lulu na te’a nei i le polokalame a tagata matutua, ma tau fai tofu le tagata ma lana ato meaalofa na alu ma ia. E tiga lava ona fai atu le isi toeaina matua i le isi ulugalii sa fai le la pea puletasi, “Sole, se’i vaai i le uliuli manaia o lou lau ao e lei taitai atoa sau 50 tausaga”, ae fai mai le tali a le ula lea, “Aua eke worry koeaiga, o kakou o le maka poko lava i le kaimi o meaai”. Talofa e, o le fautuaga a le Fafige Faikakala i le brother lea, “kuu laia e pisa ai foi”