Ads by Google Ads by Google

Uaealesi Mosooi a le FAFIGE FAIKAKALA

AISEA E FA'ATAUA AI LE MATAUPU I LE LADY NAOMI?

 

E le ma'i le fa'avesivesi lea ua tula'i mai i le mataupu e fa'atatau i le Lady Naomi ma le tuai lea ona kilia lana pasese i le vaiaso na te'a nei, e le gata ua talanoa ai le to'atele o le aufai tofa a le atunuu i le fa'atamala o le Ofisa o Femalagaaiga ma le fa'atinoina o a latou tiute, ae ua tofu atu nei le mataupu i luma o kama sasa'o, i le va o le Fono ma le Faigamalo.

 

Ata oono le Fafige Faikakala ina ua tofu atu i totonu o le Maketi i le isi taeao e fa'atau sana ipu vaisalo ae o lo o papa tutu'i mai luga o laulau i le to'atele o le au matutua, o lo o fefa'aali o latou finagalo i le mataupu lenei, ma le fesili na fa'atula'i e le isi fasi toea'e fai mai, "Aisea e fa'ataua ai fua le mataupu e fa'atatau i le Lady Naomi?". O le mea moni i le manatu o le Fafige Faikakala, e tatau lava ona fa'amuamua le va fealoa'i ma le ava fatafata i le va o Samoa e lua, aemaise ai, o le pasese o lo o malaga mai i vaiaso ta'itasi, o tupu ma tamali'i, o matua fo'i o isi fanau, e pei fo'i ona fa'apelepele o fanau a Amerika Samoa i a latou matua, e fa'apena fo'i ona amanaia e Amerika Samoa nai tama matutua mai Samoa.

 

Ata le Fafige Faikakala ina ua oso mai le tala a le isi ana uo toeaina fai mai, "Pau le mea lea ou te maga'o ai i le Loia Sili, ia fai saga fa'aiuga i le ali'i Ofisa Immigration lea ga le mafaufau ma palauvale i luga o le uafu i le aso lea". Aua le worry e maua lava le iuga o si ali'i lega i se kaimi o i luma.

 

O AI SA'O E FAIA FA'AIUGA O TAGI O PALOTA

 

Tau le maua se to'a o si Fafige Faikakala i le tau fai tatagi o lana telefoni i le vaiaso atoa lenei, i le to'atele o ana uo ma tagata e masani ai o lo o tu'u fesili i le mataupu o tagi o palota, po o ai tonu e faia fa'aiuga o ituaiga mataupu nei, pe afai o lea ua aumai le fa'aiuga a le fa'amasinoga, e leai se malosi o le fa'amasinoga e fesiligia ai fa'aiuga o le palota ua i ai. O le talitonuga o ni isi o uo a le Fafige Faikakala, e tasi lava le nofoaga e aumai ai fa'aiuga o soo se tagi i mataupu fa'apenei, o luma o e fa'amasinoga, ae afai o lea ua fai mai le fa'amasinoga, o le Maota o Sui e fa'aui i ai le tagi pe afai o lo o fesiligia le agava'a o se sui e nofoia le nofoa o se itumalo, ona lagona ai loa lea o le popole o le Fafige Faikakala, aua e foliga mai ua fefiloi faiga faapolokiki ma mataupu tau tulafono e manaomia le saili i ai o le mea moni. Pau le popolega ua tula'i mai, afai loa e ni ni fa'atasi mataupu faapenei ma le polokiki, o le mea o le a tula'i mai, o le a polokiki mea uma e o o lava i fa'aiuga a le fa'amasinoga.

 

FOFOGA FETALAI MA LONA SUI

 

Ata le fafige faikakala pe a mafaufau atu i le tausinioga lea o lo o faia i le taimi nei, o le tau sailia lea po o ai o le a avea ma Fofoga Fetalai o le maota o sui i le isi lua tausaga o lumana'i nei, atoa ai ma sona sui lagolago. O le mea moni, o lea ua toe manumalo mai le Fofoga Fetalai o lo o i ai nei, le tofa i le tau tootoo ia Savali Talavou Ale, ae ua le manuia taumafaiga a le Sui Fofoga Fetalai ia Talia Fa'afetai I'aulualo. Te'i le fafige faikakala ina ua tatala atu lana imeli i le isi taeao ae vaai atu e to'atolu ana uo o lo o fesili atu ia te ia i sona manatu, po o ai o le a manumalo i le sailiga o se fofoga fetalai. Fai mai le manatu o le isi uo olomatua a le fafige faikakala, "o le tagata lava e mafiafia lana ato tupe, o ia lena e manumalo i le tofi", ae fai mai le isi ana uo toeaina, "o le faipule lava e pito sili ona alofagia, o ia lena e sola ma le tofi". Tailo i ai i ni finagalo a le aufaitau, ae o le talitonuga o le fafige faikakala, ia fili lava i le tai se tautai e i ai le agava'a na te taitaia le maota o le atunuu mo le isi lua tausaga. O Samoa e fa'avae i le Atua, e tautai fo'i le Atua i soo sana fa'aiuga e fai, pau le fautuaga, fuafua mai o lea fo'i e fuafua atu.