“MANA’O I LE UFI AE FEFE I LE PAPA”

Te’i le Fafige Faikakala ina ua siaki atu lana imeli i le afiafi ananafi, ae oso mai ai se imeli e fa’aulutala fa’apea, “Mana’o i le ufi ae fefe i le Papa”. Tei le Fafige Faikakala i le tatala atu o le imeli, o loo saini ai le igoa o le isi ana uo toeaina sa avea fo’i ma Senatoa i tausaga ua mavae, ae sa fa’alogologo i le talanoaga a le Senate ma le Faipule mai Uosigitone i le taeao ananafi, e fa’atatau i le mataupu o le siitaga o totogi amata. Fai mai upu o le imeli, “Vaai oe Fafige Faikakala, e tu’u fesili pea lo’u mafaufau i le tele o taimi e saunoa ai ta’ita’i o le malo e fa’atatau lea ona sii totogi amata i le atunu’u, ona ua taugata le tau o le soifuaga, ae mulimuli mai ai i tua ma le isi fa’aupuga, e manana’o e sii totogi amata, ae popole ina ne’i tapunia atu ai kamupani i’a. Silasila oe Fafige Faikakala, e fa’afefea ona tapuni kamupani i’a i le nei .50sene e sii i totogi amata o nai tagata o loo maluluina i le safuina o le i’a i le vaveao ma le po, ae o le paketi a le Fono Faitulafono e fa’atupe uma mai le 100% i tupe lotoifale, fa’atasi ai ma le mau totogi e silia i le ta’i $30,000 o loo maua e le isi vaega e to’atele, ae leai ma ni latou galuega o faia, e na o le usu atu lava ma inu-ti i le Fale Fono, ona taape fo’i lea i o latou aiga pe afai e mae’a tauaofiaga a le Fono. I lo’u manatu, e foliga mai i le upu lea o loo fa’alele e ta’ita’i o le atunu’u e aofia ai le Kovana, Fono Faitulafono ma le Faipule i le Konekeresi, ua le ese ma le tagata ua mana’o i le ufi, ae fefe e a’e i le Papa o loo sosolo ai le ufi. O le a sau fautuaga mo a’u e uiga i lenei mataupu. Soifua, o Alu i ai ae aua le fefe.” Tago atu loa le Fafige Faikakala tusi lana tama’i tusi e tali ai le imeli a ‘Alu i ai ae aua le fefe’ ma fa’apea atu loa i ai. “Vaai oe Alu i ai ae aua le fefe, atonu e ese fo’i le vaai a ta’ita’i o le atunu’u i le mataupu e fa’atatau i totogi amata, ona o se mataupu e ma’ale’ale ma faigata, o loo naunau i latou e sii totogi, ae o loo popole fo’i ina ne’i afaina ai le tamaoaiga, tasi le mea e tatou faia, tuu pea se avanoa i ta’ita’i o le malo e fai ai a latou fa’aiuga, pau la’u fautuaga ia te oe, alu pea lava oe pe afai o lena e te alu e aunoa ma le fefe, aua o lou iuga fo’i lena, o le su’e atu o oe ua e malepe. Tofa o Fafige Faikakala.”

GUGULU TAGATA FAIGALUEGA FOLAFOLAGA A LE KAMUPANI I’A

Fa’amatala e le isi uo safu i’a a le Fafige Faikakala le gugulu o nai Fafine safu i’a i folafolaga ia ua fa’alele e le pulega a le kamupani i’a a le StarKist i fafo, fai mai afai e oo atu i le ogatotonu o le masina e leai lava ni i’a e maua mai i va’a fagota mai fafo, o le a tapunia loa le tautua a le kamupani ma leiloloa ai le faitau selau ma selau o avanoa faigaluega. Tatagi le telefoni a le Fafige Faikakala, ae tago atu e tali, o le isi ana uo safu i’a o loo tagi atu i luga o le telefoni. Fesili le Fafige Faikakala, “Siaula, aisea ua e kagi loku loku ai fa’apega,” ae tali lana uo safu i’a, “Oi, eke le’i fa’alogo i le kala fa’agoagoa lea ua maua mai, fai mai a leai gi i’a i le ogakokogu o le masina loga uiga e kapugi le kamupani i’a,” o le tagi lea a le uo safu i’a a le Fafige Faikakala, “Awww, aisea la eke kagi ai fua ae le fiafia o le a maua ai ma siga malologa,” o le fika lea a le Fafige Faikakala, ae na toe oso mai lana uo safu i’a i luga o le telefoni ma fai mai, “Oi, ae a faafefea ga koe maua se isi a’u galuega, ma le isi mea, o lea fa’akoa ma masagi ma si a’u pe’u, o lea la e kau fa’amauku ma fuafuaga mo le lumaga’i,” o le tagi mai lea a le uo a le Fafige Faikakala i luga o le telefoni, ae na fa’amalosi atu ia i le Fafige Faikakala, “Se aua e ke kagi ae ogosa’i pei o le ogosa’i a Iopu,” ae na toe oso mai lana uo safu i’a, “Oi, e leai la, e lelei Iopu e le’i vaea mai saga galuega safu i’a pei o ‘au.”