POLOKALAME O LE OFF ISLAND REFERRAL

Na te’i si Fafige Faikakala ina ua tatagi lana telefoni feavea’i i le vaveao o le aso Lua na te’a nei, ae le’i taitai ona malamalama le taeao, ma le vaai atu, o si ana uo olomatua lea e le’i leva na maliu atu si ona to’alua lea oloo vili atu. E lei uma lelei atu le fa’a good morning a le Fafige Faikakala i lana uo, ae te’i i le fa’alogo atu, ua tagi masusu mai si ana uo olomatua i luga o le telefoni, ona taumafai loa lea o le Fafige Faikakala e fa’ato’ato’a si ana uo ma taumafai e fesili atu i ai pe i ai se mea ua tupu ua tagi lotulotu ai i lenei vaveao e le’i ta’itai, ae na te’i ina ua fai mai lana uo, “E ke iloa oe Fafige Faikakala, o lea e kaakia i o’u luma le gusi pepa sa kiliva mai e kama i le vaveao, lea ou ke faikau aku ai i le kala e fa’akakau i sui o le Komiti Fa’afoe a le Falema’i lea o loo agava’a i le polokalame fo’i lele e ave ai kagaka mama’i i fafo mo koga fikiga. Leikioa a maliu si o’u ko’alua, e kiga oga kalosaga aku i ai ua kigaiga si o’u ko’alua ua maga’omia le ave i Hawaii e kaoko ai fai mai e leai se kupe, a’o lele ua aliali i luga le maka’ukia o gei mea, e oo lava i le Kaikaifogo o le Komiti Fa’afoe ma loga sui o lea e agava’a uma i le polokalame. Eh, kaigoigo e, a mea ea se’i o aku ai i se isi kaimi ma feoki mai ai, aueeeee.” Taumafai atu lava si Fafige Faikakala e fa’ato’ato’a si ana uo olomatua i luga o le telefoni, ae ua atili ai lava ona tagi lotulotu le olomatua, fesili atu loa ma le Fafige Faikakala, “Se soia eke kagi, fa’agalo le koeaiga ua leva ga maliu, ae fa’afiafia lou mafaufau,” ae atili ai lava le tagi a le olomatua ma fai mai, “Aga kalia le kalosaga a si o’u ko’alua e ave ai i fafo e kaoko, faapegei o ma kaokooko ko’alua lava i luma ma faikau le ma gusipepa.” Te’i si olomatua loto mafatia i le pa o le ata a le Fafige Faikakala ma fai atu loa i ai, “O le mea kogu lava lega ua mafua ai oga e kagi, a ea, o le leai o se koeaiga eke lua kaokooko, a ea? Ia ogosa’i koeikiiki lava pasia le Same Sex Marriage oga kali loa lea o lou maga’o.”

LUMANA’I O LE TEUGATUPE A LE LITAEA

Sa na o le fa’alologo lava o taliga lautetele o si Fafige Faikakala ao sasa’a atu lagona le fiafia a le to’atele o tagata ua malolo litaea a le malo, i le tele lea o le latou popole i le saogalemu o le teugatupe a le Litaea, aemaise ai o le aga’i i le lumana’i, talu ona salalau ripoti e fa’atatau i le soona fa’aaoga le tatau o tupe e se tasi o tagata faigaluega a le Ofisa, e pei ona tu’uaia ai e sui o le Komiti Fa’afoe. Na taua e le isi uo olomatua a le Fafige Faikakala e fa’apea, “E ga o Amelika Samoa lava e fa’akaga oga aikalafu kupe o laga likaea, ae a vaai gei i isi sekeke o le malo kele, e le kukupu ai lava gi mea faapega.” Ae na oso mai le isi loomiti fa’atoa 3 masina talu ona maua lana siaki o le litaea fai mai, “Pau le iku lea ou ke popole ai, iga ge’i fa’alekogu age le keugatupe o le likaea a’o lea faakoa enjoy lo’u kaimi likaea.” E tusa ai ma tala na maua e le Fafige Faikakala i lana uaealesi mosooi, o lea ua talosagaina e le Komiti Faafoe o le Litaea le Komesina o Leoleo, ina ia faia se suesuega i le fa’aaoga le tatau e le Pulesili o le Ofisa o tupe, aemaise ai lava siaki sa totogi i le kamupani teu fale sa gafa ma le fa’amamaina o le fale o le Senitenari i Utulei, ae emo ane le ata o le siaki lea sa teu i le teugatupe a le Pulesili o le Ofisa, e le gata i lea, e leai se laisene pisinisi a le kamupani lea o loo taua sa totog aga’i i ai le siaki. O le fautuaga a le Fafige Faikakala i le au litaea uma a le atunuu, aemaise ai i latou ua foufou e litaea i se taimi e le o toe mamao, ave la outou fa’atuatuaga i le Komiti Fa’afoe ma le latou gaioiga lea ua amata ona fai, atonu e uma ane ua manino le mata o le vai, ma iloa tonu ai poo ai e sa’o nei mea.