Ads by Google Ads by Google

UAEALESI MOSOOI A LE FAFIGE FAIKAKALA

FIU TAU TULITULI LE AU FAI LOAN LAPOPO’A

 

Ata fa’amaga le Fafige Faikakala ina ua faitau atu i ripoti a le Faletupe o Atina’e a le malo lea ua tauaao atu i luma o le Fono Faitulafono, e fai lava si to’atele o le mamalu o le atunu’u sa fai a latou nonogatupe i le Faletupe i le tele o tausaga ua mavae, ae ua fiu le Faletupe e toe tulituli le au ula ia e toe totogi mai a latou aitalafu. Ae o le itu e pito sili ona ata ee ai i luga si Fafige Faikakala, o le to’atele o le au alii ia ua mumusu e toe totogi a latou nonogatupe, o loo feofeoa’i i ta’avale e muliga ai fo’i le uumi o container ta’i 40 futu ia e la’u mai i luga o va’a oloa. Taumafai le Fafige Faikakala e su’esu’e atili le aano moni o lenei mataupu, ae pe aisea fo’i ua mafua ai ona naunau le Fono Faitulafono e su’esu’e le mataupu i aitalafu a le Faletupe, ae maua ane le au o le paipa, e to’atele nai aiga lima vaivai o le atunu’u ua tele tausaga o taoto a latou talosaga mo ni nonogatupe laiti i le Faletupe, ae oo mai lava i le taimi nei e le o taliaina lava. Ae o le itu e pito sili ona mata’utia ai lenei mataupu, o nisi o le au alii ia ua mumusu e totogi a latou aitalafu tetele, o lo o avea ma totino o le Komiti Fa’afoe a le Faletupe i le taimi nei. Ua maua fo’i e le Fafige Faikakala fa’amatalaga mai le Ofisa o le Faletupe e fa’apea, a o atu a latou tagata faigaluega i fale o le au sifi e tulituli a latou aitalafu, ae ua lalafi ae fa’aoso mai iai a latou ta’ifau, o isi fo’i taimi ua pepelo nai fanau fai mai o loo malaga a latou matua i fafo, ae toe iloa mulimuli ane i le afiafi o loo fa’alue atu i a latou ta’avale maualuluga sa maua mai i nonogatupe ua mumusu e totogi.  O le fautuaga a le Fafige Faikakala ia te outou ia e feofeoa’i i ta’avale pei ni fautasi le uumi ae pei ni va’a meli le maualuluga le lapopo’a sa fa’atau mai i tupe o nonogatupe ia ua outou mumusu e toe totogi, fa’amolemole, totogi nei loa a outou aitalafu, e lelei lava lou fa’alue i le mea sa afu ai lou tino. Ha! Ha! Ha!, ae mo outou ia o loo avea ma totino o le Komiti Fa’afoe a le Faletupe ae o loo iai fo’i a outou nonogatupe, ia fai nei le mea amiotonu, fa’amavae mai le toe avea o oe ma sui o le komiti fa’afoe, ae alu e safu sau i’a ina ia maua mai ai sou totogi e toe totogi ai lau aitalafu. Ia outou silafia, e oona le afu o le atunu’u. Mafaufau te isi i ai.

 

FAI LE FAUTASI MA AVEGA MAMAFA I TOTONU O NUU

 

Momomo le loto ma tau pe le fatu o si Fafige Faikakala ina ua vili mai le isi ana uo toeaina matua ma tagi talatala mai i luga o le telefoni, e fa’atatau i faiga le alofa a le latou nu’u ua toe amata fo’i ona fai, i saoga meaai ma fa’asalaga tau tupe ao tapena ai le fautasi a le nu’u mo tuuga fautasi o lenei tausaga. Fai mai le uo toeaina a le Fafige Faikakala, e fai fo’i pulega a Saddam Hussein ua maliu e le maua faiga a nisi o matai o le latou nu’u lea ua fai nei, e aofia ai le fa’asala lea o oe i le $10 pe afai e te le auai i koleniga a le au va’a i afiafi, afai fo’i e te ma’i pe faigaluega fo’i, e tatau lava ona e fa’anoi i aso uma ina ia iloa ai o loo e ma’i. “O lea fo’i ua logo mai aiga uma o le nu’u, o le a toe auaua’i fo’i aiga e fafaga i le tausiaina o le au va’a, ae o mea ia e tatau lava ona tapena e le nu’u, aua o loo iai teugatupe a le nu’u o lo o i ai e fa’atino ai manaoga uma nei”. O le tagi talatala mai lea a le uo toeaina a le Fafige Faikakala. Fesili atu loa i ai le Fafige Faikakala pe i ai sana fautuaga e ave i le nu’u, ae atili ai ona tagi si toeaina ma fai mai, “O la’u fautuaga i matai o le nu’u lea ua taulamua i faiga le alofa nei, fai ia ma se alofa fa’amolemole, solo mua lava ia te outou e lei fai mea i le nu’u i tausaga ua mavae le fiafia e faaee nei mau avega mamafa i luga o tauau o le nu’u, ia avea la tatou fautasi o se mea e fiafia i ai le nu’u, ae aua le avea ma avega mamafa”.