Ads by Google Ads by Google

Uaealesi mosooi a le FAFIGE FAIKAKALA

“E SILI ATU I FAI FA’ATOAGA MAI ASIA TUPE NAI LO OLA O TAGATA”

 

O le mea moni lava i le fa’alogologo atu a le Fafige Faikakala i le tulaga mata’utia lea ua alia’e mai i fa’atoaga togalaau ‘aina a tagata Asia, e sili atu ona naunau ma popole tagata fai fa’atoaga Asia i le maua o le tupe nai lo le popole i le soifua ma ola o tagata Samoa.

 

E mafua lea tulaga ona ua manino i molimau mai sui o le Ofisa o Fa’atoaga a le malo sa tu’uina atu i luma o le Fono Faitulafono, ua manino ai le tapunia e le Ofisa o fa’atoaga a ni isi o tagata mai Asia, ina ua fa’amaonia i a latou suesuega sa faia, le fa’aaoga o otaota o manu (tulou) e fai ma fa’alelei eleele ina ia tupu vave ai togalaau’aina. E le ita le Fafige Faikakala i suiga ua vaaia i fa’atoaga atoa ai ma le auala o lo o fai e le aufai fa’atoaga mai Asia, ae ata le Fafige Faikakala i le popoto ma le atamamai o tagata Asia i auala e fa’avave tupu ai tino o togalaau ‘aina i le atunu’u.

 

Fai mai le tomumu a le isi toeaina fai fa’atoaga mai Asia ina ua fesiligia e le Fafige Faikakala, “Kasi fai fa’akoaga Asia, le iloa mea a fai, ko’akele kagaka Samoa faikio laiki kigo kukama ma kapisi, kasi koeaiga Asia fa’aaoga okaoka o magu e fa’alelei ai eleele ma fa’alapo’a kigo kukama, kasi loomakua Samoa faikio fai mai ua ofo i le kigo kukama ua pei se ogå kuava”. Kalofa e ia Samoa.

 

AMATA ONA TAUANAU LE POLOKIKI A AMERIKA SAMOA

 

Na fa’alologo ma le toto’a le Fafige Faikakala a’o fa’amatalaga e se tasi o ana sipai fa’alilolilo faiga mata’utia lea ua amata ona maitauina i le va nonofo o le faigamalo ma le Fono Faitulafono, aemaise lava i le tauanauina o tulafono o lo o lafo mai e le faigamalo i le fono e pasia atu ai, e pei o le tulafono e fa’avae ai e le malo se faletupe fou mo le atunu’u, ae toe mulimuli mai ai i tua ma le fa’atonuga a le ali’i kovana i sui o lana kapeneta, ina ia o e talatalanoa ma tauanau a latou faipule ma senatoa ina ia alolofa e fa’a vave pasia le tulafono.

 

Na taua e le uo sipai a le Fafige Faikakala e fa’apea, “o le uiga mogi lava o le mea lea ua amaka oga maikauiga i le va o le faigamalo ma le fogo faikulafogo e mafua mai i le makaupu mo se falekupe fou, e foliga mai ua amaka oga kauagau le polokiki, ae le o le mea kogu lea e kakau oga i ai, e kakau oga lafo mai e le faigamalo aga kulafogo i le fono, oga faasaga aku fo’i lea o le fogo e fa’akigo lau faku aiga kausi, o le su’esu’e, fesiligia ma sailiili le malo pe kalafeagai oga lakou fa’akaukaia se falekupe fou”.

 

O le fautuaga a le Fafige Faikakala i lana uo sipai lea, “koaga pea e vaavaai ma maka’iku faiga a le faigamalo ma le fono o lo o fai, ae ku’u pea le avagoa e fa’akaukai ai e le malo le falekupe fou e pei oga fa’alogo aku i ai, ua makua oi lava le akugu’u ua fia maua se isi falekupe fou.”

 

UA LE TOE FA’ALOGOINA LEO O LE AU FAILA LAFOGA I FAFO

 

E ese fo’i le mata’utia o le suiga lea ua i ai le au faila lafoga a le atunu’u i le taimi nei, talu lava ona salalau le tala e fa’atatau i le fafine Amerika Samoa o lo o loka e FBI i Alaska, ina ua maua lona faila fa’agaoi o lafoga a tagata Amerika Samoa i fafo, ua le toe fa’alogoina ai lava e le Fafige Faikakala ni talanoaga e fa’atatau i le failaina o lafoga i fafo.

 

O le vaitau lenei i tausaga ta’itasi, e le malolo ai fofoga o fafine i le pisi solo e saili po o ai le pisinisi faila lafoga e pito sili ona fa’atuatuaina ma vave i totonu o le atunu’u e faila ai a latou lafoga. Na taua e le isi uo safu i’a a le Fafige Faikakala e fa’apea, “afai o lo o mafai e Koma ma loga ko’alua oga faila le la lafoga i fafo ma fa’akau ai le la Misisupisi lagu egaega la le kami solo ai le la kama vae pi’o, e kakau fo’i la oga mafai ga faila le ma lafoga i fafo”, peita’i sa faufautua malie pea le Fafige Faikakala i lana uo, e soia le saafi i mea e le oo i ai lona malosi, ina ne’i toe u mulimuli mai ona i’u ia te ia ma lona aiga ona toe pagatia lea.

 

Fai mai le tomumu a le isi olomatua sa talanoa ma le Fafige Faikakala i luga o le pasi i le isi afiafi, “ua uma oga fai le ma kala ma koeaiga, e le koe faila iga le ma lafoga i fafo, iga ge’i ke’i ua maua oga fa’apea lea o le auloku, o kupe gaoi sa maua mai i le lafoga lea sa fa’akau ai le ma kama’i pasi pa’u fa lele o lo o felua’i i Aua, ae le iloa o gai kupe lava a si koeaiga sa fa’apukupuku mai laga fa’akoaga sa fai”. O le fautuaga a le Fafige Faikakala, afai loa ua mafua ona le toe fa’alogoina leo o le au faila lafoga ona ua fefefe i FBI, taofi nei loa ina ne’i e toe oso atu i luga o le fua, ae aliali ai loa ma le mataga.