TO’ATELE LE AU FAITIO I LE LUA O ASO MALOLO O LE LABOR DAY

Tau le maua se to’a o si fafine faikakala ina ua ia faalogo i le tala, e to’atele le mamalu o le atunu’u ua fa’aalia o latou lagona le fiafia fa’asaga i le faigamalo, i le avea o le aso Faraile na te’a nei na aso malolo lona lua mo le Labor Day, ma tapunia atu ai ma ofisa o le malo ae tele galuega ma fuafuaga o lo o fia faia mo le toe a’e atu o fanau i aoga, ae o lea lava ua mae’a ona fa’atulaga e le malo tele le aso 1 Setema 2014 e avea ma aso malo o le Labor Day. Na taua e le isi uo a le fafige faikakala e fa’apea, e le tatau i le faigamalo ona tupu lenei mea, o le alu o tupe a tagata totogi lafoga e totogi ai tagata faigaluega a malo, ae o fai a latou tafaoga ma tosoga maea i le paka, ae taatitia galuega e tatau ona fai mo le atunuu. Fai mai le tomumu a le isi toeaina e masani ma le fafige faikakala e fa’apea, “na kipi la’u lafoga e kokogi ai le kovana, lukena kovana ma isi kagaka faigaluega a le malo e o mai e kaukua le akuguu, ae le o le o e eva i le paka i kafuga”.

VAEGA KUPE FA’ALILOLILO I LE PAKEKI A LE MALO

Ata fa’amaga le fafige faikakala ao fa’amatala e le isi ana uo faatonusili le tupua lea ua mateia e le fono faitulafono, i vaega tupe o lo o foliga mai e faalilolilo i totonu o le paketi a le malo, atoa ai ma isi lava gaioiga sa i ai le manatu ailoga e maua, ae na te’i ina ua valaau iloiloga a matagaluega ae laga mai e faipule ma senatoa. O le itu la e malie ai i le faalogologo a si fafige faikakala, e oo lava i lana uo faatonusili lea sa ia taua fo’i lona te’i tele ina ua fesili atu faipule ma senatoa e fa’atatau i se vaega tupe o lo o i totonu o le tupe faasoasoa a lona ofisa mo le tausaga tupe fou 2015, e aunoa ma sona malamalama i ai i lea vaega tupe. Na motu faafuase’i le talanoaga a le fafige faikakala ma lana uo faatonusili ina ua musumusu atu le uo a le fafige faikakala i lona taliga, “o le fili lava o le kama o le maua”.

“FIAFIA E OLA AE FEFE E OTI”

E le iloa e le fafige faikakala pe ata pe tagi ina ua ia faalogo i le tele o faitioga faasaga i ni isi o le atunuu e aofia ai sui o le Fono, lea ua latou talosagaina se fuafuaga a le Soifua Maloloina e puipui ai le atunuu mai le faamai oti o le ‘Ebola’ lea o loo pipisi solo i Aferika i Matu. Fai mai le fika a le isi olomatua e masani ma le fafige faikakala i luga o le facebook, “o le mea lea i ai kagaka Samoa, e ese le kele o kala i guku ae oo mai loa faama’i oki faapegei, amaka loa oga make le faakuakua, e foliga mai e fiafia e ola ae fefe e oki”. Atonu e sa’o manatu o ni isi, peita’i i le talitonuga a le fafige faikakala, e sili lava le puipuia nai lo le togafitia. Fai aku ai fo’i.

E FIU LAVA LE OVERSTAYER E SOLA E MAUA LAVA

E foliga mai e le o uma lava le tuligasi’a i le va o le malo o Amerika Samoa ma tagata mai fafo ua Overstayer i le atunuu, ina ua manino e toatele naua tagata over stayer e lei lesitalaina i le polokalame o le Amnesty a le Kovana lea na maea i le masina o Aperila o le tausaga nei. Na tomumu le isi olomatua i le fafige faikakala ma fai i ai, “o le ko’akele o kagaka o lo o kaukua i le makou aiga o kagaka mai Savaii e leai gi pepa gofomau, ae ua silia i le ka’i 10 kausaga o gogofo i fagua o le aiga”. E foliga mai o le toatele o nai tagata overstayer o lo o taamimilo solo o lo o tele lo latou sao i totonu o aiga ma ni isi o afioaga, peitai o le itu e fia faailoa atu e le fafige faikakala, “o le kulafono lava o le kulafogo”, e kakau oga lelei gou ID e pei fo’i o le fafige faikakala, o lo o lelei loga ID e ka’i 6 kausaga ma fa’afou.

Feso’ota’i mai i le “fafigefaikakala@gmail.com” pe a e fia faikakala mai.