“UA SILI LE MANA’O O LE TINO NAI LO LE AIGA”

E fetaui lava le oo atu o si Fafige Faikakala i le vaega e fa’atali ai pasi i le maketi i Fagatogo i le taeao ananafi, ae fa’ai’ui’u loa ma le ote a le isi olomatua i se mafine ma fai i ai e fa’apea, “ ..se’i vaai ua sili aku ia ke oe le fa’akauguu o magaoga o lou kigo gai lo lou magaku alofa i lou aiga ma lau fagau ..” Na avea le te’i o le fa’alogo a le Fafige Faikakala ma itu na faapupu tetele ai loa ona taliga i lona fia iloaina o le ‘au o le paipa, ae ina ua manino le mata o le vai, na iloa mulimuli ane ai, o le olomatua lea sa ote i lana tama teine, e fai lona to’alua ma le fanau e to’a 4, ae pau lava le mea e fa’amuamua e le mafine lea i taimi uma e maua ai lana siaki, o le fa’amuamua lea o ana pepa sikaleti e lua, fa’atoa sosoo ai loa lea ma se meaai mo lana fanau. E fa’asaga atu le Fafige Faikakala i le isi tulimanu o le maketi, o loo tutu mai ai ana uo toeaiina e to’alua ma tali e i le mumugaveve a le olomatua ma lana tama. Fesili loa le Fafige Faikakakla, “Aisea e ke lua kali e ai,” ae tali le isi ana fasi toeaina fai mai, “Ua aia kele le olomakua, magakua fo’i, e pule lava le kama a le olomakua i laga mea e fai, o le ulaula fo’i, o le aia kakau lava lega a le kagaka, pe $8 le kau o le pepa sikaleki pe $100 fo’i, e oso lava le mea e le fa’asa’aga.” Pau le fautuaga a le Fafinge Faikakala i le au ulaula tapa’a, “fai fuafua e short lava le life lea tatou te ola ai.”

“AUA LE LAMU PULU I TOTONU O LE POTU FA’AMASINO”

Na tau le mautonu le mafaufau o le Fafige Faikakala i le taeao ananafi ao nofo i totonu o le potu fa’amasino, ina ua ia vaaia le vau solo e se fafine pe a ma le 35 tausaga le matua lona tino ma valusi lona ulu, ae o le tomumu ia o le gutu e le maomi, ina ua fa’atoa mae’a lava ona savali mai i ai le Masela o le fa’amasinoga ma se pepa ma fai i ai, “Kuu lau pulu kamu ga e lamu i luga o le pepa lea e fa’asa le lamu pulu i kokogu o le poku fa’amasigo.” Na fia iloa e le Fafige Faikakala le mafua’aga na ala ai ona ta vau solo e le mafine lea lona tino ma lona ulu, ina ua mae’a ona ia tu’u lana pulu sa lamu i luga o le pepa na alu atu ma le ali’i Masela. Na eu eu e le Fafige Faikakala le mafine lea ma musumusu atu i ai, “Tina, aisea ua e ita ai, ua e toe mana’o i lau pulu kamu sa lamu lea ua tia’i e le Masela lau pulu ae se’i o’u alu e toe fa’atau mai se isi au pulu?”, na te’i le Fafige Faikakala i le faasaga mai o si mafine lea i tua ma musumusu mai isi ona leo tau le lagona fai mai, “Ou ke le malamalama i le ali’i Masela lea, pe aisea ua sau ai e avaku la’u pulu e kia’i, ae se’i fa’auka i ali’i fa’amasigo lagolago e ko’alua la e kau fai lalamu mai la pulu kamu i luma o le laulau,” Na te’i le Fafige Faikakala ina ua vaai atu i luma o le laulau o ali’i fa’amasino, e mata’utia le mea o loo tupu mai ai, o loo alo lelei mai si ali’i fa’amasino i le iloiloina o se tasi o mataupu taua o loo fa’agasolo i le taimi lea, ae o lo o alo lelei lava fo’i nai ali’i fa’amasino lagolago i le tausami ina o a la pulu kamu. Na te’i le Fafige Faikakala i le toe musumusu atu o si mafine lea e i ona luma, “Maimau pe aga i ai sa’u mea pu’eaka, semagu ua pu’e aka o gai ali’i fa’amasino ae fa’apipi’i i luga o le “Facebook”.