Ua oo lava i pepe fou faatoa fananau mai, ua faia i ai suesuega ao lei te’a i tua mai le falemai, pe o aafia o latou toto i vailaau oona o loo maua i le laau faasaina o le mariuana, e pei ona taua i se ripoti mai le vaega a le Associated Press a Amerika.

Na taua i ni faamaumauga, o le tele o pepe e maua ane e i ai le pasene o le Marijuana i o latou toto, e mafua mai i latou tina e ulaula nana, ma e tele na’ua fo’i le marijuana latou te ulaina a’o ma’itaga i latou, peita’i e i ai le isi mea ua maua ane i nei su’ega, i le i ai lea o le pasene o le marijuana i le toto o pepe pe afai e pa’i lava sina mataua o le shampoo o le Johnson & Johnson, Aveeno ma CVS i a latou feau vai (tulou).

Fai mai le suesuega sa faia e le Iunivesite a North Carolina, e i le va o le 10-40% o pepe e fananau mai e i ai pasene o le mariuana i o latou toto

O se mea e le o iloa i su’esu’ega, pe aisea ua a’afia ai lea su’esu’ega i le fa’aaogaina e pepe o nei shampoo, baby wipes ma latou fasimoli. Ona e le o mautinoa le afuaga o lea mea ua fa’aauau ai pea ona sailia uma lava ituaiga fasimoli, kulimi ma shampoo ua taumafai ai lava lea Iunivesite ia sailia patino le afuaga o lea tulaga, aua o lea ua tu’ua’ia nei tina ma aiga ona o lea fa’aletonu ua maualuga tele i pepe fananau mai.

O le finauga ua i ai nei, e ao ina toe sailia lelei le ituaiga o su’ega o lo’o faia mo le sailiga, ona o lea ua tula’i mai e mafai ona fa’ailoa mai e i ai le marijuana i le tino o tagata, ae o le mea moni e leai.

O se mea e o’o ina faia fo’i e tagata, o le va’ai mai o nei oloa mo pepe ma latou inumia? Sole e uma ai oe, ma e le tatau lava ona e fa’ata’ita’ia.

Peita’i i sailiga a foma’i fa’apitoa, ua maua ane ai, e matua leai lava se so’otaga o le i ai o le pasene o le marijuana i toto o pepe ma tulaga tau fa’asauaina o le pepe ao le’i fanau mai. O le fa’aletonu o lea faiga, ona o nisi matua ua le toe faia lea tulaga, ina ua fananau mai fanau, ae ua mataituina i latou e foliga o nisi ua solitulafono matuia e le vaega o le soifua maloloina ma leoleo fo’i.

Tau ina ia iloa e matua, o i tatou lava e ‘aia le vine moto, ae magiagia nifo o le fanau e pei o upu o le Tusi! Peita’i, ua tapena mai fo’i le Matagaluega o le Soifua Maloloina, ia faia le latou sao ia saogalemu le soifua o le fanau fa’ato’a fananau mai.

Ua iloga e i ai le afaina o nei oloa e fa’aaoga i tino o pepe mai lo latou soifua mai, e ono afaina ai lea su’ega taua mo pepe meamea, ma ia nofouta fo’i i tatou matua i lea tulaga. Ua fa’amalosia i le tele o setete ua tetele ai afaina o fuala’au fa’asaina le faia o nei su’ega i pepe pe a fananau mai.

O lo’o fuafua le Iunaite Setete e tusia ma pasia se tulafono e taumafai ai ona fa’atulaga le fa’asaua i fanau pepe pe afai o le a fananau mai e tele na’ua le pasene o le marijuana i o latou toto, ma e mafai ona fa’asala sa’o ai matua o nei pepe, peita’i, o le su’ega lea ua maua ane ai oloa nei e aofia ai: Johnson & Johnson’s Bedtime Bath, CVS Night-Time Baby Bath, Aveeno Baby Soothing Relief Creamy Wash ma Aveeno Baby Wash & Shampoo, ua toe taumafai ai e fa’amatu’u lea tulaga.

E o’o lava fo’i i le ituaiga o fasimoli o le Johnson’s Head-to-Toe Baby Wash, CVS Baby Wash, Baby Magic ae maise fo’i o gel ma fasimoli e fafano ai lima ua i ai pasene o le marijuana ae ua le lava e mafai ona solitulafono ai se tasi.

saunia: Leua Aiono Frost