Ads by Google Ads by Google

TUUAIA SE ALII SAILA I LE FAIA UIGA MATAGA I SE TEINEITITI PASESE

Ua taofia nei i le falepuipui i Tafuna se alii Saila o le va’a a le malo o Samoa, le M/V Lady Naomi, ina ua masalomia lona aafia ai i le faatinoina o se solitulafono o le faia lea o amioga mataga po o faiga faafeusuaiga faasaga i se teineititi e 15 tausaga le matua.

O le taunuu mai ai o le malaga a le Lady Naomi mai Samoa i le taeao o le aso Tofi na te’a nei tulai mai ai lea faalavelave, ma taofia faapagota ai loa lea alii i le toese ma le faamoemoe o le a taofia o ia mo le 48 itula, ao faatali ai gaioiga a le malo mo le failaina lea o moliaga faasaga i lenei alii.

Na tapunia le faitotoa e ulufale atu ai i le uafu atoa ai ma le ulufafo mai i tua o le uafu i le taimi na taunuu ai le vaa, ao pisi ai le vaega o Leoleo Suesue a le Ofisa o Leoleo i le suesueina lea o lenei mataupu.

O le Taitai o le Vaega o Leoleo Suesue ia Comdr. Lavatai Taase Sagapolutele ma ana leoleo suesue sa i ai i le suesueina o lenei mataupu i luga o le vaa, mulimuli ane faatasi atu i ai ma le afioga i le Sui Komesina o Leoleo, le tofa Leseiau Laumoli.

Na taua e se alii na malaga mai i le Lady Naomi mai Apia e faapea, o le taunuu mai ai o le vaa i totonu o le taulaga na ia faalogoina ai loa i tala o lo o pisa e faatatau i lea mataupu.

“Sa faatonuina i matou uma sa malaga mai i le vaa e ulufafo ma a matou uta, ina ua maea, sa ulufale atu loa leoleo mo a latou suesuega, ae taofia ai le lauina mai o le uta o faamomoli na aumai i le vaa,” o le molima lea a lea alii e lei manao e faalauiloa lona igoa.

Ae na taua e le isi tina e faapea, na te lei iloaina se faafitauli o tulai mai i totonu o le vaa, peitai na faatoa taia lana faalogo i le mea o lo o tupu ina ua taunuu mai i fafo o le vaa, ma ia vaaia ai leoleo o lo o tumutumu ai i luga o le uafu.

“Sa ou manatu lava a’u ai o ni uta mariuana na matou o mai i le vaa ma aumai, ina ua ou vaaia leoleo e toatele o lo o laulaututu atu i fafo o le vaa, peitai o lea la faatoa ou manino i le mataupu, o le Saila ma le teineititi o lo o tupu ai le faalavelave,” o le molimau lea a le tina ma ata ma faapea lana tala, “Sei iloa ai foi le faakamala o le ga alii Saila ia.”

E umi se taimi na i ai leoleo suesue i luga o le vaa, i le faatalatalanoaina o molimau aemaise ai le fesiligia o i latou o lo o aafia i lenei mataupu.

Na taua e le isi molimau sa i ai i luga o le vaa, e toatasi se alii Saila na aveese mai e leoleo mai luga o le vaa, ma auina atu i le Ofisa autu i Fagatogo mo sina taimi, e lei umi ae toe vaaia loa le toe auina atu o lea alii i luga o le va’a, a’o loka atu e leoleo ona lima i le handcuff.

“Sa ou faapea lava a’u ai foi o ni mariuana na o mai ni isi o le au Saila ma aumai, o lea lava la ou te faatalitali pe o le a le mea sa’o sa tupu,” o le faamatalaga lea a le isi alii na alu atu e piki mai lana umu talo ma luau na aumai i lona aiga i Samoa.

E lei mafai ona tuuina mai e le susuga Comdr. Sagapolutele poo le Sui Komesina se faamatalaga e uiga i le faalavelave sa tulai mai, na pau a laua saunoaga, sei maea suesuega o lo o faia, ae na pau le saunoaga a le Sui Komesina sa ia tuuinam ai i le Samoa News, e toatasi le Saila o le vaa ua taofia i le falepuipui i Tafuna, ao faagasolo ai suesuega e faatatau i tuuaiga faasaga ia te ia, i lona faiaiga lea i se teineititi e 15 tausaga le matua i luga o le vaa.

E tusa ai ma se ripoti e le o faamaonia na maua e le Samoa News, o lo o taua ai le faamalosia e le ula lea o le teineititi na aafia i le vaveao o le aso Tofi na te’a nei.

Na pau le itu e le o manino mai i le taimi nei, pe i ai se malosi o le malo o Amerika Samoa e faamasinoina ai lenei mataupu, ona o le mataupu o lo o tuuaia na tulai mai ao i ai le vaa i luga o le sami i le va o Samoa ma Amerika Samoa.

O le aso Gafua o le vaiaso fou lea ua faamoemoe e tatau ona tulai ai le alii Saila i luma o le faamasinoga, faamoemoe lea i le maea ona faila e le malo o moliaga faasaga ia te ia.

E le o se taimi muamua lenei ua aafia ai se Saila o le vaa a Samoa i ni solitulafono i le teritori.

I ni tausaga e lei mamao atu na taofia ai foi se alii Saila i le toese i Tafuna ma tuuaia i lona aumaia faanana lea o se vaega o le laau faasaina o le mariuana.

Na faaiuina lea mataupu ina ua faamaonia le solitulafono o le umia faasolitulafono lea o mariuana faasaga i le alii Saila, ma faa falepuipui ai e le Faamasinoga Maualuga i le toese i Tafuna mo le umi e 5 tausaga.