O le taeao ananafi na tulai ai i luma o le Faamasinoga Faaitumalo se tasi na avea ma pule o le aoga maualuga a Samoana i tausaga ua tuana’i, e tali i ona moliaga o le faaoolima, ona o se faalavelave na tula’i mai i le aso 6 o Mati, 2012.

O moliaga e fa ua tuuaia ai Simon Mageo e aofia ai le faaoolima i le tulaga tolu, lea e mafai ona faasala ai se tasi i le toese mo le umi e le silia i le 15 aso, pe sala tupe e le silia i le $300.  Ma moliaga e lua o lona faia o ni gaioiga e ono lamatia ai le saogalemu o fanau laiti, o se solitulafono e mafai ona faasala ai se tasi i le toese mo le tausaga atoa, pe faasala foi i le salatupe e le silia i le $1,000, poo le faasala foi i faasalaga uma ia e lua.

O Mageo na tula’i i luma o le faamasinoga ina ua maea ona tuuina atu i ai se tusi samania, ma o lo o faaauau pea le tatalaina o ia i tua e faatali ai le aso lea ua faatulaga e toe fofogaina ai lana mataupu i luma o le faamasinoga.

O le mataupu o lo o tuuaia ai Mageo e pei ona taua i faamaumauga a le faamasinoga, na afua mai ina ua faila e ni alii aoga se toalua ni a la tagi i le ofisa o leoleo e faasaga ia Mageo, na ia faaoolima ia te i laua i le tausaga na tea nei.

Na taua e se alii e 17 tausaga le matua i leoleo e faapea, na alu i le Ofisa o le alii puleaoga e aumai se pepa e faataga ai ona alu i totonu o lana vasega, ona e lei aoga i le aso ua tuana’i, sa ma’i.

A’o le’i tuuina mai e le ua molia le pepa ia te ia, e faalua ona ia po tua o lona tuaua. Na faaalia e le alii lea i leoleo e faapea, e le o se taimi muamua lea ua faia ai e le ua molia lea gaioiga.

E faapena foi le molimau a le isi alii e 17 tausaga le matua. Sa ia faailoa i leoleo e faapea, sa alu foi i le Ofisa o le pule aoga e piki mai se pepa e faataga ai o ia ona alu i lana vasega, leaga e le’i aoga i le aso ua tuana’i.

A’o tu i le laina, sa ia faalogo o valaau mai le ua molia i isi tamaiti aoga ina ia gasolo atu i totonu o lona Ofisa, ma ia vaaia ai le ta po e le ua molia o tuaua o tamaiti aoga, ae ina ua valaau mai le ua molia i lona igoa, sa alu atu i totonu o le Ofisa ma fai i ai, pe na te le taina lona tuaua, sa ata le ua molia ma tago ua toso lona taliga.

I sana faamatalaga tusitusia na tuuina atu i le Ofisa o Leoleo, na faamaonia ai e Mageo le faalua ona ia po le tuaua o le isi alii, atoa ai ma lona tosoina o le taliga o le isi alii ae ee i ai.

Ao tatala ai Mageo i tua e faatali ai le isi aso lea ua faatulaga e toe fofogaina ai lana mataupu, ua poloaina o ia e le faamasinoga ina ia avea o ia ma tagatanuu lelei o le atunuu i soo se taimi, ma ia aua nei ona toe solia se tulafono.

Ua poloaina foi o ia ina ia aua nei ona toe taumafai e faafesootai i laua o lo o aafia i lenei mataupu i soo se auala, sei vagana lana loia e mafai ona faia ni fesootaiga ma i laua nei.