E toalua ni alii talavou ua tuuaia nei e le malo i moliaga e aofia ai le talepe fale, taumafai e talepe fale, taupulepule e talepe se fale, gaoi ma moliaga mama e tolu o le faaleaga mea totino, ona o se faalavelave na tulai mai i le vaiaso na tea nei i Leone, lea na la osofaia ai ni faleoloa se tolu i le po e tasi.

O loo taofia pea i le toese i Tafuna le alii o Siaosi Vaa Jr ma Ryan Pite, ina ua le mafai ona la totogiina vaega tupe tai $35,000 ua faatulaga e tatala ai i laua, e faatali ai a la uluai iloiloga lea ua faamoemoe e faia i le taeao nei i luma o le Faamasinoga Faaitumalo.

Na teena e i laua nei tuuaiga a le malo ina ua la tutulai i luma o le faamasinoga i le vaiaso nei, ma ua faamoemoe o le la uluai iloiloga lea o le a faia i le aso e le o se faamasinoga, ae ua na o se iloiloga e suesue ma fesiligia ai e le faamasinoga molimau a le malo, pe faamaonia sa soli se tulafono, ae poo i laua foi ia o loo tuuaia i le soliina o lea tulafono.

Afai ae faamaonia e le faamasinoga mau a le malo, ona tuuina atu loa lea o le mataupu a i laua nei i luma o le faamasinoga maualuga, e faataunuu ai sa laua faamasinoga autu, poo le faia foi lea o se isi maliliega ma le malo.

E tusa ai ma faamaumauga a le faamasinoga o loo taua ai, e tolu faleoloa na osofaia e i laua nei i totonu o le itula e tasi, ae na o le tasi le faleoloa na mafai ona o la gaoia mai ai ni oloa e silia ma le $100 le tau aofai, o le faleoloa mulimuli foi lea sa laua talepeina.

Pe tusa o le itula e 3:30 i le vaveao o le aso 10 Ianuari, na faafesootai ai e le ule o le faleoloa o le Super Star Store i Leone le Ofisa o leoleo mo se fesoasoani, ona o ni alii se toalua e ufi uma o la foliga faatoa maea ona la talepeina lona faleoloa.

Na faamatala e le pule o le faleoloa i leoleo lona vaaia o i laua e toalua o la talepeina se vaega o le faleoloa ma taumafai e ulufale atu i totonu, peitai na toe foi e aunoa ma se mea na la gaoiina ina ua la iloaina atu o ia.

Na maea le osofaiga a le au ula lea i le faleoloa lea, ona la agai atu loa lea i le faleoloa o Lemau’s Store i Leone lava, ma le osofaia e ala i le la taumafai faatasi e tatala le faitotoa pito i luma, peitai na lagona mai e le pule o le faleoloa le pao, ma ala ai loa i luga, ma ia vaaia ai le au ula ia o loo taumafai e ulufale i totonu o lona faleoloa.

Na faamatala e le pule o le faleoloa lea i leoleo, o le au alii na osofaia lona faleoloa e fusi uma o la foliga, sa mafai foi ona maua i luga o le masini pu’eata o le faleoloa a la gaioiga uma sa faia.

E le’i mafai foi e le au ula ia ona ave faagaoi ni oloa mai totonu o le faleoloa lea ae na alu le la tuli i le atoa, ina ua la vaaia le pule o le faleoloa o loo tu mai ma se samala.

Na maea le faleoloa lona lua ae agai atu loa le au gaoi i le fale oloa lona tolu, lea na o la osofaia ai loa e ala i le faaaogaina e Pite o se maa e tu’i ai le tioata o le faleoloa ma la ulufale ai loa i totonu, ma gaoi pusa candy e 5 ma pusa pulukamu e 2 e tusa ma le $166 le tau aofa’i.

Na taua e Vaa i leoleo e faapea, ao faia sa la inugapia i le po lea i luga o le sami ma Pite, na fai atu ai lana uo o Pite ia te ia la te o e talepe le faleoloa o Mamoe Store, ma mafua ai loa ona la agai atu ma faatino le la osofaiga.

Sa ia tautino foi i leoleo e faapea, ina ua le mafai ona la gaoia ni oloa mai le faleoloa muamua, sa la faasolosolo atu ai i le faleoloa lona lua seia oo atu lava i le faleoloa lona tolu.