E toafa ni alii talavou ua tuuaia nei e le malo i lo latou faia o ni uiga mataga i se teineititi e 14 tausaga le matua.

O i latou o lo o tuuaia i lenei mataupu e aofia ai Anthony Sioka, 20 tausaga; Lewis Lokeni, 25 tausaga; Peni Levi, 21 tausaga; ma Tavita Mariota e 27 tausaga.

O lo o tuuaia uma i latou i moliaga mamafa ta’i lua o le faiåiga ma se teineititi talavou, o lea moliaga e mafai ona faasala ai se tasi i le toese mai le 5-15 tausaga, ae o le moliaga o le tagofia o itutinosa o se tamaitai i le tulaga muamua, e mafai ona faasala ai se tasi i le toese mo le umi e le silia i le 5 tausaga, po o se salatupe e $5,000, po o faasalaga uma e lua.

O lo o tuuaia foi latou i le moliaga mama o le faia o ni gaioiga e ono lamatia ai le saogalemu o se teineititi, e mafai ona faasala ai se tasi i le toese mo le tasi le tausaga, pe faasala i le salatupe e $1,000, po o faasalaga uma e lua.

E tusa ai ma faamaumauga a le faamasinoga o lo o taua ai e faapea, na mafua ona tofu atu i le Ofisa o Leoleo lenei mataupu, ina ua iloa e se tagata faigaluega a le Aoga Tulaga muamua a Lupelele ni faailoga i le ua o le teineititi na aafia (love bites).

Na fesiligia e leoleo le tamaitai na aafia ma ia faamatalaina ai le tulaga na tulai mai i le va o ia ma alii e toafa o lo o tuuaia i lenei mataupu.

PENI LEVI - Na taua e le teineititi i leoleo e faapea, o le tagata muamua lava na la momoe, o Peni Levi, i le aso 12 o Aokuso 2011, a’o 13 ona tausaga.

O le aso 12 o Me 2012 na fesiligia ai e leoleo le ua molia e uiga i lenei mataupu, peita’i na ia ta’ua, e na o le tasi le aso na la faiaiga ai ma le teineititi.

ANTHONY SIOKA - Na taua e le teineititi sa la fetau ma Anthony Siokai i le isi afiafi i le masina o Oketopa 2011 ina ua maea se taaloga volipolo i Fagaima, ma la agai atu ai i se fale tuufua ma la faiaiga ai.

Na faailoa e le teineititi i leoleo, e faa fa na la faiaiga ma Sioka i le masina o Oketopa, lea e aofia ai ma le po sa la momoe ai i le fale o le uo a Sioka e igoa ia Bruce.

Na faamaonia e Sioka i leoleo, e faatolu i le faafa ona la faiaiga ma lea teineititii i le va o le masina o Aokuso ma Oketopa 2011.

LEWIS LOKENI - Na faamaonia e le teineititi na aafia i leoleo e faapea, e faatolu ona la faiaiga ma Lokeni, o ia foi lea na faia faailoga i lona ua.

Na amata le la faigauo i le aso 16 o Ianuari 2012 seia oo i le masina o Aperila 2012.  Na faailoa e le tama o le teineititi i leoleo e faapea, o le aso 30 o Aperila 2012 na taumafai ai lona afafine e pule i lona ola e ala i lona inu ina o se fagu Clorox, ina ua maua e se faiaoga faailoga sa i lona ua.

Sa fesiligia e leoleo Lokeni e uiga i lenei mataupu, ma ia faamaonia ai e faapea, e faatasi lava ona la faiaiga ma le teineititi na aafia, e na o le aso 20 Aperila 2012 i tua o le faleoloa o Mose i Fagaima.

TAVITA MARIOTA - Na faailoa e le teineititi na aafia i leoleo e faapea, e faatolu ona la faiaiga ma le alii o Mariota. O le taimi muamua sa la faiaiga ai i tua o le faleoloa a Mose i Fagaima, ae faalua i le fale a le ua molia.

Ina ua fesiligia e leoleo le ua molia, sa ia faamaonia ai tuuaiga faasaga ia te ia.   Na faamaonia foi e Mariota, e faatolu ona la faiaiga ma le teineititi o lo o aafia i lenei mataupu.

O le taeao ananafi na tutulai uma ai i latou nei e toafa i luma o le faamasinoga maualuga, ma latou teena ai tuuaiga faasaga ia te i latou, ma ua toe tolopo ai loa a latou mataupu e toe fofogaina lea i le aso 11 Fepuari 2013.

E ta’i $10,000 ua faatulaga e le faamasinoga e totogi, ona faatoa mafai lea ona tatala i latou nei i tua mai le toese i Tafuna.