Ads by Google Ads by Google

Tuuaia i le gaoia o ni siaki a ni kamupani se lua

O le alii lea ua tuuaia e le malo i lona gaioia o ni siaki a ni kamupani se lua i le atunuu, ma le saini pepelo igoa o pule o ia kamupani i luga o siaki, ua molia nei o ia e le malo i moliaga o le gaoi ma le faia o ni faamaumauga tau faasese.

Na teena e le alii o Dalle Malcolm moliaga uma ua faia faasaga ia te ia, ina ua tulai i luma o le faamaisnoga maualuga i le taeao ananafi, ma ua faatulaga lana ulua’i iloiloga mo le masina fou, e iloa ai pe faia se faamasinoga pe faia se maliliega ma le malo.

O le mataupu muamua o lo o tuuaia ai Malcolm o lo o aafia ai le kamupani a le Pacific Channel Samoa, ao le mataupu lona lua o lo o aafia ai le Friendly Car Rental.

E tusa ai ma faamaumauga a le faamasinoga o lo o taua ai e faapea, ia Oketopa 1, 2012, na faaulu ai e le pule o le Pacific Channel sana tagi i le Ofisa o Leoleo, e uiga i se siaki e $1,500 sa gaoi e se tagata mai lona Ofisa.

Na taua e le alii pule e faapea, o le aso 20 o Setema 2012 na alu atu ai Malcolm e faatau atu se TV ma se Ipad  e $300 ma lana faamatalaga, na te fia maua se tupe mo lana malaga i fafo i le po lava lea.  Na faailoa e se tagata faigaluega a le kamupani i le alii pule, ua ia faalogo o lo o i ai se mataupu o lo o aafia ai Malcolm, ona o se siaki sa ia gaoia mai i se isi kamupani.

O le taimi lea na siaki ai e le alii pule lana tusi siaki ma ia iloa ai e tasi le siaki ua misi. Sa ia faafesootai le Faletupe  ma iloa mai ai, e $1,500 le aofai o le tupe sa tala e se tagata mai se siaki o lo o saini ai lona igoa.

Na siaki e le pule o le kamupani le siaki ma ia faamaonia ai i leoleo, e le o lana saini o lo o i ai i luga o le siaki. O le pito i tua o le siaki o lo o i ai le saini a le ua molia.

O le mataupu muamua lea o lo o tuuaia ai e le malo Malcolm i moliaga mamafa e 5, ma o ia moliaga e aofia ai moliaga e lua o le gaoi,  lua moliaga o le faia o faamaumauga tau faasese, ma le moliaga e tasi o le tete’e i leoleo a’o taumafai e pu’e faapagota o ia.

O le mataupu lona lua o lo o faia faasaga ia Malcolm na tulai mai i le kamupani a le Friendly Car Rental, ina ua alu i ai le ua molia e faatulaga sana taavale e fia rent mai, ae tuuaia ai o ia i lona gaoia o se pusa siaki sa i totonu o le ofisa.

E tusa ai ma faamaumauga a le faamasinoga o lo o taua ai e faapea, e lua siaki na saini faamalosi e Malcolm le igoa o le pule=i, ona ia talaina lea o le isi siaki i se faleoloa e masani ai, ae o le isi siaki i se tasi o Faletupe i le atunuu.

O le mataupu lea o lo o tuuaia ai le ua molia i moliaga mamafa e fa, lea e aofia ai moliaga e lua o le gaoi, atoa ai ma moliaga e lua o le faia o faamaumauga tau faasese.

O le alii loia ia Michael White o lo o tulai mo le ua molia, ae o le tamaitai loia ia Kimberly Hyde o lo o tulai mo le itu a le malo i lenei mataupu.

E $30,000 le tupe ua faatulaga e le faamasinoga e tatala ai Malcolm i le mataupu muamua, ae $10,000 e tatala ai o ia mo le mataupu lona lua, ma o le taimi nei, o lo o taofia  pea le ua molia i le falepuipui i Tafuna, ina ua le mafai ona ia totogiina tupe ua faatulaga e tatala ai o ia i tua.