Ads by Google Ads by Google

Tuuaia i le faia o uiga mataga i ni tamaitai se toalua

O le itula e 9:00 i le taeao nei lea ua faamoemoe e tulai ai i luma o le faamasinoga maualuga se tamalii o le afioaga o Ofu i Manu’a, mo le faaauauina o taualumaga o le mataupu e pei ona tuuaia ai o ia e le malo, i lona faia lea o ni uiga mataga i tei e toalua a lona faletua.

O le aso Faraile na tea nei na faatulaga e faia ai le uluai iloiloga o lenei mataupu i luma o le faamasinoga faaitumalo, peitai sa lei faataunuuina lea iloiloina, ina ua malie le ua molia e faaagafua ona aia tatau faaletulafono e aua ai nei faataunuuina lana uluai iloiloga lea, ae tuu sao atu loa lana mataupu i luma o le faamasinoga maualuga e faaauau ai.

O loo tumau pea le tetee o lenei ali’i i moliaga e 8 o loo tuuaia ai o ia e le malo, ma o loo taofia pea o ia i le toese  ina ua le mafai ona ia totogiina le $50,000 lea sa faatulaga e tatala ai o ia i tua.

I faamaumauga a le faamasinoga o loo taua ai e faapea, o le masina o Tesema na tea nei na ripotia ai e se molimau i le Ofisa o Leoleo, gaioiga mataga sa faia e le ua molia i tamaitai laiti e toalua o loo aafia, lea e tai 17 tausaga lo la matutua i le taimi nei. O le isi tamaitai na malaga mai Samoa i le tausaga 2010 ae o le isi na malaga mai i le tausaga ua te’a, ma nonofo ma le ua molia ma lona toalua.

E tusa ai ma faamaumauga a le faamasinoga o loo taua ai, o tamaitai nei e toalua o le fanau a le uso o le toalua a le ua molia. E ta’i 16 tausaga o nei tamaitai ina ua taunuu mai Samoa.

Na faailoa e le isi o tamaitai nei i leoleo e faapea, o le masina o Oketopa na tea nei na amata ai ona fai atu e le ua molia amioga mataga e pei ona tuuaia ai o ia e le malo, e ala i lona faia o ni gaioiga ina ia faamalie ai ona lagona tu’inanau, peitai e lei mafai ona ia faamalosia o ia la te faiaiga.

Ae o le tamaitai lona lua sa ia faailoa i leoleo e faapea le faamalosi e le ua molia o ia la te faiaiga i se tasi o po, ma ua galo foi ia te ia le aofai o taimi na faia ai e le ua molia nei gaioiga ia te ia.

Na taua e le tamaitai lona lua i leoleo e faapea, o le po muamua lava o le masina o Iuni 2010 na taunuu ai i le aiga o le ua molia i Ofu, Manua latou te nonofo, na alu atu ai le ua molia i lona potu ma taumafai e faia uiga mataga nei ia te ia, peitai sa tu i luga ma tamoe i totonu o le fale taele ma tagi ai i lona fefe.

Sa ia taua foi le faafefe e le ua molia o ia e ala i le fasi o ia ma toe faafoi i Upolu pe afai na te ta’uina i se tasi le mea o loo tupu. O le taimi mulimuli o loo taua i faamaumauga a le faamasinoga na faamalosi ai e le ua molia le teineititi lona lua o le aso 7 Tesema 2011, le taimi lea ao i ai lona toalua i Apia, ae ina ua la toe malaga mai foi i lo latou aiga i Iliili i le aso lava lea, sa toe faamalosi foi e le ua molia le tamaitai lava lea e pei ona taua i faamaumauga a le faamasinoga.

I se talanoaga a le aiga sa faia i le aso 22 Tesema, sa faatoese ai le ua molia i tamaitai na aafia e tusa ai o le mea sa tupu, ma ia tautino i ai e le toe tulai mai lea mea i le lumanai.

Sa faapea foi ona folafola e le toalua o le ua molia i tamaitai na aafia lona sasaina o i laua, pe afai la te faailoaina i leoleo le mea sa tupu.

Ina ua fesiligia e leoleo le ua molia e tusa ai o tuuaiga faasaga ia te ia, sa ia faamaonia ai e sa’o sa ia faamalosia i laua uma ia e toalua. Sa ia faamaonia foi i leoleo lona faia o ni gaioiga mataga faafeusuaiga ia te i laua.

O moliaga o loo tuuaia ai lenei tamalii e aofia ai le faiaiga faamalosi, 2 moliaga o le faia o uiga faasotoma, 2 moliaga o le faia o uiga mataga faafeusuaiga, 2 moliaga o le tagofia o itutinosa o se teineititi i le tulaga muamua, ma le moliaga mama e tasi o le faia o ni gaioiga e ono lamatia ai le saogalemu o se fanau e laititi i lalo o le tulafono.