O le tama talavou lea o lo o tuuaia i le maliu o lona atalii e tasi le tausaga le matua, ua faamoemoe e toe tulai i luma o le Faamasinoga Faaitumalo i le taeao nei, mo le iloiloina lea pe manao e faataunuu sana faamasinoga iloilo, poo le tuu sao atu loa o lana mataupu i luma o le faamasinoga maualuga e faaauau ai lana iloiloga.

O moliaga faasaga ia Juliano Tavale e aofia ai le fasioti tagata pa’ivalea ma le ave taavale ua mafua ai ona oo le oti i se isi tagata.

I le silia ai i le tasi ma le afa tausaga talu ona tuanai lenei faalavelave, o le  aso Faraile o le vaiaso na tea nei na  faatoa faila ai e le malo lenei mataupu, ma tulai ai loa  Tavale i luma o le  faamasinoga faaitumalo.

E tusa ai o faamaumauga a le faamasinoga na taua ai e faapea, o le  aso 25 Iulai 2010 na faanatinati atu ai le atalii e tasi le tausaga a le ua molia i le falemai mo togafitiga, ona o ni manu’a tuga sa aafia ai lona tino

O le tigaina tele o le alii o Masoe Uliama i manu’a sa aafia ai lona tino ma lona ulu na faaaogaina ai e foma’i se masini e tau faaola ai o ia, peitai sa le’i manuia ia taumafaiga uma ma i’u maliu ai lava o ia i le aso na soso’o ai, le aso 26 Iulai 2010.

Na faailoa e Tavale i le alii fomai e faapea, o lona atalii na pau mai luga o se nofoa i lo latou fale i Leone, ae ina ua fesiligia e le fomai le ua molia ona o se fula sa i le ulu o lona atalii, na taua ai e le ua molia e faapea, o le fula lea e mafua mai ina ua toe pau lona atalii ao la o i le taavale ma tau ai lona muaulu i le dash board o le taavale.

Ae tusa ai o le molimau a le tina o le alii ua maliu sa ia faailoa ai i le alii leoleo sa suesueina lenei mataupu o Det. Filemoni Amituana’i e faapea, na alu atu le ua molia i le aso 25 Iulai e asi atu o ia ma lana tama, ma i’u ina o Tavale ma Masoe, peitai i le afiafi o le aso lava lea na toe telefoni atu ai le ua molia ia te ia ma faailo atu tulaga faaletonu ua oo i lana tama o Masoe.

Na vaaia e le tina tulaga faaletonu i lana tama ma telefoni ai loa le taavale falema’i, ma faanatinati atu ai o ia i le falema’i.

Ina ua fesiligia e le alii leoleo ia Tavale i le mafuaaga o le maliu o lona atalii, sa ia taua ai e faapea, ina ua maea ona ia pikiina mai lona atalii, sa alu atu ai lona tuafafine ma piki mai lona atalii, mulimuli ane i se taimi o lea lava aso na toe alu atu ai ma toe piki mai lona atalii.

Ao alu le la taavale, sa tagi lona alii ma taumafai e totolo atu i luga o lona tauau, peitai sa ia taumafai e faanofo i luga o le nofoa e aunoa ma se nofoa faapitoa mo tamaiti, a’o ia aveina pea le taavale.

Fai mai Tavale, ao alu saoasaoa le  la taavale ma lona atalii, na faafuasei ona tu lona vae i le taofi o le taavale ao taumafai e faanofo i lalo lona atalii, ma avea ai ma itu na fiki atu ai lona atalii ma tau lona ulu i le dash board o le taavale, sa toe tifa atu ma tau lona muaulu i le pito o le faitotoa, ma ia vaaia ai loa o ia ua le gaioi.

Ae ina ua fesiligia o ia i manu’a ma unaoa sa maua i le tino o lona atalii, na faailoa ai e Tavale e faapea, o mea ia na mafua mai ina ua ia po ina o ia i le isi vaiaso, ona o le ulavale, ma sa ia taumafai e faatonu ma aoao lelei lona atalii.

Na faatoese le ua molia i le alii leoleo ma faailoa i ai lona salamo, ina ua le faatinoina ona tiute o se tama o le tamaititi ua maliu, atoa ai ma lona faatamala i le faatinoina o ona tiute faamatua.

I se ripoti na tuuina atu e le falemai sa taua ai le tuga o manu’a na aafia ai le ulu ma le tino o Masoe, ma mafua ai loa ona oo le maliu ia te ia.

O le alii fomai ia Dr. James Marone na siakiina le alii o Masoe i le taimi na taunuu atu ai i le falemai, o ia foi lea na faia le taotoga e sailia ai le mafuaaga o lona maliu.

Ua faaitiitia i le $15,000 le tupe ua faatulaga e le faamasinoga e totogi ona  faatoa mafai lea ona tatala le ua molia i tua e faatali ai taualumaga o lona faamasinoga.

Afai ae mafai ona tatala o ia i tua, ua poloaina o ia ina ia aua nei ona toe soliina se tulafono a le malo, pe taumafai foi e sola ese ma le atunuu, a ia auai i soo sana iloiloga ma ia fesootai vavalalata ma lana loia.