Ads by Google Ads by Google

Tuuaia alii se toalua fai uiga mataga teineititi 12 tausaga

E toalua ni alii na taofia e leoleo i le faaiuga o le vaiaso na te’a nei ma tutulai ai i luma o le Faamasinoga Faitumalo i le taeao ananafi, ona o tuuaiga i lo la faia o ni uiga mataga i se teineititi e 12 tausaga le matua.

O i laua e toalua ua tuuaia e le malo e aofia ai le ‘uncle’ o le teineititi, e 32 tausaga le matua, ma le alii la te tuaoi o Lemisio John Taetuli, 36 tausaga le matua.

E tusa ai ma faamaumauga a le faamasinoga o lo o taua ai, o le 2009 na tulai mai ai lenei faalavelave, peitai na faatoa ripoti e se tasi o le aiga o le teineititi o lo o aafia i leoleo, lenei mataupu i le aso 8 Mati 2012, ma amata ai loa suesuega a leoleo.

O le mataupu na faila i le ofisa o leoleo ina ua sola le teineititi na aafia mai lona aiga, i le taimi lea ua 14 ona tausaga, ma talosagaina ai loa e le aiga se fesoasoani a leoleo mo le tau sailiina o le na aafia.

Na agai atu leoleo i Pava’ia’i ma latou maua ai le teineititi na aafia i se fale tuufua, ona latou fesiligia lea o ia i le mafuaaga ua sola ese ai mai lona aiga, sa faailoa i ai e le teineititi, ua le toe fia fo’i i le latou aiga ona o le fasi so o o ia e lona tuagane pe afai na te faia se mea sese, e le gata i lea, e masani foi ona tago lona uncle ia te ia pe a ‘ona.

Na faailoa e le teineititi i leoleo e faapea, i se taimi o le masina o Novema 2009 a’o moe i le latou fale, na te’i ina ua tago atu se tagata i lona fatafata, o lea na ia fafaguina ai lona tina matua, ae o le taimi lea o lo o nofo lona ‘uncle’ i luga o le moega.

Ina ua ala le tina matua i luga, sa ia otegia le ‘uncle’ e tusa ai o le mea sa ia faia ma tuli i fafo ma le fale.

O le masina na sosoo ai, Setema 2009, na taua e le teineititi na aafia, na la faiaiga ai ma lona ‘uncle’, seia o’o mai ia Ianuari 2012.

I le amataga o su’esu’ega a leoleo, na fa’afiti ai le ‘uncle’ i lo la faiaiga ma lenei teineititi, ae peitai, na ia toe fa’amaonia lea tulaga i se taimi mulimuli ane.

Ae mo le alii o Taetuli, na faamatala e le teineititi na aafia i leoleo e faapea, i se tasi o Aso Sa i le 2009, a’o vasega 8, na faamalosi ai o ia e Taetuli la te faiaiga i totonu o le faletaele, ina ua mae’a, sa ia tuu atu se $20 ia te ia ma lana tala, e aua ne’i ona ta’ua i se tagata le mea sa tupu.

Fai mai le teineititi na aafia, na toe faaauau i le tausaga e 2010 le amio a Taetuli ma le masina o Fepuari 2012, o le taimi mulimuli lea na la faiaiga ai ma Taetuli.  O lea tullaga na fa’amaonia e Taetuli i leoleo.

Sa ia faailoa i leoleo, o le vaitaimi o le tuua ai o aoga i le kerisimasi o le tausaga 2011, o le taimi mulimuli na la faiaiga ai ma le teineititi na aafia.

E $50,000 le tupe ua faatulaga e le faamasinoga e totogi ona faatoa mafai lea ona tatala Taetuli i tua, ae $25,000 le tupe e tatala ai i tua le ‘uncle’, ma ua faamoemoe o le Aso Tofi o le vaiaso nei o le a faia ai o la uluai iloiloga.

Afai ae mafai ona tatala i laua nei i tua mai le toese, ua faasa e le faamasinoga ona la toe taumafai e faafesootai le teineititi na aafia i lenei mataupu, poo nisi foi o lona aiga.

Ua faasa ona la toe soli se tulafono, a ia avea i laua ma tagatanuu lelei e usitai ma tausisi i poloaiga a le faamasinoga.