Ads by Google Ads by Google

TUUA LE LOTU AE VAOVAO FUSUAGA A SE ULUGALII

O le ula lea na ia fasia lona toalua ina ua faatoa tuua le lotu i le aso Sa na te’a nei, ua faasa e le faamasinoga ona toe taumafai e faafesootai lona toalua ma lana fanau i soo se auala, a ia saili se isi nuu e nofo ai sei vagana ua toe tuuina atu se isi poloaiga a le faamasinoga ona faatoa toe mafai lea ona ia toe faafesootaiina le fafine ma tamaiti.

Na faamatala ata e le isi fafine o le aulotu le mafuaaga o le vevesi na tulai mai, ma faaiu ai loa i le valaau atu o le tamaloa i lona toalua e savali i le taavale, peitai na lafo e le fafine se faamatalaga na tiga ai le loto o le ula lea, ma savali atu ai loa ma kola mai i tua le ofu a le fafine ao ia siia le la tama teine e 1 le tausaga le matua.

“Ke’i si kamaloa i le lele aku o le kusi pese pasasa i guku iga ua kogi e le fafige, faliu mai ai loa fuki le ulu o le fafige ma ka po, kulioso aku loa ma isi kagaka o le auloku ma vaovao,” o le pe’ape’a mai lea o le gutu a le isi fafine o le aulotu i le tau faamatalaina o le mumugaveve a le ulugalii.

E tusa ai ma faamaumauga a le faamasinoga o loo taua ai, o se taugaupu i le va o le alii ua  molia ma lona toalua na mafua ai loa ona aapa atu le ua molia ua kola lona toalua, futi lona ulu ma po ao sii e le fafine le la tama e 2 tausaga le matua.

E lei i ai ni manu’a tuga i foliga o le fafine sei vagana ai se maosia sa i lona alafau, atoa ai ma lona ua na leaga i le taimi lea na kola ai o ia e lona toalua.

Na faailoa e le fafine i leoleo, e le o se taimi muamua lea ua fasi ai e lona toalua o ia i luma o tagata. O le isi foi fasiga o ia na fai i luma o se faleoloa Kolea i lo latou nuu i Tafuna, ina ua musu e ave i lona toalua le $5 na fai atu ai e faaatoa ai le tau o ana fagupia, ma faasaga atu ai loa le tamaloa ma ta ona mata i lana ato faafafa.

Na taua e le fafine i leoleo, o le tele o isi taimi e fasi ai e lona toalua o ia i le fale, peitai sa  musu lava e faailoa ona o le manatu, e leai se isi e faigaluega e maua ai se tupe  mo ia lana fanau pe afai ae loka lona toalua.

O se fafine o le aulotu na viliina le taavale a leoleo ina ua tulai mai lenei faalavelave.

Na teena e le ula lea i luma o le faamasinoga i le vaiaso nei tuuaiga o le faatupu vevesi i nofoaga faitele faasaga ia te ia, ma ua toe tolopo lana mataupu e toe fofogaina i le vaiaso fou, lea foi o le a taumafai ai le malo e faila moliaga faaopoopo faasaga i lenei alii.

Na taua e le loia a le malo, e ono molia le ua molia i le faaoolima i le tulaga tolu, atoa ai ma lona faia o ni gaioiga e ono lamatia ai le saogalemu o se fanau laiti.

O loo masalomia o se vevesi a le ulugalii na afua atu i le fale na mafua ai loa le vevesi e pei ona tulai mai. Ua toe tatala i tua le ula lea mai le toese i Tafuna i le maea ai lea o le po e tasi na moe ai i luga o le sima ma le tuutuuga, o le a toe tulai i le vaiaso nei mo le failaina o moliaga faaopoopo faasaga ia te ia.

Na faailoa foi e le loia a le malo i le faamasinoga le sauni lea o le fafine e faila sana talosaga i le faamasinoga mo se la teteaga faaletulafono ona o le faalavelave na tulai mai.

Na taua e nisi o le aulotu na i ai i totonu o le potu faamasino i le aso lea na valaauina ai lenei mataupu, o le fafine o le Savai’i ae o loo sponsor e lona toalua.

E le o se taimi muamua lea ua tulai mai ai mataupu tau ulugalii i luma o le faamasinoga. O le masina na tea nei na loka ai foi e leoleo se isi alii leoleo, ona o tuuaiga i lona taumafai lea e faafefe lona toalua.

E toalua foi isi alii na taofia mai i le masina lava foi na tea nei, ona o tuuaiga i le fasiina lea o nai fafine, e mafua ina ua foi atu i le fale e leai se meaai o i ai, ae ua alu le po inupia ma nisi o a latou uo.