Na fiu le aulotu e tau faalogo le autu o le lauga a le latou faifeau i le Aso Faafetai na te’a nei, e leai ma se vaega o le lauga o taua ai se Aso Faafetai, sei vagana ai faaupuga e atagia mai ai o ia o le isi sui tauva o le palota, ma i’u ai lava ina tuua gugu le lotu i lena aso ina ua le fiafia le aulotu i le lauga a le alii faifeau.

Na pau le taimi na lavea mai ai le Aso Faafetai i lana lauga, ina ua faaleo lana faafetai i aiga o le Ekalesia na maua atu ai ana ‘turkey’ e lua.

Na taua e le molimau e faapea, o le tusi faitau o le lauga na atagia mai ai le autu o le lauga, ina ua faitau e le aulotu le tusi e faatatau i tofiga a le Atua i lona nuu o Isaraelu, e aofia ai le tofiga mo le ituaiga o Salevi e avea ma Faitaulaga o le nuu.

“Ga oga uma lava oga faikau mai o le kusi faikau, kaakia loa le lauga ae amaka oga kalagoa le faifeau i kala o le paloka, ua le iloga se mea e lalau mai, ua lalau le faaoleole o le aulotu ma faasolo akoa mai ai ma le leai o gi meaalofa o le Aso Faafekai,” o le tomumu lea a le molimau i le Samoa News.

Na pau le itu e malie ai amioga a le faifeau e pei ona taua e le molimau, e uma lelei lana lauga e le o manino poo fea tonu le itu sa ia lagolagoina i le palota na maea atu nei, a uma ona talanoa mai o lana itu na manumalo, ona toe talanoa mai foi lea o lana itu na faiaina.

Fai mai le molimau, na oo lava i mumugaveve a le ekalesia na fai ao lumana’i le vaega muamua o le palota, ina ua futifuti ulu ni isi o fafine o le aulotu e mafua mai i faatosina o le palota, na toe lalaga uma mai i le lauga o le Aso Faafetai.

Fai mai le molimau, e ui i le taape le fiafia o ni isi o le au lotu ona o le lauga a le faifeau, peitai e lei amanaia tele e le toatele ona e lua lava mea sa latou mafaufau i ai, e le gata o ia o le auauna totofi a le Alii, ae le o ia foi o se tagata palota.