I le tatou Kolisi, ua tau le maua se avanoa o se tamaititi fa’ato’a ulufale e lesitala ai, ma ua atili fo’i ona faigata, ona ua soso’o mai lava aso malolo o le tausaga fou, ma le taimi e totogia ulufale a le fanau i le Kolisi, peita’i o vaiaso totogi o matua e le’i o’o i le taimi e maua ai, ma ua fa’alogoina ai le mamafa o lea itu tau le fa’asoa i totonu o aiga.

“O le mea fo’i e muamua fa’asalalau mai e le Nusipepa ma Leitio le tele o fa’asalalauga a le Kolisi e iloa ai e matua o le a a’e a’oga, ae o lea ua te’i lava ua fa’ailoa mai e fanau, o le a a’e a’oga a le Kolisi. E moni lava i fanau i tulaga lua, ua masani ai lava i le ta’i lua vaiaso e tu’ua ai ona a’e lea o le a’oga ua mae’a malologa o le Kerisimasi ma le Tausaga fou.”

O le faitio lea a se tasi matua ua fa’ate’ia i le tulaga o le leai o se vasega a si ona alo e maua, ona ua tutulu ma u’umi laina o lesitala, ae maise o le vave faia o le lesitala muamua, a’o le’i o’o i le taimi e maua ai siaki e totogia ai lesitala a le fanau.

E le o mala ‘ese Samoa mala ‘ese Amerika Samoa i le tulaga ua o’o i ai A’oa’oga Maualuluga, lea e taumafai ai le to’atele ina ia ulufale i le Iunivesite i Samoa, ae taumafai a tatou fanau i’inei e ulufale i le Kolisi Tu’ufa’atasi o Amerika Samoa.

Ua fa’ailoa mai, ua fa’atonuina le fanau a’oga ua mae’a a’oa’oga mai Kolisi i Samoa, ina ia taumafai e sailia ni galuega e tatalia ai le isi afa tausaga, ina ia maua ni avanoa e a’oa’oina i le Iunivesite i Papa i Galagala [NUS].

O le ali’i pule sili o le Iunivesite o Samoa, Professor Fui Leapai Asofou So’o, sa ia fa’aalia tonu mai, i le taimi nei, ua tutumu uma lava potu a’oga ma vasega uma lava o lo’o mafai ona tau’avea i Papa i Galagala, ae ua le mafai ona fa’aofi uma i ai le fanua. O kosi eseese fo’i sa fa’atulaga ua mae’a tutumu nei, e afua mai i a’oa’oga fa’a-tausima’i, a’oa’oga fa’aleoleo, a’oa’oga fa’aofisa, ma a’oa’oga o so’o se matata, [general courses] ua tutumu uma lava e o’o i matata ‘ese’ese e aofia ai le inisinia, faitino ta’avale, kamuta, ma kosi fa’apisinisi ua matua leai se avanoa i le amataga o lenei tausaga a’oga.

Ua lapata’ia le fanau talavou, ina ia fa’amatu’u se taimi o lou olaga e te saili ai se galuega e fa’atumu ai lea vaitau, ma e aoga lea mo le totogi o lau lesitala i le fa’ai’uga o lenei afa tausaga, ae mautinoa fo’i ua e aoga ai i nai matua i le tausiga o le aiga.

O le fa’atumulia o vasega uma i lenei tausaga, ua toe una’ia malosi ai le taupulega Iunivesite o Samoa fa’atasi ai ma le Malo o Samoa, ina ia toe fa’aopoopo potu a’oga ma nisi kosi fo’i e tauavea e le fanau a’o le’i amatalia le isi afa tausaga o lumana’i. Ua fa’aalia e le pule sili, o le isi fuafuaga fa’ata’oto lea e i ai a le Iunivesite, “o le soso’oga o falea’oga fa’atetele i le isi lima tausaga, peita’i, e ao ina fa’aitno nei loa lava lea fuafuaga ae le fa’atalia mo le 5 tausaga e pei ona fuafua i ai.”

O le isi fuafuaga o taoto fo’i mo le 10 tausaga e fa’alautele ai le faletusi fa’atasi ai ma le nofoaga o A’oa’oga Matata Eseese ia fa’atele peita’i, “ua va’ai atu ua se’e mai lea i le fuafuaga fa’ataoto mo le lima tausaga ae le o le 10 e pei ona mua’i fa’ataoto ai.”

O le mau tamau a le Iunivesite, afai fo’i o fetuleni mai le fanau e naunau ia fia a’oa’oina lelei, ae o le pito la’au fo’i latou a le Iunivesite, ia va’ai toto’a i le tulaga o le atamai o faia’oga o le fanau a’oga, ina ia silisili atu ona lelei ma atoatoa agava’a e a’oa’o ai le fanau, ia o gatasi ma paleni lea fua fa’atatau mo le manuia o le auaunaga lea.

Ua mae’a fa’atulaga fo’i lea itu o le tautua, ma ua fa’amalosia fo’i le tofusia o faia’oga ma fa’ailoga maualuluga i tulaga o a’oa’oga, e mafai ai ona avea ma faia’oga i le Iunivesite - O le Masters ma PhD i mataupu o tau’avea, o lo’o fa’amauina e ao ina ausia e faia’oga uma, ma nisi lava o lo’o umia Bachelors i A’oa’oga.