Ads by Google Ads by Google

Tutu Moliga’o manatua i latou maliliu

O le sauniga sa tutuina ai moliga’o e fa’amanatu ai soifua o i latou na maliliu i le alatele ona o fa’alavelave tau ta’avale sa fa’afoea e tagata fa’asua’ava, na fa’atautaia lea i le taeao ananafi i le Maota o le Malo i le Su’igaula a le Atuvasa.

 

O lea lava fo’i le sauniga mamalu, sa fa’afeiloa’ia ai sui usufono mamalu mai atumotu o le Vasa Pasefika o lo’o fa’atasi mai i le tatou malo mo le latou fonotaga fa’ai’u o lenei tausaga. O le Komisi lea o le Pacific Behavioral Health Collaborating Council. O se taumafaiga atili ina ia mataituina fa’atasi e atumotu o le Pasefika o lo’o pulea e Amerika tulaga o le Soifua Maloloina Lelei i o tatou tagatanu’u.

 

E ese mai lea fo’i matafaioi, ae ua tu’ufa’atasia fo’i i lea sauniga mamalu le taumafaiga ia una’ia malosi le “Ave ta’avale ma le Saogalemu i lenei vaitau o aso fiafia o le tausaga” lea ua avea ma auau o lenei masina i le Matagaluega o le Puipuiga o le Saogalemu Lautele.

 

Sa tofusia uma la matagaluega e tolu ma sui mamalu ina ia fa’ataua lea sauniga! O le susuga le Fa’atonu o le Matagaluega o Tautua ma Auaunaga Lautele (DHSS) le tofa Taeaoafua Dr. Meki Solomona sa avea ma fofoga o le polokalama, sa ia vala’auina fa’apitoa Komesina o Leoleo, William Haleck, le Ta’ita’ifono o le Komisi a le Pasefika Julia Albert ma le Sui Fa’atonu o le Matagaluega o Talavou ma Tina, ina ia latou tutuina ulua’i moliga’o e tolu mo lea fa’amoemoe maualuga.

 

O pesega malie ma le fa’agauloto, fa’atasi ai ma pesega o le fanau mai o Iesu, sa fofogaina e le aufaipese a tagata faigaluega a le DHSS, i lalo o le ta’ita’iga a le tama’ita’i fatu pese, taimi pese lauiloa, Julia Levi Fo’ifua.

 

I le polokalama sa i ai se sao o le vaega o lo’o taumafai atili e puipuia mai le mamalu lautele o ave ta’avale mai le ave ta’avale fa’asua’ava, ina ia toe fa’amatala mai ni mea moni na tutupu i lenei vaitau o aso fiafia o le tausaga ua mavae.

 

 “Na fa’afoea e le talavou 17 tausaga le matua le ta’avale a lona aiga, lavea ma maliu ai. Liua le fiafia sa i ai i le fa’anoanoa. O se tama fo’i sa fa’afoea le ta’avale ina ua mae’a le fiafiaga a lona ofisa, sa inu pia ai, moe i le ala ae le’i o’o i lona aiga, ina ua lavea le ta’avale ma maliu ai.”

 

Lona tolu, o le fautuaga masani, “Ia manatua, afai e fiafia i ni fa’atasiga i lenei vaitau, afai sa tele lau tausami i le ‘ava o’ona, aua le fa’afoea le ta’avale, ae vala’au se taxi e te alu ai i le fale. Ia utagia lenei fautuaga, ia le auai lou aiga i le lisi o aiga loto fa’avauvau, i le vaitaimi o aso fiafia o lenei tausaga.”

 

I le saunoaga a Taeaofua, sa ia fa’amanatu ai i lana aufaigaluega, “Ia outou fautuaina aiga ma le fa’aeteete, ia sao sa outou upu ia puipuia ai lo latou lotoifale mai le so’ona fiafia ae galo ai, o le a fa’afoea ta’avale ma le fa’asua’ava, ma tauau e i’u ai i ni fa’anoanoaga. Fai sou sao lelei, fai ma le alofa la outou galuega!”

 

O le susuga le A’oa’o, Fereti Fa’apouli, o se tasi o faufautua i le matagaluega DHSS, sa ia si’itia le talosaga i le amataga, ma le fa’ai’uga o le sauniga mamalu. Sa ia fa’amanuia fo’i i le fonotaga fa’apitoa a le au usufono a le Pasefika o lo’o tatou talimalo ai.