Tutu fa’atasi ta’ita’i malo ma sui malo tele aloaia tautua 1st Lt. Jason Togi

I le tutu fa’atasi ai o ta’ita’i o le malo, sui o le malo tele, uo ma aiga e aloaia ma fa’amanatu le soifua tautua o le ali’i fitafita ia 1st Lt. Jason Asootama Atuatasi Togi e ala i se sauniga lotu sa faia i le malumalu o le Ekalesia EFKAS i Fagasa i le taeao ananafi, na fa’aigoa ai le Toa Samoa ua maliu o se tasi sa tu i matagiolo, ae o ia fo’i sa o le maluapapa sa puni matagi ai Samoa i tulaga i le lalolagi i fafo.

 

O le misia o le ali’i fitafita e lona aiga atoa ai ma le alofagia o ia e uo ma le toatele o tagata, na mafai lea ona molimauina i le tele o tusitusiga sa faapipi’i i vaega o le auala e aga’i atu i Fagasa, e le gata o lo o faapipi’i ai ata o le alii fitafita ae o lo o tusia ai upu aualofa ma saafiafiga o tagata e faatatau i lenei alii fitafita.

 

O le alii o B.G Daniel Karbler na taitaia maia le au malaga sa fai ma sui o Vaega au a le malo tele latou te momoliina maia le Sa o le alii fitafita i le po o le aso Gafua na te’a nei, o ia fo’i lea na tauaaoina ai pine taualoa i le faletua o le ali’i fitafita, o ona matua ma lona aiga, e aloaia ai le tautua a Jason i totonu o le malo tele.

 

O le afioga i le kovana sili sa fai ma sui o le malo o Amerika Samoa, ma le tofa ia Faleomavaega Eni Hunkin sa fai ma sui o le konekeresi e faaleoina le agaga faafetai i le faletua o le alii fitafita ua maliu ia Siosiana Akoteu.

 

Na taua e le alii kovana ia Lolo Matalasi Moliga i lana saunoaga e faapea, e ui i le faanoanoa ai o aiga ma le atunuu atoa i le maliu faafuasei o le alii fitafita ia Jason, peitai o le a avea lona maliu ma faataitaiga i tupulaga o le afioaga o Fagasa ma Amerika Samoa, ina ia fa’aaoga o latou ola talavou e fai ai faataitaiga lelei mo le atunuu.

 

“A’o le’i ulufale Jason i vaega au a le malo tele, sa ia iloa lelei le taunuuga o le avea ma fitafita o le malo, o le mafuaaga lena ua tatou potopoto faatasi ai i lenei taeao (taeao ananafi), e le gata tatou te faafetaia le tautua sa ofoina atu e Jason, ae tatou molimauina fo’i galuega lelei sa ia faia mo le malo tele faapea ai lona aiga ma le malo o Amerika Samoa,” o le saunoaga lea a Lolo.

 

I le tupu a’e ai o Jason i totonu o le afioaga o Fagasa, na taua ai e le alii kovana e faapea, o Fagasa o se afioaga e le vaai maualalo i ona tagata, ae finau ta’ita’i o le nuu ia ausia e tupulaga talavou lu’itau maualuluga ina ia manuia ai o latou olaga.

 

Na taua foi e Lolo e faapea, ua tele mea matautia ua faia e le afioaga o Fagasa e le i faia lava e tupulaga o isi afioaga i Amerika Samoa, ma o se lu’i fo’i lena mo tupulaga uma o le nuu, ina ia aua ne’i finau i mea faigofie a ia finau e fai mea faigata e pei ona faia e le alii fitafita o Jason, o le ofoina atu lea o lona ola e tautua ai lona atunuu ma lona aiga.

 

Na faaiu le saunoaga a le alii kovana i lona tauaaoina atu lea o le tagavai a Amerika Samoa i le faletua o Siosiana, e aloaia ai le tautua a Jason.

 

I le avea ai o Faleomavaega ma sui o le konekeresi e molimauina toe sauniga o le alii fitafita o Jason, e le gata sa ia tauaaoina mai ai le tagavai o le malo tele o Amerika ma tauaao atu i le faletua ia Siosiana, ae sa ia tuuina tau fo’i ni upu faalaeiau e faamafanafana ai lagona faanoanoa o le aiga.

 

Saunoa Faleomavaega e faapea, o le maliu o Jason, o se faataitaiga maualuga lea mo so o se fitafita o lo o tautua i vaega au a le malo tele, i le ofo atu lea o latou ola e puipui ai le saogalemu o le atunuu.

 

Na taua e le sui o le vaega au a le malo tele ia Karbler lona fiafia tele ina ua mafai ona ia feiloa’i atu i le aiga o Jason, aemaise ai o lona asia lea o le nuu ma tupu a’e ai o ia, ma aoga na aoaoina ai lona olaga tauivi.

 

Fai mai Karbler, e pei ona masani ai i isi fo’i fitafita e maliliu ona o le latou tautua i vaega au a le malo tele, e tulaga ai lava lana vaai i molimau sa ia maua mai uo ma aiga o le alii fitafita, i le ituaiga tagata e i ai o ia aemaise ai o le alofagia o ia e lona nuu, uo ma le ekalesia.

 

Na faaiu le saunoaga a Karbler i lona tauaaoina atu lea o faailoga tauaoloa i le tina ia Siosiana, o matua, uso ma tuafafine o Jason e tusa ai o le tautua a lenei Toa o Samoa i totonu o vaega au a le malo tele.

 

O le afioga i le alii senatoa ia Alo Faauuga na fai ma sui o le Fono Faitulafono e tauaao atu le i’ugafono malilie faatasi a le fono i le tina ia Siosiana, e aloaia ai fo’i le tautua a le alii fitafita i le atunuu ma le malo.

 

O faifeau o le afioaga o Fagasa na taitaia le sauniga lotou ananafi, ma viiga o le Atua na lagiina lava e le aufaipese a le Ekalesia EFKAS i Fagasa, ma ua faamoemoe o le itula e 10:00 i le taeao nei e faataunuuina ai toe sauniga o le alii fitafita ia Jason, ma lagomau ai loa i lona aiga i Fagasa.

Comment Here