Ads by Google Ads by Google

Tusiga & fa’asa’oga o le fa’agaoioia tupe toina mai Feterale

E lua aso na fa’atautaia ai le Semina mo le talosagaina o tupe toina mai le fetarale.  Sa aofia ai ma folasaga e fa’asinotonu i le toe fa’asa’oga o ni fa’aletonu e ono le toe agava’a ai matagaluega ma sosaiete tumaoti e toe talosagaina nisi tupe toina mai i le lumana’i.

 

“O lenei semina e soso’o mai ai le isi na mua’i faia, ma sa fa’atautaia lea i le potu fono a le ASTCA i Tafuna, ma sa iloga ona fa’ailoa ai le agaga fiafia o sui na tofia mai matagaluega ta’itasi o lo’o fa’atautaia nisi o latou galuega i ni tupe toina mai i lala eseese o le malo tele, e fa’aopoopo lea i le latou paketi,” o se fa’apupulaga a Mrs Fa’aalu Iuli, o le Alliance For Strengthening Families (ASADSV), lea sa tu’ufaatasia le semina i le vaiaso lenei.

 

Peita’i, ua faasalafa le galuega a nei sui iloga e to’afa na toe soso’oa maia le semina na mua’i faia ia ianuari, ina ia fesoasoani tele lava i sosaiete e le o fa’atupeina fo’i e le Malo po’o NGOs.

 

“O lenei vaega o le semina lea ua suati mai ai i luga uiga ma le matafaioi, ae maise tomai e mo’omia ona fa’atautaia ai e se tasi ua avea ma Ta’ita’i po’o le Fa’atonu o se Polokalama lana sosaiete galulue, po’o le aufaigaluega galulue i se matagaluega o lo’o fa’aaogaina tupe toina mai le malo tele e fa’atupe ai polokalama eseese e tautuaina ai tagata lautele,” o se fa’apupulaga lea a Judy Mata’utia o le ASADSV.

 

Pe afai o le autu o le tautua sa i ai i le talosagaina o le tinoitupe toina mai sa fuafua e fa’aalu sa’o mo galuega patino mo nisi o le atunu’u, e ao ina usita’ia uma le fa’atulagaga sa ta’ua ma ua pasia mai ai le fa’atupega, ae le mafai ona ese le fa’amoemoe na talosaga ai, ma le galuega o le a fa’atino i lea seleni.

 

“O le taimi e fa’atino ai tautua na fa’ailo, e ao ina maua lelei lea vaega o le galuega fa’atino. O le tinoitupe fo’i e fa’aaoga, e ao ina mausali le fa’aaogaina o le tinoitupe e tusa o le fa’atulagaga sa fa’ailo i le talosaga.”

 

O le va fo’i o le fa’atonu ma lana aufaigaluega, sa tautalagia. “Ia mautinoa e te le o so’ona faia au tagata faigaluega, ma so’ona lalafo i ai upu fa’atiga, pe fa’amaina i latou ina ua le fa’ataunu’uina a’ia’i latou tiute.”

 

O isi galuega tau le pule o se sosaiete po’o le matagaluega sa matua fa’ailoa patino, o lona va’ai toto’a lea o le fa’aaogaina o le tinoitupe fa’asoa mo so’o se vaega o lana galuega fa’atino i le tausaga atoa.

 

“Ia leai se mea e tasi e totoe o lana paketi, ae le o le so’ona fa’aaoga ai fo’i i mea e le o fa’atagaina i le tinoitupe ma lona aiaiga sa taua’ao mai ai,” o se tala lea a Mata’utia.

 

O se tala mai a le sui mo lea vaega tau Paketi Fa’asoa o le semina sa fa’atautaia lea e Arista Pedro, ma sa ia fa’ailoa, “Ia fa’aaoga ia uma lau tinoitupe na toina mai, afai e toe fa’afo’i se vaega, e le o se mea lelei, ae le mafai fo’i ona e so’ona fa’aaogaina ai le seleni, ia fa’aaoga e tusa o aiaiga na tu’uina mai, i lona taimi e tatau ai.”

 

E ese mai le galuega i totonu o sosaiete ta’itasi lava latou, ua fa’amalosia ma e tatau lava ona galulue feso’ota’i uma lava vaega o le malo i ana tautua eseese ma so’o se Sosaiete Tumaoti lava o lo’o fa’atula’ia e faia nisi tiute mo le mamalu lautele e tali tutusa ma tautua lautele a le Malo.

 

“O le galulue fa’atasi e matua malosi atili ai le auaunaga mo tagata o lo’o i ai le mana’omia, aua a tutu ta’ito’atasi, e le o lava le malosi e gafatia ona o’o ai le tautua i tagata uma.” O se tima’i lea a le tama’ita’i o Jennifer Awa mai le Asian Pacific Islander American Health Forum.