Ads by Google Ads by Google

Tusia e Tama o le 'LE TAVA'

TAMA O LE C.I.A. — Vaega #2

Sa tausaili nei e le tama o Eteuati le ala e alu i luga ma alu ai i fafo, a o le mea e fou uma ia te le mea lea e alu agai i ai. E le o iloa pe ua galo fo'i ia te ia le 'aai lea na tupu ai lea mea.

Na'o o le pau le mea na te iloaina, o ia na sau i Europa ae le iloa po'o le a fo'i le mea na sau ai i Europa e fai.

A'o savalivali naa te'i lava i le tau atu i le auala e pe'a ai i luga o le mea lea e i ai, na pe'a loa i luga le tama o Eteuati, o'o atu loa i le mea na e tapuni ai, ma tago loa e tatala.

Na tete'i tagata feoa'i i le matala o le tapuni u'amea ae 'oso ane ai le tama o Eteuati ma lavalava lelei na tafao ai i le po.

Na savali loa i le fale talavai (pharmacy), ua laki lava lona le inuina o le mea inu lea na ia nofo ma tu'u i totonu o lona gutu.

Ona o le malosi o le vai o'ona lea na i totonu o lana ipu, na o le manogi lava o le vai tago loa taofi i lona gutu, ae na te le'i foloina.

O mea uma nei sa 'ao'aoina i le CIA a'o fai a latou 'ao'aoga, a e iloa loa ua 'ese lau fa'alogo i se mea inu, taofi loa i totonu po'o le a lava le umi o i ai i totonu o lou fofoga, a ia taofi pea i totonu.

Na alu atu le tama ma fa'atau mai le tasi vai na te iloaina e mafai ona fufulu mai ai ona gutu ma ia pupu ai loa.

Ina ua uma ona ia faia le mea lea, sa 'oso mai lona fia ai, ona alu loa lea i totonu o le isi faleaiga, ma tago i totonu o lana taga ma aumai i fafo lana ato tupe, o loo taatia mai ai le ata o le teine lea na la tafafao i le po ua te'a, le ata lea sa pu'eina i le paka, ma ua amata ona toe vave manatua e le tama mea ia i lona mafaufau in a ua te'a le vai oona lea sa i lona gutu.

Ana sao i totonu le vai o'ona lea na fa'aona ai ia, fa'apenei ua maliu i le malosi o le vai o'ona.

Ua uma ona fai lana mea ai, ua toe savali i fafo e pu'e lana ta'avale laitiiti ma alu loa i le mea na nofo ai.

Ae ese le mea na ui atu ai le tama o Eteuati, ua taunu'u atu loa i le fale fa'atali pasi (bus stop) 'oso loa i fafo ta'amilo mai loa i tua o isi fale o loo tuaoi.

Na oso atu i le faitotoa i tua, fa'agatasi ma 'au tilotilo i totonu o le fale, na vaai atu loa ua leai ma se mea e fa'alavelave mai ma ua mautinoa, ona tago lea i le ki ma tatala ai le faitotoa.

E savali atu i totonu o le fale, ua fo'i mai ai le tagata, ua fola solo mea i totonu o le fale, ma na savali loa i totonu o lona potumoe, e alu fo'i ua pei lava ma sua ai ni pua'a.

E le'i i ai se mea o le fale e le'i lagaina, ua iloa lelei lava e Eteuati le mafuaga ua talepe ai totonu o le fale, o le fia iloa po'o ai se mea e iloa ai ia po'o fe'a fo'i e faigaluega ai.

Po'o le a le mea ua sau ai Europa ma faigaluega i totonu o le Banking Cooperation lea, ae o le mea moni lava e tetele totogi i Amerika pe ana faigaluega ai, nai lo Europa.

E malamala lelei lava Eteuati o le vaega o le Bank Cooperation lea na talepeina ma lagaina lona fale, a'o le tagata lea na taumafai e fa'aona ia, o le mea lena o lo'o tau su'e nei.

Ua malamalama lelei fo'i i ai Eteuati o le atunu'u fo'i lenei o lo'o i si fo'i lona sipai (spy) e iloa uma ai mea valea e fai e le vaega teu tupe, i le ta'i fia piliona.

O le atunu'u fo'i lea e mana'o ia na o latou lava e i ai le latou spy i totonu o le Kamupani tele lea, ae o lea fo'i e malasomia fo'i i isi vaega tupe o lo'o fa'aalu e fa'atupe ai le au terorisi.

Ae o le mea lena e le'i iloa fo'i e le tama o Eteuati, ua latalata ana su'esu'ega i ai.

E fai pea