Ads by Google Ads by Google

Tusi Atafale i Arapi- Talanoa Lesatele

I le olaga o se tasi o alo o le atunu’u o lo’o avea ma tusi ata fale o le Kamupani tele o le NAGA LLC, lea e i ai le latou Ofisa autu i Alapi ma le Ofisa o lo’o galue ai le alo o Samoa, Talanoa Lesatele, i Boston, Amerika.

O ia lea o lo’o fa’auluulu i ai le laina o i latou e tusiata mo fale tetele, i o latou fausaga e fuafua i le ituaiga o lo’o mana’omia ona fausia i luga o eleele mati’eti’e pe laugatasi ma isi mea uma tau le ituaiga tau e masani ona taia ai nei fale fa’atutu i na setete ma atunu’u eseese o le lalolagi.

O lenei alo o Samoa sa avea ma se tusiata i le tatou nei malo, ma sa fa’atautaia lana pisinisi tusi ata fale tuma’oti i lona ulufale mai i Amerika Samoa e afua mai le 1988 se’ia o’o i le 1992.

 Peita’i, na ia va’aia se avanoa lelei, ma ua ia fa’aaogaina e toe saili ai sona fa’ailoga i le tusi ata fale i le tatou Kolisi Tu’ufa’atasi ma ia sofa’ia loa lea avanoa lelei.

Na amata ana a’oga i le Kolisi mo lona fa’ailoga Associate of Arts i le Civil Engineering, ona fa’au’u lea i le tausaga 1992 se’ia o’o i le 1995. Maua ai lona avanoa e ulufale ai i le Savannah College of Art & Design, ma saili ai lona fa’ailoga Masters i le Art & Design in Architecture.

O lona tusi pasi lea sa mafai ona maua ai lana galuega mai le Alpahtech mo le tausaga e tasi 1997, soso’o ai ma le maua o le isi ona avanoa e faigaluega ai o se tagata fa’ata’ita’i i le Daniel E. Snyder Architects i le tausaga 1998.

O le isi ana galuega na soso’o ai o le avea lea o ia ma le Fa’atonu o le galuega na fa’atautaia e le Cowart Group Architects mo le tausaga e 1999-2000. Na soso’o lea ma le fa’afaigaluegaina o ia e le Gonzalez Architects o se Inisinia o fausaga o fale ma o le Pule fo’i i le galuega na amatalia mai ia Aperila 2000 se’ia o’o i le 2003, ma mae’a lelei ai lena galuega fa’atino.

O le isi galuega na soso’o ai mo Lesatele sa avea ai fo’i ma Inisinia o le fausaga o le fale mo le McNeely & Pauli Architects mai ia Setema 2003 se’ia o’o ia Iulai 2004.

Na soso’o ma le fa’afaigaluega o ia e Soa ma le Kamupani tele a Donald K. Olsen & Associates mo le fausaga o latou fale tetele ma e 2 tausaga 2 masina o lana tautua lena. I le taimi nei ua silia ma le 6 tausaga o lo’o avea pea o ia ma Regional Director o le NAGA LLC o se tasi o Kamupani o Inisinia mo Fale Tetele ma le fa’atulagaga o talafatai o se atunu’u i ona a’ai tetele. O lea Kamupani na fa’atula’ia e se ali’i Tusi Ata Fale Alapi i Dubai, ma ua o’o mai ona lala lea e faigaluega ai nei Talanoa Lesatele i Boston i Amerika.

O lo ua feso’ota’i i ai le tatou sui tusitala mo se talanoaga ma Talanoa Lesatele, ma ua ia tu’uina mai ai lona tala’aga lenei, ma sana fa’amatalaga aloaia, “Aisea ua e naunau mai ai e te fia iloa patino so’u agava’a po’o lo’u tupuga? E le o a’u o se tagata e fia lauiloa pe o mana’omia fo’i ona tala measina e tau i lo’u sui fa’atauva’a i luga o nusipepa?”

Ua fa’ailoa ia Lesatele, “O le tasi lea o agava’a o lo’o sailia ina ia to’atele nisi o alo o Samoa e agava’a ai, aua, e le’i atoatoa ona tusia se fuafauga mo le talafatai o lo tatou atunu’u i Pago Pago nei, e fa’atao’oto ma fausia aga’i i ai fale ma auala, ua na’o na i ai o se fuafuaga, ae le’i pasia e fa’amausali e fausia aga’i i ai galuega o le talafatai o Amerika Samoa. O se tasi lea ou sao e ao ina e taliu mai e fesoasoani i ou ta’ita’i e fa’atautaia!”

Ua i ai agava’a o alo o Amerika Samoa, pau le mea e ao ina faia, o le feso’ota’i i ai ma fa’ailoa ia i latou se pitola’au itiiti latou te fa’atinoina mai, ia mafai ona fa’agasolo aga’i i luma fuafuaga o le tatou malo, ma ia galulue aga’i i ai e atia’e le atunu’u i lona talafatai e lago lemu ai le tatou folauga.

O sana fa’amatalaga mai, “Ona o a’u sa ou va’aia se mea ou te fiafia e fai, ona ou taumafai loa lea e galue aga’i i ai, sa maumaua’i e tausinio mo se mea sili, lea ua tali mai le taumafaiga, fa’afetai ua ou maua se tulaga fa’apea ou te galue ai ma tausia ai lo’u aiga!”

saunia; Leua Aiono Frost