E ui o lea ua taoto malie le tau fofoina o le fa’afitauli e pei ona tula’i mai i ni isi o le aufai pisinisi laiti lea sa masani ona fa’atau a latou oloa i luga o le uafu i taimi e taunu’u ai va’a meli mai fafo, ao lea ua auina atu i malae i Fagotogo, peita’i na taua e le tofa ia Vaito’a H. Langkilde o se sui o le Ofisa o Turisi e fa’apea, o lo o i ai pea le manatu e talosaga i le Pulega o Uafu mo se avanoa e toe tu’u fa’atasia uma ai le aufai pisinisi laiti i luga o le uafu.

Na taua e ni isi o le aufai pisinisi laiti i le Samoa News, o le manaia lava o mea fa’apenei, o le tasi lea o le nofoaga e fa’atau ai oloa a le aufai pisinisi laiti uma i le taimi e taunu’u ai se va’a meli.

“Afai e tasi le nofoaga e fa’atau ai oloa a i matou nei o le aufai pisinisi laiti, o le a fa’a faigofie fo’i i turisi ona afea faleie o lo o fa’atau ai oloa ma galuega taulima”, o le saunoaga lea a le isi faipisinisi i le Samoa News.

Saunoa le afioga Vaito’a e fa’apea, o le agaga maualuga lava o lo o i ai i le Ofisa o Turisi, o le mafai lea ona maua avanoa e le aufai pisinisi laiti e fa’atau ai a latou oloa i luga o le uafu, i so o se taimi e afea ai le atunu’u e va’a turisi mai fafo.

Sa ia taua e fa’apea, o lo o fuafua e faia se latou fonotaga ma le Fa’atonusili o le Pulega o Uafu ma Taulaga pe a taliu mai i sana fonotaga i fafo, mo le toe fa’atalatalanoaina o lenei mataupu.

Saunoa atili Vaito’a e fa’apea, o se tasi o fa’afitauli o lo o mafua ai ona mana’omia se nofoaga tele i luga o le uafu i le taimi nei, o le teuina lea o oloa ma uta a va’a oloa ua vaaia le faulala’i ai, ae i ai le talitonuga e mae’a loa fo’i ona foia le fa’afitauli o lo o tula’i mai i fafo o lo o mafua ai ona tuai le aga’i mai o va’a oloa e piki atu uta ma oloa i le teritori, ona toe fo’i lava lea o le mataupu i lona tulaga manuia sa i ai, e le toe tele fo’i se vaega i luga o le uafu e mana’omia i lea aso ma lea aso.

Saunoa Vaito’a, o lo o taumafai pea ina ia maua se fesoasoani mo le aufai pisinisi a le atunu’u i so o se taimi e afea ai Amerika Samoa e va’a turisi, ina ia mautinoa latou te maua le avanoa e fa’atau ai a latou oloa i nofoaga lelei ma talafeagai mo i latou.

O le mataupu lenei na alia’e mai i le amataga o le vaiaso na te’a nei, ina ua fa’afuase’i ona fa’aitiitia e le Pulega o Uafu ma Taulaga le avanoa e mafai ai ona fa’atutu faleie mo le aufai pisinisi laiti e fa’atau atu ai a latou oloa ma galuega taulima i luga o le uafu, ma tula’i mai ai loa finagalo fa’asea o ni isi o le aufai pisinisi laiti, i le alu o tupe e totogi ai avanoa mo luga o le uafu ao lea ua fa’afuase’i ona fai suiga i le taimi mulimuli lava.

O ni isi o nofoaga na fa’ailoa i le aufai pisinisi e ono mafai ona fa’atutu ai faleie mo i latou, o le malae o le Su’igaula a le Atuvasa i Utulei, lea fo’i sa faaaoga mumaua e fa’atau ai a latou oloa ma galuega taulima, atoa ai ma le malae i Fagaotogo, lea na fa’aaoga i le taeao ananafi.

Na taua e se tasi o tina faipisinisi laiti e fa’apea, mai le tele o tausaga o auai i lenei ituaiga pisinisi, o le nofoaga sili lava ma taua e fa’atau ai ana oloa o luga o le uafu, aua o le nofoaga lea e faigofie i le tagata turisi ona ulufafo mai loa ma le va’a tau mai i ai lana vaai, ma mana’o ai loa e fai ai lana fa’atau.

O le va’a meli a le Marina lea na ia afea le atunu’u i le aso ananafi, e silia ma le to’a 1,200 le aofa’i o le pasese sa malaga mai ai, ma le aufaigaluega e sailia i le 800.

O lo o i ai le fa’amoemoe toe tasi le va’a meli o lo o totoe mo lenei masina.