Na fa’afofoga ma le toto’a afioga i faipule a’o fa’asoa e le Fa’atonu o le Matagaluega o Tupulaga Talavou, Tina ma Tamaitai mafua’aga e ala ai ona ia lagolagoina suiga i le tulafono, o lo o mafai ai ona fa’aipoipo se teineititi i le 14 tausaga, pe afai e malilie i ai ona matua, i se iloiloga sa faia a le komiti o Sailiga o Alamanuia a le maota o sui i le vaiaso nei.

O lea iloiloga sa auai ai le Loia Sili, sui o le Falemai fa’apea ai ma le Fa’atonu o le Matagaluega o Tupulaga, Tina ma Tamaitai, mo le fa’asoaina o ni o latou finagalo e uiga i le tulafono tau fa’aofi lea ua ta’oto i le maota o sui, e sui mai ai i le 14 tausaga i le 17 tausaga.

O molimau na aofia ai i lenei iloiloga, o Fepulea’i Ripley, Dr. John Tuitele, Leiataua L. Turner ma Seiuli E. Ponausuia mai le Soifua Maloloina.

Na saunoa Leiataua e fa’apea, afai e fa’aipoipo le tama’ita’i i le 14 o ona tausaga, e le’i taitai lava tapena lona mafaufau mo le fausaga o se aiga mautu, e le’i lava tapena foi o ia e avea ma se tina o se pepe fou, ae maise ai foi tulaga malosi o lona tino ma le mafaufau i le faia o fa’ai’uga mautu mo lona aiga.

Fai mai Leiataua, i le tele o suesuega sa mafai ona faia i le silia ai i le 20 tausaga o galue i lenei matata, ua manino ai, fa’atoa matua lelei lava le mafaufau o le tama ma le teine ma sauni e fai lona aiga pe a 21 tausaga le matua.

“Afai e faaipoipo le tamaitai i le 14 tausaga, e le gata e lei sauni lona mafaufau e atina’e lona aiga ma faatino ona tiute faatina, ae o le taimi foi lea e lei uma lana aoga, ma o se tulaga faigata tele lea pe afai e faaauau pea ona i ai lenei tulafono,” o le saunoaga lea a Leiataua.

Na fa’aalia fo’i e Leiataua, lona pogisa i se tulafono fa’apea, ae i lona talitonuga, ua fai lava si maualalo o tausaga o lo o fai mai le tulafono e mafai ona fa’aipoipo ai se teine pe afai ae malilie i ai ona matua.

Na saunoa le Loia Sili i le leai o se fa’aletonu i suiga ua taumafai i ai le komiti, ma e na te lagolagoina o se fa’ai’uga e faia e le Fono.  Ae na fa’aalia le lagolagoina e Dr. Tuitele ma Seiuli, o le suia o lenei tulafono.

Pau le atugaluga na fa’aleo e Fepulea’i, pe afai ae sui lenei tulafono, o se fete’ena’iga e ono tula’i mai, pe afai ae a’afia se tama’ita’i 14 tausaga i se ma’itaga le fuafua ma ua manana’o matua e fa’aipoipo ma le tama o le pepe, ae o lea ua fai mai le tulafono, e le mafai, se’i vagana ua 17 tausaga.

Na fa’aalia e Leiataua e fa’apea, e tusa ai ma ripoti ua mafai ona tu’ufa’atasia e lo latou ofisa, o lo o ta’ua ai le i ai o ni tama’ita’i e na’o le 11 tausaga, ae ua avea ma tina.  Ae o le fa’afitauli ua tula’i mai, ua ave le pepe e tausi e isi tagata po o ni isi o le aiga, ona e le’i taitai matua le mafaufau o le teineititi e tausi lana pepe.

I le avea ai o Leiataua ma se totino o le fa’alapotopotoga o lo o fa’asaga tau i ma’itaga le fuafuaina i tama’ita’i talavou (Teen Pregnancy Coalition), na ia ta’ua ai e fa’apea, i su’esu’ega sa mafai ona latou faia na maua ai, afai e 1000 pepe e fananau, o le 300 i le 400 o ia pepe na fananau mai i tamaitai e i lalo o le 19 tausaga le matutua, ma o pepe nei e ta’ua i gaioiga fa’a Soifua Maloloina, o lo o i ai i tulaga fa’ava’ava’aia, ona e lei matua le tina i le tino ma le mafaufau na te tausia ai lenei pepe.

O se tasi o mataupu na fesiligia ai e le afioga i le alii faipule ia Taotasi Archie Soliai le Loia Sili, pe i ai se fete’enaiga o le tulafono lenei ma le tulafono lea e fa’asa ai ona faia ni uiga mataga i fanau e i lalo o le 16 tausaga le matutua, peitai na saunoa Fepulea’i, e leai se fete’ena’iga.