Ads by Google Ads by Google

Tupe a Fanau - Matua maliliu i le Galu Lolo

“...E fa’apenei uma tama’ita’i o Amerika Samoa, e le fefefe ma galulue malosi?”

 

O le fesili le e fesiligia ai Laura Lafoia Ava - Tesimale mai Pavaiai, e le to’atele o tagatanu’u o Afakanisitana, Pakisitana, Isaraelu ma atunu’u uma o le vevesi, lea ua leva ona femaliua’i ai lenei alo o le atunu’u ma faia lana misiona alofa, e fa’ailoa ai lona ola fa’atuatua, “e tatau lava ona o’o atu sina fesoasoani i fanau ma aiga o pagatia i taua ma fevaevaea’iga.”

 

“Peita’i, e ui lava ina ua mamao ma atunu’u sa fesavalia’i ai ma taumafai e fa’ao’o atu se fesoasoani i aiga, ma ua va’aia e le utuva le fa’anoanoa ona o omiga o taua ma fevaevaea’iga.

 

O le toe o’o mai o Laura Tesimale, ua sau ma se oso aoga tele mo fanau uma lava sa motusia fa’afuase’i le mafutaga mafana i totonu o latou aiga ma nisi o latou matua, ona o le galu lolo ia Setema 29, 2009.

 

Ona o le Fa’alapotopotoga na amatalia e Laura Lafoia Ava Tesimale ma o lo’o avea fo’i o ia ma peresetene,  e fa’aigoaina “Tasi le Aiga i le Kelope” [One Global Family Foundation] i Kalefonia i Saute, lea ua matua femaliua’i solo ai o ia e fa’ao’o lana auaunaga i so’o se aiga o lo’o pagatia. Ua ‘au’au fa’atasi i latou fa’atasi ma isi fa’alapotopotoga e fa’ao’o mai sina fesoasoani tupe mo fanau a Samoa na lua i le atoaga o le fa tausaga talu ona tupu lea fa’alavelave fa’afuase’i fa’anatura ia i tatou.

 

Manatua, e ao ina taua’aoina lou lipoti mulimuli o le a’oga sa e i ai, ma ia pipi’i fo’i le suafa o le tagata ua maliu i le Tsunami i lou pepa fanau.

 

O se taimi muamua lea ua toe taliu mai ai Laura Ava Tesimale ma lana tautua i Amerika Samoa, ma sa ia fa’ailoa mai, “E tusa po’o le a lava le umi o malaga i fafo ma nofo tumau ai, ae le motusia la’u fa’asamoa, gagana ma lo’u agaga o le Samoa, e lalamua lava le alofa atu, fia tausoa fo’i le fita o le motusia o le mafutaga ma matua i totonu o le aiga.”

 

O le fesoasoani tupe lea, e mafai ona fa’aauau se’ia mae’a lava a’oga a nei fanau ua agava’a ai. E amata mai le ta’i $100 seia o’o i le $360 i le tausaga. Peita’i, ua fa’atautaia le tufatufaga lea o le a ulua’i faia i le ta’i $100 mai le tausaga 2002 ma le 2013 lenei, ona maua ai lea o le $200 e taua’aoina atu.

 

E ese mai lea fesoasoani tupe, ae ua i ai fo’i pusa oloa o Nofoa Fa’ata’avalevale e 550 o le a to’ai taunu’u muamua i Samoa ia Oketopa 6, 2013. E tu’uina i Samoa le 500, ae fa’ae’e mai le 50 e tufa fua fo’i mo nisi ua sili le mana’omia o i ai.

 

Peita’i, o le mae’a atu o lenei malaga ta’amilo, e toe taliu atu Laura Tesimale, ona tu’ufa’atasia lea o le pusa oloa o Nofoa fa’ata’avalevale e 550 mo Tutuila, Aunu’u ma Manu’a.

 

Manatua o lenei fesoasoani tupe e fa’aauau fo’i i lea tausaga, ma tausaga o totoe e te a’oga ai, oe lea e agava’a ai, peita’i, e tatau ona fa’ao’o atu i le meli lou lipoti ma fa’amaumauga e mo’omia mai, ona maua lea o lau fo’i seleni. E taulia fo’i a’oga matata eseese pe afai o a’otauina ai nisi o fanau.