Ads by Google Ads by Google

Tumau pea va aufai faatoaga ma le pulega maketi

O le mumugaveve lea o lo o faaauau pea ona tula’i mai i le va o le pulega o le maketi fou i Fagatogo ma ni isi o le aufai faatoaga mai le tele o aso ma masina, na toe tulai mai foi i le aso Sa na te’a nei, ina ua momoe i fafo o le maketi ni isi o le aufai faatoaga i le fiu e faatali le taimi e tatala ai le maketi, ma i’u ai loa ina valaau e ni isi o le aufai faatoaga i le Kovana Sili mo sana faatonuga e tatala ai le maketi.

E foliga mai e mavae atu nofoaiga ai kovana o lo o auaua’i mai i le nofoa o Tutuila ma Manu’a, ae tumau pea le va o le aufai faatoaga i le maketi i Fagatogo ma le pulega o le maketi.

E le’i umi se taimi ae taunuu le afioga i le kovana sili, tofa Lolo Matalasi Moliga i le maketi, ma e silia i le 2 itula na i ai le kovana i le maketi i Fagatogo ae faatoa taunuu atu le sui o le maketi ma le ki e tatala ai le maketi.

Na taua e Johnson e faapea, o po o aso Sa uma lava, e tatala ai le maketi mo le aufai faatoaga, e o atu e tapena a latou laulau ma faatulaga a latou fua o faaeleeleaga mo le faatauina atu i le atunuu i le taeao o le aso Gafua e sosoo ai.

Ae o le faafitauli na tulai mai i le po o le aso Sa na te’a nei, ua fiu le aufai faatoaga e telefoni i le alii lea e masani ona tatalaina le maketi e alu atu e tatala le maketi, ae foliga mai e musu, ma i’u ai loa i lona valaau i le kovana mo se fesoasoani, ina ua vaaia le aufai faatoaga ua momoe i luga o le sima ma fafo o le maketi.

“O le mafuaaga lena na ou telefoni ai loa ia Lolo, ma ou talosaga i ai faamolemole, pe mafai ona fai sana faatonuga i le aufaigaluega o le maketi, ina ia tatala le maketi mo le aufai faatoaga lea ua momoe i luga o sima ma fafo i le malulu o le po,” o le saunoaga lea a Johnson.

Pe tusa o le itula e 9:00 i le po lea na taunuu ai loa le afioga i le alii kovana sili ia Lolo i le maketi i Fagatogo, ma latou feiloa’i ai ma le aufai faatoaga.

“Pe tusa o le lua itula talu ona taunuu le alii kovana ae faatoa taunuu le sui o le maketi ma le ki e tatala ai le maketi,” o le molimau lea a Johnson.

O le aso Gafua la na te’a nei na faia ai loa se fonotaga faapitoa a le alii kovana ma le Komiti o lo o faafoeina le vaavaaia o le maketi i Fagatogo, mo le tau faamautuina o ni isi o faafitauli o lo o tulai mai.

Na taua e le Sui Faatonusili o le Matagaluega o Faatoaga ia Peter Gurr e faapea, e le o malamalama o ia i le mafuaaga e ala ai ona naunau le aufai faatoaga o lo o faaaogaina le maketi, e tatala le maketi i le aso Sa, ae o lo o avanoa le vaveao o le aso Gafua e tapena ai a latou fuafuaga e pei ona latou taua.

Saunoa Gurr, ina ua maea ona latou feiloai ma le alii kovana ia Lolo, ua ia faia ai le faaiuga o le a latou usita’i ma faatino faatonuga e tuuina atu e le alii kovana.

“Pau la matou galuega lea ua fai i le taimi nei, o le usita’i ma faalogo i le kovana, ae faitalia ai pea le aufai faatoaga o lo o i ai i le maketi i Fagatogo ma a latou fuafuaga o lo o fai, ae i lo’u taofi, e le o se mea talafeagai le tatala o le maketi i le aso Sa,” o le saunoaga lea a Gurr.

Ae na saunoa Johnson e faapea, e le o naunau i latou e tatala le maketi i le aso Sa mo ni faatauga, pau le latou talosaga, ia tatala le maketi mo le aufai faatoaga i le po ina ua mae’a le aso Sa, ina ia mafai ai ona latou o atu e faatulaga a latou laulau ma salu mama le fale, e sauni ai mo faatauina atu o a latou faatoaga i le aso e sosoo ai.

Sa ia taua foi e faapea, e le fou le gaioiga lea a le aufai faatoaga o le tatala o le maketi i le aso Sa, e le gata sa fai i le maketi tuai sa i ai, ae sa fai foi i le maketi le tumau i Pago Pago, peitai e foliga mai e mafua ona le galulue faatasi le pulega o le maketi ma le aufai faatoaga, ona e le o iloa tonu po o ai e pulea le maketi.

Ae ui i faafitauli e pei ona maitauina i le va o le aufai faatoaga ma le pulega o le maketi, o le itu e sili ona taua i le aufai faatoaga, ua maua le avanoa e asia ai e le alii kovana le tulaga sa i ai latou i le aso Sa te’a nei.

Ina ua maea le tatalaina o le maketi o Fagatogo i le 3 tausaga talu ai, na tofia ai loa e le afioga i le matua ia Togiola Tulafono ao avea ma kovana sili, Faatonusili o Matagaluega e tolu a le malo, e avea ma komiti latou te vaavaaia ma mataituina gaioiga i le maketi fou.

O ia matagaluega e aofia ai le Ofisa o Faatoaga, Ofisa o le Vaomatua ma le Gataifale (DMRW) ma le Ofisa o Fefaatauaiga ma Alamanuia (DOC)