A’o le’i tula’i ese le afioga i le matua ia Togiola Tulafono mai le tofi kovana i le vaiaso nei, sa ia faalauiloa ai i luga o lana polokalame mulimuli i le aso Toona’i na te’a nei le tumau pea lea o lona le lagolagoina o le manatu, ua tatau ona faaapuegaina leoleo o le malo.Ina ua fesiligia e se sui o le alaleo faasalalau a le KSBSFM 92.1 le afioga a Togiola i luga o lana polokalame, pe ua alaga tatau ona faaaupegaina leoleo, na tali Togiola, “e leai.”Ina ua toe fesiligia o ia i le mafuaaga o lona finagalo, na saunoa Togiola e faapea, e tumau pea lona lagolagoina o le tulafono o lo o i ai e faatatau i le le tatau lea ona faaaupega leoleo a le malo.I lona talitonuga, afai o le a pasia se tulafono e faaaupegaina ai leoleo, ua lava lea e ta’u atu ai i le atunuu, o se mea lelei le faaaupegaina uma o tagata.“O fana ma aupega, e le o ni mea lelei ma talafeagai ia mo Samoa, e le tatau foi ona teua i o tatou aiga ia ituaiga aupega,” o le saunoaga lea a Togiola.Sa ia taua foi e faapea, e le faapea na te le lagolagoina le saogalemu o leoleo, ae afai e tofu fana leoleo, lona uiga o le a tofu fana uma foi tagata lautele.Na pau le itu o lo o lagolagoina pea e Togiola, o le tulafono o lo o i ai e faataga ai le umia o fana laiti e leoleo ai faatoaga i totonu o aiga.Fai mai Togiola, afai o le a faataga fana, lona uiga o le a i ai taimi e faaaoga sese ai e isi, pe afai e augata e a’e i luga o le niu e toli mai popo, ona faaaoga lea o le M-16 e tafana ai popo, pe faalalo ai foi se moa (tulou), e aunoa ma le a’e i luga o le niu poo le pu’e foi o le moa.O le mataupu e faatatau i le faaaupegaina lea o leoleo, na alia’e mai ina ua tulai mai le faalavelave lea na tagatavaleina ai e se alii le alii leoleo suesue o Lt. Det. Liusila Brown i le masina o Iulai 2010.I le maea ai o lea faalavelave, na saunoa ai loa le Komesina o Leoleo i lena vaitaimi, le tofa Tuaolo M. Fruean e faapea, ua oo i le taimi ua tatau ai ona faaaupegaina leoleo o le malo mo le puipuiina o latou saogalemu, ao galulue ai e faatino la latou tautoga i le puipuiina lea o le saogalemu o tagata lautele.Na taua e se tasi o tamalii o le atunuu ua loa tausaga o tautua i le Fono Faitulafono, o ia foi o se fitafita tuai sa tautua i vaega au a le malo tele o Amerika, tusa lava poo fea e oo i ai le matuia ma le le saogalemu o le faatinoina o galuega a leoleo, na te le lagolagoina lava le manatu e faaaupega leoleo.Fai mai le manatu a lea tamalii, o le taimi lava e pasia ai le tulafono e faaaupega leoleo, o le aso foi lena o le a amata molimauina ai e taitai o le atunuu le toto masaa i totonu o Amerika Samoa.