E ui o lea ua tu’uina mai le tali a le pulega o le Fa’alapotopotoga o le Eletise ma le Suavai (ASPA), e uiga i le mataupu na mafua ai ona faaalu a latou tupe e totogi ai faasalalauga i luga o le Samoa News, e tau faapupula ai le mataupu e uiga i ripoti i le latou tupe mama o lo o i ai, peitai o loo tumau pea le le talitonu i ai o nisi o le mamalu o le atunuu.Na faamanino e sui o le pulega a le ASPA i luma o le komiti a le Senate i le vaiaso na tea nei, na mafua ona faia a latou faasalalauga i luga o le nusipepa e faamanino ai ripoti fai mai o loo i ai sa latou tupe mama, ina ia malamalama tagata totogi pili e le sao ia ripoti.Sa fesiligia e Senatoa Velega le ASPA e uiga i finagalo o le atunuu i le maimau o nei tupe sa totogi ai faasalalauga faapisinisi e tau faamalamalama ai le tulaga o tupe mama, ae ana sefe nei tupe e faatino ai se isi tautua o talafeagai.Na taua e Ryan Tuatoo i luma o le komiti o le ASPA/TEO a le Senate, o tupe ia na faaalu e le ASPA e totogi ai faasalalauga faapisinisi i luga o le nusipepa, o ni tupe sa alu aoga, ina ia faamanino ai i tagata totogi pili tulaga sao e uiga i tupe a le ASPA.Ae na taua e nisi o tamalii o le atunuu i le Samoa News, aisea la na le faia ai e le ASPA ni a latou faasalalauga faapea e faamanino ai le mataupu e uiga i fesili a tagata e faatatau i Ponesi ia sa totogi atu i nisi o tagata faigaluega, poo isi foi finagalo faaalia a le atunuu e uiga i le paketi lea foi e aofia ai le itu tau tupe.“E le sao le manatu a le ASPA fai mai o faasalalauga nei ina ia tau faamanino ai tulaga o le ripoti i tupe mama, o le mea moni lava, afai o le latou mau lea, e tatau la ona faapena uma lava auala latou te tali mai ai i isi mataupu o loo fia malamalama i ai tagata totogi pili e pei o ponesi ma tulaga i le latou paketi,” o le finagalo lea o le afioga a Pulu Ae Ar Jr.O le finagalo foi lea o le afioga ia Amituanai Sofeni na faaalia i le Samoa News e uiga i lenei mataupu.Saunoa Amituanai, afai ua manatu le ASPA e faaalu se vaega tele o ana tupe e faamanino ai i tagata totogi pili le sa’o o le ripoti i a latou tupe mama, e tatau foi la ona latou faia faapena isi lava mataupu e tuu fesili ai le atunuu, e pei o le mataupu i ponesi.“Ou te fia malamalama foi a’u i le mataupu e uiga i ponesi a le ASPA ia sa totogi atu i nisi o ana tagata faigaluega, ae o lea e lei faia ni a latou faasalalauga faapisinisi e faamalamalama mai ai lea mataupu i tagata totogi pili e pei o a’u,” o le saunoaga lea a le afioga Amituana’i.O le ripoti na tuuina mai e le malo i le kuata lona fa o le tausaga tupe na tea nei, sa taua ai se tupe faasili a le ASPA e tusa ma le $8.8 miliona, ma o lea ripoti na lagalaga ai finagalo o nisi i le i ai lea o ni tupe faasili a le ASPA, ae o lea lava o loo fai pea a latou siitaga i pili uila ma le vai.Na tali le pulesili a le ASPA o Andra Samoa, e lei sao le auala na ripotia ai e le vaega faasalalau lenei ripoti, ma o faasalalauga foi ia na mafua ai ona manatu nisi o loo i ai ni a latou tupe faasili, e ui e le o moni ia ripoti, ona o loo feagai pea le ASPA ma tulaga faaletonu i le itu tau tupe i le taimi nei.O loo i ai le faamoemoe e toe faia se isi feiloaiga a le ASPA ma le komiti a le Senate i se taimi o i luma, e soalaupule ai nisi o tulaga e uiga i lenei lava mataupu, aemaise ai lava i sii a le ASPA.