Ads by Google Ads by Google

Tumau pea le le lagolagoina Lolo lafoga 2% mo le LBJ

Ua fuafua le afioga i le kovana sili ia Lolo Matalasi Moliga, o le a faaauau pea ona ia talosagaina le lagolago a le Fono Faitulafono mo le aveesea lea o le tulafono lea na pasia ai le lafoga e 2% mai totogi o tagata faigaluega na pasia e fesoasoani ai i le falema’i o le LBJ, ona o ni isi o ana mafuaaga tatau.

 

Na taua e le alii kovana i lana ripoti tusitusia sa tuuina atu i le Fono Faitulafono i le aso Gafua na te’a nei, e le gata e le o se tulafono tala feagai lea tulafono i le tamaoaiga o tagata lima vaivai ma i latou e le malolosi lo latou tamaoaiga, ae atagia mai ai fo’i e le o tagata uma o lo o aofia i le totogiina o lea lafoga.

 

E ui o lo o matua manaomia e le falema’i tulaga tau tupe e fesoasoani ai i lana atina’e, peitai na saunoa le alii kovana e faapea, e tatau ona fau le tulafono ina ia tutusa mo tagata uma.

 

Mo se faataitaiga e pei ona taua e le alii kovana i lana ripoti, o se tagata faigaluega e na o le $10,000 lona totogi i le tausaga, ae to’aono lana fanau o lo o tausi, ona tipi lea o lana 2% mai lona totogi, toe tipi le 4% mo lana lafoga, faatusatusa i le tagata o lo o i ai sona fale mautotogi, e $4,000 na te maua i le masina, e le totogiina sana lafoga e 2% mo le LBJ, se’i vagana ai le 4% o le lafoga o lo o tipi, ae maualuga atu lana tupe maua nai lo le tagata faigaluega.

 

“O le auala lenei e le gata e le talafeagai mo le teritori, ae foliga mai fo’i o lo o totogi e le tagata e maualalo lona tamaoaiga le tupe mo le soifua maloloina a le tagata o lo o i ai ana fale mautotogi toe maualuga lana tupe o lo o maua, ma o se tulaga lea e matua le talafeagai mo le tagata lima vaivai,” o le saunoaga lea a Lolo.

 

O se tasi o mataupu taua sa taua e Lolo i lana ripoti i luma o le Fono, o se fuafuaga e fesoasoani ai i le toe tatalaina o le polokalame lea e auina atu ai gasegase i fafo mo togafitiga (off-island referral program), lea ua tele tausaga o tapunia ona o le leai o se tupe e faatino ai.

 

I lana malaga mulimuli lava i le tausaga na te’a nei i Hawaii e pei ona taua e le alii kovana, sa amata ai ona ia talosaga i taitai o le falema’i a le militeli i Hawaii, le Tripler Army Medical Center ina ia toe vaavaai i auala e mafai ai ona fesootai mai i le falema’i a le atunuu, le LBJ mo auala e auina atu ai gasegase i fafo mo togafitiga, faapea ai le galulue faatasi ma tatou foma’i i tulaga o le tautuaina o gasegase atoa ai ma le sapalai o vailaau ma fualaau.

 

Ina ia faaleleia atili tulaga e pei ona taua, ua tofia ai e le alii kovana se Komisi faapitoa latou te vaavaai i tulaga uma nei, ina ia faagaioi ma faaauau mo le manuia o le soifua maloloina o le atunuu.

 

O le isi mataupu sa taumafai le alii kovana e saili i ai se fesoasoani, o se Inisiua e fesoasoani ai i le 20% o tagatanuu o Amerika Samoa e le o mafai ona agavaa i faamanuiaga tau inisiua, ma fesoasoani ai i le totogiina o a latou talavai i le falema’i, e ala i le auai lea o Amerika Samoa i le polokalame inisiua a le setete o Hawaii (Hawaii Insurance Exchange Program).

 

“O le fautuaga sa latou tuuina mai, ia ave pea la tatou faamuamua i auala e faaleleia ai polokalame mo le tautuaina o tatou tagata i le falema’i, ona o lo o fetaia’i fo’i le setete o Hawaii ma a latou fo’i faafitauli i le polokalame o le latou inisiua,” o le saunoaga lea a Lolo.

 

E 45 aso lea ua tuuina atu e le alii kovana i le Komisi Faapitoa ua ia tofia, ina ia latou vaavaai i auala e maua ai alagatupe e fesoasoani ai i le falema’i i lalo o le polokalame o le Medicaid, vaavaai i le tulaga aoga o le polokalame o le Medicaid mo Amerika Samoa, ma faailoa mai se taimi tonu e talafeagai mo nei polokalame.