E ui i le fa’amavae ai o le susuga a William E. Haleck mai le tofiga o le Komesina o le Matagaluega o le Puipuiga o le Saogalemu Lautele, peita’i o lo o tumau pea lona lagolagoina o se taumafaiga sa ia amataina mai i le tausaga ua mavae, o le fa’a ‘aupegaina lea o leoleo a le malo.

O le vaiaso nei na fa’alauiloa aloaia ai e Haleck i le Samoa News lona fa’amavae mai le tofiga o le Komesina, ona ua manatu e toe fo’i atu e mafuta ma lona aiga o lo o aumau i fafo, lea ua tele tausaga o latou valavala ona o lana auaunaga i le malo o Amerika Samoa nei.

I le fa’amavae ai o Haleck mai le tofi komesina, ua tofia ai loa e le afioga i le alii kovana ia Lolo Matalasi Moliga le afioga ia Save Liuato Tuitele e avea ma Komesina le tumau.

Na taua e Haleck i le Samoa News e fa’apea, ua manatu e fa’amavae mai lona tofiga o le komesina, ina ia maua ai se avanoa e mafuta ai ma lona aiga ua tele tausaga o tuua ona o le manatu e fa’atino lana auaunaga mo Amerika Samoa.

“O la’u malaga e mafuta ma lo’u aiga i aso fiafia na se’i mavae atu nei, na oso a’e ai se lagona ia te a’u, ua tatau loa ona tuua la’u galuega ae fa’aalu aso o lo o totoe o lo’u ola ou te mafuta atu ai i lo’u aiga, aua ou te le iloa po o le a le umi o aso o lo o totoe mo a’u mai le Ali’i, ae lelei le o o mai o le valaau ae ua lava se taimi ou te mafuta atu ai i si o’u aiga”, o se vaega lea o le saunoaga a Haleck.

“Na ou tuua lava lo’u aiga talu mai le tausaga e 2003 ina ua ou malaga mai iinei ma amata ai la’u auaunaga, sa fai lava ma alu e asi le aiga i ni isi o taimi, peita’i o le taimi lenei, ua ou manatu ai, ua talafeagai ona ou fa’amavae ae toe fo’i e mafuta ma lo’u aiga i fafo,” o upu faaopoopo lea a Haleck.

I le tofia ai o Haleck e Lolo ma Lemanu e avea ma Komesina o leoleo i le lua tausaga ua tuana’i, sa ia galue malosi ai e si’itia le tautua a le Matagaluega i so o se auala e auauna atu ai i le atunu’u.

O se tasi o mataupu sa ia taumafai e fa’amautu, o le fa’a ‘aupegaina lea o leoleo ina ia mafai ai ona puipuia lo latou saogalemu i taimi e tali atu ai i fa’alavelave e tutupu i le atunu’u.

Ina ua fesiligia e le Samoa News ia Haleck i sona finagalo e tusa ai o lenei mataupu, sa ia taua ai le tumau pea o lona manatu e tatau lava ona fa’a ‘aupega leoleo.

“Silasila i fa’alavelave ia ua tutupu mai, e le gata ua tafana le Ofisa o Leoleo i Leone, a o lea fo’i ua lavea le leoleo ina ua manu’a i le pulufana, afai la e fa’aauau pea nei fa’alavelave ma tafana ai nai leoleo, e fa’apefea ona tali atu leoleo pe afai e o atu ae toe tafana mai fo’i, e tago i le ma’a?”, o le saunoaga lea a Haleck.

“Ou te tatalo ia manuia le tula’i mai o le afioga a Save i le ta’ita’iina o le galuega, atoa ai ma le lagolagoina o le mataupu sa ou taumafai mai i ai, i le si’itia lea o le auaunaga a le Matagaluega i le atunu’u”, o le isi lea saunoaga a Haleck.

I le poloaiga na sainia e Lolo i le aso 6 Ianuari 2015, lea na tu’uina atu i lala e tolu o le faigamalo a Amerika Samoa, o lo o ia fa’amaonia ai le tofia o Save e avea ma komesina le tumau o le matagaluega o leoleo.

Na taua e Lolo i lana poloaiga e fa’apea, o le a fa’atino e Save tiute tauave uma sa fa’atino e le komesina, ina ia tusa ai ma le tulafon, na te fa’atinoina fo’i fa’atonuga uma ma poloaiga e tu’uina atu e le kovana.