Na fa’ailoa e le alii kovana ia Lolo Matalasi Moliga i le Fonotaga a lana Kapeneta i le vaiaso na te’a nei e fa’apea, o loo to’atele pea Ofisa o le malo e le o usita’i i ala o le tulafono, ma o ni isi ia o auala o loo mafua ai ona a’afia pe taofia ai fo’i tupe mai le feterale o loo tu’uina mai mo Amerika Samoa, ona e le o mulimulita’i Amerika Samoa i ala o le tulafono o loo lima ta’ita’iina ai le fa’aaogaina o tupe.

Na fa’atatau le saunoaga a le alii kovana i tulafono o loo fa’atautaia ai le fa’atauina mai o oloa mai fafo, lea o loo puipuia ma fa’amalosia e le Ofisa o Oloa ma Fa’atauga a le malo (Procurement Office).

Mo se fa’ata’ita’iga e pei ona saunoa le ali’i kovana, e i ai le uta o meleni a le Polokalame o le School Lunch na aumai i le atunu’u, lea e toeititi lava atoa le 1,000 o meleni sa fa’atau mai fafo, ae ina ua saili atu i fa’amaumauga a le Ofisa o Oloa a le malo, e lei uia ala o le tulafono, e leai fo’i ni pepa e fa’ailoa mai ai o loo i ai se oka o meleni o loo fuafua le Ofisa o Aoga e aumai i fafo.

“O la’u fautuaga lea ua ave i le Pulesili o le Ofisa o Oloa ma Fa’atauga, tusa lava pe i ai tupe a le Ofisa e fa’atau mai ai a latou oloa mai fafo, ae afai e leai se pepa na faia ai se oka i le latou ofisa, aua le totogia le fa’atau lea,” o le saunoaga lea a Lolo sa tu’u sa’o atu i le kapaneta.

Na fa’apupula atili e Lolo i le kapeneta e fa’apea, o le mafua’aga tonu lena na faavae ai le Ofisa o Oloa ma Fa’atauga a le malo, e ui uma i ai soo se fa’atauga e fia fai mai fafo, ina ia mautinoa o loo mulimuli ta’i Amerika Samoa i ala o le tulafono mo fa’atauga a le malo.

“Aua e te faia se gaioiga e aafia ai le malo i lalo o le tulafono, o lea ua taoto ala o le tulafono, o le fautuaga mo outou, usita’i ma mulimulita’i i ala o le tulafono, afai e i ai ni faatau e fia faia mai fafo, valaau ni kamupani se tolu pe fa e aumai a latou tau, ona fuafua lea o le tau e pito sili ona taugofie ma lelei, o le tau lena e ave i le Ofisa o Oloa ma Fa’atauga e tuu i totonu o a latou fa’amaumauga, ina ia mautinoa ai sa uia ala o le tulafono,” o le isi lea toe fa’amanatu a Lolo i le kapanetea.

Na toe fa’amamafa e Lolo i le kapeneta e fa’apea, soo se faatauga lava a ofisa ma matagaluega e fai mai fafo e aunoa ma le uia o ala o le tulafono, e aafia ai lava le malo.

“Mo le Ofisa o Aoga, e le tatau ona pule lava outou i le pisinisi poo le faleoloa e fa’atau mai ai a outou oloa mai fafo, tusa lava pe faapea o tupe lava a le polokalame o le School Lunch o loo faatau mai ai oloa, e le avea lena ma auala e pule ai lava outou i le faleoloa poo le pisinisi e fa’atau mai ai a outou oloa, o le mafua’aga lena na faavae ai le Ofisa o Oloa ma Fa’atauga a le malo, ia faatoai uma i ai soo se fa’atauga e mana’omia,” o le fautuaga lea a le alii kovana.

Na talosaga le afioga i le ali’i Komesina o Leoleo ia Save Liuato Tuitele i le alii kovana, pe i ai se avanoa e fa’aagafua ai le tulafono pe afai o se faatau e fia fai mai fafo ae i lalo ifo o le $10,000 lona tau.

Saunoa atili Save e faapea, ina ia faafaigofie mo ofisa o loo i ai a latou faatau e i lalo ane o le $10,000 le tau, e tatau ona i ai se auala e uia ina ia faa faigofie ai faagaioi le faiga o faatau laiti nei, nai lo le tau uia o le auala o loo manaomia mo faatau tetele.

Saunoa le alii kovana e fa’apea, poo le a lava le auala e uia mo soo se faatauga mai fafo, e tatau lava ona uia ala o le tulafono.

Sa ia taua fo’i e fa’apea, o le agaga atoa o le malo, ina taumafai lava e faia auala e taofia ai le faatalale o matagaluega ma le usita’i ai i le tulafono.

Na faamamafa atili e Lolo e faapea, o le tele o alagatupe a le feterale o loo maua e Amerika Samoa o loo i le lisi o le ‘high risk’, e mafua mai ona o le le usitaia lea e matagaluega ma ofisa o ta’iala o le tulafono o loo tuuina mai e lima taitaiina ai le faaaogaina o tupe.