Ads by Google Ads by Google

Tulimata’i toatele avanoa faigaluega a le StarKist

Ua faailoa e ni isi o le mamalu o le atunuu na fesiligia e le Samoa News, aemaise lava ia i latou o lo o saili galuega i le taimi nei, le tulimata’i o le latou vaai i avanoa faigaluega ia ua folafola mai e le pulega a le kamupani o le StarKist Samoa, e maua i se taimi o le tausaga nei.

O ni isi o i latou o lo o tau sailia ni a latou galuega i le taimi nei, ua tele tausaga e le o faigaluega, ae o isi ua vaea mai i galuega na galulue ai talu mai le tausaga na tea nei.

“Talosia ae vave taunuu lea fuafuaga a le kamupani mo galuega fou, sei maua ai se fesoasoani mo nai aiga ua pagatia i le itu tau tupe i le taimi nei,” o le saunoaga lea a le tama o Aleki Tunupopo mai Aua, lea na vaea mai i le vaiaso na tea nei mai le galuega na galue ai.

Na taua e Tunupopo i le Samoa News e faapea, o ia ma le silia i le toa 15 o isi tagata na latou galulue i le polokalame lea e faatupe mai e le malo tele, le NEG.

O isi alii e toalua na fesiligia e le Samoa News, sa maua avanoa e galulue ai i isi polokalame a le NEG ma ua silia ma le tausaga e le o toe faigaluega.

“O se avanoa lelei tele lea mo nai o tatou tagata e le o i ai ni galuega e galulue ai, pe afai ae tatala mai le fuafuaga a le kamupani ua faalauiloa mai i le taimi nei,” o le faamatalaga lea a le alii o Iosefa Apelu mai Leone, lea o lo o avea ma ave taxi i le taimi nei.

Na faamaonia mai e le tofa ia Taeaoafua Meki Solomona, i le masina ua mavae, i le Samoa News, le i ai o se fuafuaga a le pulega e toe faalautele lana tautua i le tausaga nei. ma faaopoopo ni isi tagata faigaluega, ona o le tausaga nei e faamanatu ai le 50 tausaga a le kamupani i totonu o le teritori.

I le maea ai o se fonotaga a se sui o le Ofisa o le Kovana Sili ma sui o le pulega a le StarKist Samoa i le vaiaso na tea nei, na faalauiloa ai loa e le afioga i le kovana sili, ia Lolo Matalasi Moliga i le Aso Faraile na tea nei lona tuuina atu o se faatonuga i le Komiti Faafoe a le ASPA ua ia tofia, ina ia siitia i le nofoaga autu a le ASPA i Tafuna ana afi eletise  o lo o i Satala, ae faaavanoa le nofoaga o lo o i ai mo galuega a le kamupani i’a.

Na faailoa mai e le tofa a Iulogologo Pereira i le Samoa News e faapea, o lea fonotaga na faalauiloa mai ai e le pulega a le kamupani la latou faanaunauga e faalautele la latou tautua ma faaopoopo ni isi avanoa faigaluega mo le atunuu, i le va o le 500 e oo atu i le 1,000.

I lea fonotaga, na faailoa ai foi e sui o le kamupani le leai o se faleaisa e fausia e tusa ai o le sainigalima sa faia ma le alii kovana ua mavae atu, le afioga i le matua ia Togiola Tulafono.

O le tausaga  e 2011 na tulai mai ai se mataupu i le va o le kamupani i’a ma le ASPA i le fasi fanua i Satala, lea sa fausia ai le fale’aisa a le kamupani, ina ua poloaina e le ASPA le kamupani e tatala le faleaisa ae faaavanoa le vaega lea e fausia ai le nofoaga fou a le ASPA, peitai e oo mai lava i le taimi nei e lei fausiaina lava lea fale fou a le ASPA.

O le taimi nei, ua amata ona toe vaaia galuega a le kamupani i’a i le nofoaga tuai sa faia ai, e pei ona i ai container o lo o la’u mai ai le i’a ma avatu i le nofoaga autu o le kamupani i Atuu.

Na taua e Taeaoafua i se feiloaiga ma le Samoa News i le masina na tea nei, o se taimi o le masina lenei e faalauiloa mai ai isi fuafuaga a le kamupani mo lenei tausaga, ma atonu o le taimi foi lea o le a faamautu mai ai le taimi tonu ma le aso e amata faatumu ai pepa mo i latou e talosaga i avanoa faigaluega e pei ona faailoa mai.