O le ali’i mai Samoa lea o lo o ogatotonu ai nei tuligasi’a a le Faamasinoga Maualuga ma le Ofisa o Femalagaaiga, i le tau sailia lea pe na fa’apefea ona toe ulufale mai i Amerika Samoa, ao lea sa poloaina o ia i le 2011 e aua ne’i ona toe ulufale mai i le atunuu mo le umi e 7 tausaga, ua ia ta’utino i luma o le fa’amasinoga maualuga i le vaiaso nei, e fa’amaonia tu’uaiga i lona le usita’i lea i poloaiga a le fa’amasinoga sa tu’uina atu ia te ia.

Ina ua fesiligia e le fa’amasino sili ia Michael Kruse ia Pelenato Maiava i le vaiaso nei, po o le a lana tali e tusa ai o tu’uaiga fa’asaga ia te ia, i lona le usitaia lea o poloaiga a le fa’amasinoga, na tali le ua molia, ua ia ta’utino ua ia le usita’i i le poloaiga a le fa’amasinoga e fa’asa ai ona toe ulufale mai i le atunu’u.

O le tali ioe a Maiava na mafua ai loa ona fa’aleaoga lana ulua’i iloiloga faapitoa sa faatulaga e faia i le vaiaso nei, e iloilo ai pe ua ia soli le poloaiga a le fa’amasinoga.

O le aso 1 Me, 2015 lea ua fa’amoemoe e toe tula’i ai Maiava i luma o le fa’amasinoga maualuga, ma tu’uina mai ai loa se fa’aiuga a le fa’amasinoga fa’asaga i lana mataupu.

I le aso na lau ai lana fa’asalaga i le tausaga e 2011, ina ua ta’usala o ia i lona tagofia o itutinosa o se tama’ita’i e talavou i lalo o le tulafono, e le gata sa poloaina e le fa’amasinoga o ia ina ia ona tuua le teritori ma nofo ai i fafo mo le umi e 7 tausaga o lana nofovaavaaia, ae sa poloaina fo’i le fa’asa lea ona ia toe taumafai e ulufale mai i le teritori i totonu o le 7 tausaga o lana nofovaavaaia.

O le itu o lo o fia fa’afofoga i ai le fa’amasinoga, po o ai le tagata o le Ofisa o Femalagaaiga na aveesea le igoa o Maiava mai le lisi o tagata e fa’asa ona toe ulufale mai i le teritori, i le mae’a ai lea ona fa’ailoa e le Pulesili o le Ofisa o Femalagaaiga ia Tamasa Dennis Fuimaono i le fa’amasinoga, le leai lea o se igoa o Maiava i luga o le latou lisi o lo o i ai igoa o tagata ua fa’asa e le fa’amasinoga ona toe ulufale mai i le atunu’u.

O se molimau e tele lona silafia i le mataupu atoa lenei, toe latalata fo’i ia Maiava sa ia fa’ailoa i le Samoa News e fa’apea, o se ali’i fapisinisi mai Amerika Samoa nei sa malaga i Samoa ma aumai le tusi folau o Maiava, ina ia mafai ai ona fai se pemita e malaga mai ai o ia e fau pasi mo le pisinisi fou a lea tagata iinei.

O le susuga a Maiava e pei ona taua e le ripoti a le Ofisa Nofovaavaaia, o se alii e i ai le taleni fau pasi.

E fa’alua ona ave e le tagata fai pisinisi lenei mai Amerika Samoa nei pemita e malaga mai ai Maiava i Amerika Samoa, o le pemita muamua ia Iuni 2014, ma le pemita lona ia Aokuso 2014.

Na taua atili e le molimau fa’atuatuaina lenei e fa’apea, o isi malaga e lua a Maiava e atoa i ai ana malaga e fa talu ona tu’uina atu le poloaiga e fa’asa ai ona toe ulufale mai i le atuu’u, na afua mai ina ua tu’uina atu e se isi fo’i tagata faipisinisi pasi i le atunuu pemita e malaga mai ai Maiava, mo le fa’amoemoe na te fauina pasi fou mo le pisinisi a lea tagata.

E le mautinoa pe fa’ailoa e Maiava ma lana loia fautua ia Douglas Fiaui i luma o le fa’amasinoga fa’amatalaga nei, ina ia fesoasoani ai i se faasalaga mama mo ia.

Na fa’ailoa e Kruse ia Fiaui i le ulua’i aso na fa’atoa tula’i ai lava Maiava i le mataupu fou lenei, na pau le fa’asalaga o lo o mafaufau i ai le fa’amasinoga mo Maiava, o le tu’uina atu lea o ia i le falepuipui mo le umi e 7 tausaga.