Ads by Google Ads by Google

Tuli fafo ona o le iila lona ofuvae sa fai

Na faatonu e le faamasino sili le tamaitai tusitala mai le leitio a Niu Sila o Laura McQuillan ina ia alu i fafo ma le potu faamasino, ona o le iila tele o lona ofuvae disco sa fai atu i totonu o le potu faamasino.

Fai mai ripoti, ao lei alu Laura i le faamasinoga sa fai lana tala i luga o le twitter fai mai, “O lea ou te nofo i lalo o le laulau, e le o iloa mai lava e se tasi lo’u ofuvae!” Peita’i, e i ai nisi na latou fesiligia o ia, pe mata o se ofu vae moni lona ofuvae i’ila. O lana tali, “Ou te le iloa pe aisea ua faigata ai i tagata ona iloa lelei lea ituaiga o ofuvae, e fufusi, meme’i toe i’ila!”

Na taua e Laura i luga o le twitter i le mafuaaga na faatulai ese ai o ia, “Ou te le mautinoa lava po’o le a lava, ae sa leai lava se tasi na fa’atula’ia a’u muamua, ae sa fai la’u mohawk.

O le isi tagata sa tusia atu lana fa’amatalaga i luga o le Twitter a Laura, sa ia fa’apea ai, “O lau tala lena e tatau ona fa’aulutala, “O le Ofuvae ua Te’ena e le Fa’amasinoga” ma ua fa’aosofia ai le tele o lagona fa’aalia ina ua fa’asalalau mai lena ulutala.

E tele lava taofi na fa’aalia, o nisi e fiafia i le mea na ia faia, ae o nisi fo’i e fa’aalia o latou lagona e le talafeagai lava lea ituaiga o ofu i totonu o le fa’amasinoga mamalu. Peita’i, sa le anoanoa e Laura le tele o faitioga ia te ia ma lona ofuvae i’ila ae fai lana tala tusia i lana twitter, “Ou te ofo atu ou te mana’omia lava le fesoasoani mai o nisi o tagata fa’apitoa o latou tomai i tulaga o lavalava e fautua a’u i o’u ofu i aso ta’itasi.”

E le o i ai ni faasalalauga faalauaitele poo ai ituaiga laei e laei atu e tagata i totonu o le potu faamasino, peitai o laei lava mo loia e tatau ona laei faalelei ae le o ofu iila.

saunia: Leua Aiono Frost