Ads by Google Ads by Google

Tulaga manuia tamaoaiga pe a toe fa’avae le ‘Credit Union’

Na taua i se vaega o le saunoaga a kovana Togiola Tulafono i luga o lana polokalame i le  lua vaiaso ua te’a, afai ae toe faavae le tautua e taua o le ‘Credit Union’ ae pulea ma faatautaia e tagata o le atunuu, o se tasi lea o tulaga lelei i le tamaoaiga o le teritori.

O lea manatu mai le afioga i le kovana sili, o ni isi ia o mafaufauga na mafai ona tutupu a’e a’o tau saili ai se vai fofo o le faafitauli lea o le a feagai ma Amerika Samoa i le tausaga fou, i le tula’i ese lea o le lala o le Faletupe o Hawaii ma le atunuu.

Na faamatala e Togiola e faapea, o le toe faavaeina o se Credit Union i le atunuu, “o se mea lea e lagona ai lona fiafia,” aua o fuafuaga ua i ai ma mafaufauga ua faataoto, afai ae toe faatula’i se Credit Union i Amerika Samoa, o le a le toe pulea ma faatautaia e se komiti faafoe po o le malo, ae o le a faatautaia ma pulea lava e tagatanuu o le atunuu.

“O le tulaga lelei lena pe afai ae toe faatula’i le Credit Union iinei, o ai lava e fia avea ma totino o lea tautua o le a mafai lava, o le a faigofie ai foi ona faia gaioiga uma mo le faaleleia o lea auaunaga mo le atunuu,” o le saunoaga lea a Togiola.

Saunoa Togiola, atonu o le a i ai foi ni faitioaga mai ni isi o le atunuu, e faatatau i le Credit Union lea sa faavae muamua i ni tausaga ua mavae, lea e le’i manuia lona faatautaiga, peitai i lona talitonuga, e aoga tulaga faaletonu na tutupu i taimi ua mavae ma auala e mautu ma lelei ai le taumafaiga mo le lumana’i.

“Ou te lagona afai e malu puipuia le faatautaiga o le faamoemoe lenei pe afai ae mafai ona toe faatulai, o le a tulaga lelei ma manuia ai le atunuu,” o le saunoaga lea a Togiola.

Fai mai Togiola, o tulaga lelei o le Credit Union e pulea lava e tagata o le atunuu, e le mafai ona toe alu ese ma le teritori, o faaiuga uma foi e faia lava e tagatanuu o lo o avea ma totino, e le pei o faletupe mai fafo ia o lo o agai mai i le atunuu, e faigofie ona toe tulai ma o ese pe afai e tulaga faaletonu polofiti e maua.

Fai mai le alii kovana, o le o mai o faletupe ma toe tulai ese, o le isi lena mafuaaga sa popole tele ai, ma a’e ai loa se manatu e lelei pe a toe vaavaai i le toe faatula’i o se Credit Union.

Fai mai Togiola, afai e sologa lelei taumafaiga mo se Credit Union, faaopoopo atu ai ma le lelei o le atina’eina o pisinisi lotoifale, o le a sologa lelei le tamaoaiga o le teritori i le lumana’i