Ads by Google Ads by Google

TULAGA LUA LEATA PUAILOA MS. OCEANIA INTERNATIONAL

I le tauvaga a le Miss Oceania International 2015 na faia i Sydney Ausetalia i le fa’ai’uga o le vaiaso na te’a, ua fa’alauiloa mai ai le maua o le tulaga lua e le alo o Amerika Samoa, Leataataosamoa Puailoa mai Nuuuli ma le Setete o Utah lea ua alaala ai ona o lona tiute i le US Army.

 

O lea tauvaga sa fa’atino ona o taumafaiga e “tineia le sauaga fa’ale-feusua’iga e a’afia ai Fanauiti”.

 

“O lenei pale ua ou mauaina, e ao ai ia te a’u ona fa’afetaia le puipuiga malu ma le fa’amanuiaga tele ua toina mai e le  Atua. Lona lua o si o’u atunu’u pele o Amerika Samoa ma le Malo tele o lo ua ou fiafia tele e tau’ave i so’o se taimi e taumafai ai se tautua mo Oe. Lona tolu o le tapua’iga a si o’u tina peleina Lemalie Amiatu, le aotelega o lo’u aiga ma le anoanoa’i o a’u uo mamae sa tapua’ia nei faiva. Fa’afetai i lo outou titi faitama, fa’afetai mo lo outou fa’amalosi’au ae maise o tatalo sa si’itia. Lea ua ou pale i lenei tulaga lua, e le o a’u ae ona o outou sa ou malosi ai,” o se tala lea a Puailoa.

 

O le taleni a Leata sa ia fa’atinoa, o lana siva Samoa, ma sa fa’ailoa mai, “Na matua malomaloa ai lea faletele sa fa’atautaia ai lea tauvaga ina ua sausaunoa fo’i  Tausala Samoa, ae aiaiuli ai le ali’i o Tito Stowers, lea sa ia amatalia lea fa’amoemoe, ina ia taofia nei uiga mataga e so’ona fa’ataumao’ia ai fanauiti.

 

FA’AALIGA LAEI O SIAKILI ESEESE 2015 - SUVA, FITI

 

Ua fa’ai’u mai fo’i ma le manuia le Fa’aaliga La’ei o Sikaili eseese, sa auai atu ai le tama’ita’i o Laura Elena Gomez o Amerika Samoa ma ua toe taliu mai ma nisi fo’i o aikia anoanoa’i e mafai ona tasu’ia aga’i i ai ni la’ei.

 

O nisi o la’ei sa sili ona mata’ina i lea fa’aaliga e tusa ai o le tufa mai a Gomez, o la’ei ia sa su’ia ma tapena e le ali’i o Afa Ah Loo o Samoa. Na fa’ailoa mai e Laura Gomez, o le tele o ana la’ei na alumia lava i lea fa’aaliga ma o le to’atele o tagata sa maimoaina lea fa’aaliga mai atunu’u i Europa ma Amerika. E o’o lava i tagata i totonu o Fiti lava ia, sa fa’ailoa lo latou fiafia i le su’iga ma le fa’afetauiga o lanu o la’ei na tapena mai e Ah Loo.

 

E o’o fo’i i fa’asalalauga i tala tusia ma ata, sa tele lava ina fa’asalalauina la’ei a le ali’i o Ah Loo i le Fiji Times ma le Upega Tafailagi a le Fiji Fashions. O ana la’ei na fa’aalia, sa fa’aigoaina e ia o “Amioga Samoa” ma sa iloga ona alumia ana ituaiga ofu e masani ona ta’e’ele ai tagata, fa’asolo mai i la’ei masani ona ofu e tafafao ai, ae toe o’o ane fo’i i le taimi na fa’aalia ai La’ei mo fa’atasiga taualoa, na toe sili lava ona alumia ai oloa gaosi a lea alo o Samoa.

 

Ua mafai ona e maimoaina nisi o nei siakili eseese i le upega tafailagi a le Fiji Fashions lea ua fa’ailoa mai: http://fashionweekfiji.tumbir.com/ ma le poloka a le tama’ita’i o Laura Gomez i le southpacificfashion.wordpress.com.

 

KOLUSE MUMU MA GALUEGA FA’ASAO SEA HAWAK

 

Na fa’ata’alise atu le Koluse Mumu i Amerika Samoa ma le latou fesoasoani le fa’atua’oia mo sui uma e 22 o le ‘auva’a a le Sea Hawak #68 ina ua maua le vala’au mai le Ofisa o le Kovana i le aso Faraile Me 22, 2015 i le va’a ua tafea mai mapa’ulia i gataifale o le Coconut Point i Nuuuli.

 

O le vaega a le DPS sa latou va’ava’alua ma le auaunaga mai le Koluse Mumu ma latou utaina atu mea uma sa iloga e mo’omia i le nofoaga ua fa’ataunu’u i ai nei mea uma mo le auva’a pagatia.

 

Na fa’atasi atu fo’i le vaega a le Soifua Maloloina mo ni togafitiga o i latou ma le vaega o Fa’ato’aga a le Malo mo le tapenaga o ni mea taumafa.

 

O mea na taua’aoina e le Koluse Mumu e aofia ai le 22 palanikeke; mea e fa’aaoga mo taelega ma lavalava, pusa o i ai mea e fa’aaoga mo talavai ma pusavai taumafa. Na soso’o ma le to’ai taunuu atu o le isi sapalai o lavalava, se’evae mea uma momoe ai le to’a 22 o tagata o le auva’a.

 

Na galulue so’otau’au lava fo’i le tatou vaega a le Koluse Mumu ma le vaega a le EMS o le tatou falema’i i Faga’alu.