O le ripoti i tulaga o tupe maua ma tupe fa’aalu a le kamupani o lo o latou fa’atautaia le tosoina mai o le uaea mo fesootaiga i le sami mo Amerika Samoa, (American Samoa Hawaii Cable - ASHC) ua mafai ona tuuina atu i luma o le Fono Faitulafono, o lo o taua ai le tulaga lelei o tupe maua ma tupe fa’aalu a le kamupani mo le tausaga tupe 2013, lea na ma’ea ia Tesema 31, 2013.

I se tusi mai le afioga i le alii kovana ia Lolo Matalasi Moliga sa tuuina atu i ta’ita’i o le fono i le aso ananafi, e le gata o lo o tuu faatasi atu ai ma le kopi o le ripoti a le kamupani su’etusi sa latou su’eina tusi a le kamupani, ae o lo o ia taua ai fo’i le fa’anaunauga o le malo ina ia tausisia tulafono e ala i le tuuina atu lea o le ripoti a le ASHC i luma o le fono mo le iloiloina.

O le kamupani su’etusi o le King Accountancy Corporation mai Amerika sa gafa ma le su’eina o tusi a le ASHC.

Na taua e Lolo i se vaega o lana tusi i taitai o le fono e fa’apea, e ui e le i faia se faaiuga e tusa ai o le tulaga o tupe a le malo o lo o inivesi i le kamupani a le ASHC, peitai e taua le silasila toto’a o le fono i le ripoti a le su’etusi, e fuafua i ai se fautuaga mo se faaiuga e tatau ona faia.

Na faailoa e Lolo i lana tusi e fa’apea, e le mafai ona faia muamua e le faigamalo se faaiuga, sei vagana ua nonofo muamua i lalo ma ta’ita’i o le fono ma talanoa i se faaiuga talafeagai e tatau ona faia, ao lumana’i ai le fa’ailoa atu o lea fa’aiuga i sui o le komiti fa’afoe o lo o faatautaia le vaega a le ASHC.

Na taua e le kamupani a le King Accountancy Corporation i le latou ripoti sa tuuina atu i totino o le Komiti Fa’afoe o le ASHC e fa’apea, o le latou galuega i le su’eina o tusi ma faamaumauga a le kamupani i tulaga o tupe maua ma tupe fa’aalu, sa faavae lea i luga o ta’iala o lo o fa’atautaia ai suega tusi i totonu o Amerika.

“O nei ta’iala e aofia ai lo matou vaavaai i faamaumauga uma e faatatau i tupe a le kamupani, ma iloilo po o talafeagai le faia o nei faamaumauga ma ta’iala o lo o manaomia, po o i ai fo’i se vaega o lo o sese ai nei fa’amaumauga”, o se vaega lea o le ripoti a le kamupani su’etusi.

“I le mae’a ai la o latou su’ega tusi sa faia i faamaumauga a le kamupani, ua matou manatu ai o lo o talafeagai ma lelei tulaga o faamaumauga a le kamupani e tusa ai o tupe ua faailoa, ma ua atagia mai ai le talafeagai o auala o lo o faatino ai a latou galuega ma tiute tauave ma tulafono o ta’iala e pei ona manaomia i Amerika i le faafoeina o suesuega i faamaumauga ma tusi a le kamupani”, o se vaega lea o le ripoti a le kamupani suetusi.

E tusa ai ma le ripoti a le ASHC, o lo o atagia mai ai vaega e 6 o lo o maua mai ai tupe maua a le ASHC mo le tausaga tupe lenei 2014, e aofia ai le kamupani telefoni e pei o le Bluesky Samoa ma le ASTCA.

Ae i le ripoti mo tupe maua ma tupe faaalu a le kamupani, o lo o taua ai le faaauau pea lea o le faaopoopo o tupe maua a le kamupani i se tulaga lemu, ona, e na o le kamupani telefoni a le Bluesky Samoa o lo o fa’atauina le latou tautua (capacity), lea fo’i ua sauni le Bluesky e fa’atau isi a latou tautua fou e pei o le DS3, ma le faamoemoe o le a mafai e ni isi kamupani ona latou fa’atauina lea foi auaunaga.

Talu mai le 5 tausaga o le tautua a le ASHC, o lo o agai lemu pea i luga lana auaunaga i le 55% e pei ona i ai i le taimi nei, ma ua faamoemoe le kamupani e tuuina atu se isi a latou tau fou i se taimi o i luma, ina ia mafai ai ona fa’atosina mai isi kamupani e fai paaga ma i latou i le lumana’i, e ui e manaomia lava le lelei o le latou auaunaga i totonu o le ulua’i 10 tausaga o le latou konekarate.

O fuafuaga alu mamao a le ASHC e pei ona taua i le latou ripoti, e aofia ai se fuafuaga e galulue soosoo tauau ma faletupe o le lalolagi atoa ai ma faletupe o atina’e i Asia, ina ia mafai ai ona siitia le tautua a le ASHC i le atunuu.

O isi fuafuaga e pei ona taua i le ripoti, o le taumafai lea ina ia fesootai ma isi atunuu i le uaea o fesootaiga e pei o Niue, Atu Kuki ma Niu Sila, ina ia faa faigofie ai tulaga o fesootaiga.